Read Makhuwa-Shirima Yeremiya 50 Bible Online

Yeremiya 50 - Makhuwa-Shirima bible

Yeremiya 50

¹Masu uulummaawe Yave mwa mprofeeti Yeremiya mwaha wa oBabiloniya ni elapo ya aBabiloniya ti ala:

²“Muhime ni mulaleiye eriyari ya miloko, mweemexe eneneero ni mulaleiye; muhikhuweru. Mweere: ‘oBabiloniya woowiniwa; Beli ooyevihiwa, Marduki ootteenguwa. Icaambulo sa aBabiloniya sooyevihiwa ni milukusaya sootteenguwa.’

³Muloko onuurweele mpatta wa ottuttuwani onoowanano, onoophwata elapwaaya woohimuhiyarumo mmaki; okhuma atthu mpaka axinama anootthawa.

⁴Mmahukuni awo ni mweehuhuni eyo,” onghima Yave, “muloko wa oYixrayeli ni wa oYuda onimoorwa vamoha, wiinlaka ni omwaasaka Yave Mulukwaaya.

⁵Anookoha ephiro enkela oSiyoni ni anookuxera. Animoorwa emvarexexeke Yave ngwiiraanani woohimala oneera ohittiwaliwe.

⁶Mulokwaaka woothweelela ntoko ikhoondoolo sooriheya; akukhulaaya aathweeleliha, sinamwareela mmwaako. Iyo sooxoraxorela mmanyaakoni ni mmattumuxani sinattiwala munikhoolanimwaya.

⁷Ootheene amphwanya anookhuura. Awananaaya yeenre: ‘Khaninthowa, niwoko awo aamutthekela Yave, Moocamwaya xaxaxa, aani Yave ori Oweherera wa makholowaaya.’

⁸Mutthawe oBabiloniya! Mukhume mulaponi mwa aBabiloniya ni mukhale ntoko anapunci anghoolela muhuwo.

⁹Mpatta wa ottuttuwani kinoorumiha miloko sooweraxa weera singwaneno Babiloniya. Anoowanano elapo ni eyo enookuxiwa mpatta wa ottuttuwani. Nyuupasaya nsikhale ntoko anakhotto ooweraxa mwa seiyo sihinkuzaru.

¹⁰Hiiho oBabiloniya onoohuhuliwa; ootheene eniihuhule oBabiloniya anookwaneya,” onghima Yave.

¹¹“Hapo nyuwo moohakalala, mutthapaka, nyuwo munghuhula yoohiyeraaka; hapo nyuwo munthamaliwa ntoko mwaamombe ootaphuliwa aatthukeleliwaawewo, ni muntturuma ntoko ikavalu* ilopwana,

¹²amayinyu animuulihiheyaxa muru; yoowo ooyanreni onooyevihiwa. oBabiloniya onookhala wooyevaxa wa ilapo sootheene; ntoko nikare noowuumelela noohikhalano maahi.

¹³Niwoko na isara sa Yave iwo khoomakiwa, mene onoohala ttewu woomalela. Ootheene eniivire oBabiloniya anoothikileya muthana, etheyeke mwaha wa makhwattaawe ootheene.

¹⁴Muthataanele owana murukureenreene oBabiloniya, ootheene nyuwo mvarenle nyuupa. Mulathele! Muhuurele nyuupa, niwoko iwo woomutthekela Yave.

¹⁵Orumele oBabiloniya okhuweliwa wa ekhotto mipatta sootheene! Iwo oneemexa matata, itooresaya* simmora ni ixirisaya simphwatiwa. Iyo ikukuttula sa Yave; mwiinlele ikukuttula! Mpakele yeeyo iwo waapakenlaaya ikhwaaya!

¹⁶Mummalamalihe namwaala ni namahepha vamoha ni ecikwaakhwaawe moohephani. Khula mutthu ahokoleele omulokoniwawe, ni atthawele mulaponimwawe niwoko na namahooxa.

¹⁷Yixrayeli muhuwo woomwaraxiwa, woomoliwe ni amwatto. Opacenre omunyaanya aari mwene a wAsiriya; oomalihera opwexakasa makhuvaaya aari Nebukadenezari, mwene a oBabiloniya.”

¹⁸Vano Yave a ikuru sootheene, Muluku a oYixrayeli oneera ha: “Kinoomuttaruxa mwene a oBabiloniya ni elapwaaweene ntoko kaamuttarunxaaka mwene a wAsiriya.

¹⁹Vaheera kinoomuhokoloxera Yixrayeli moocamwawe ni anaace mmanyaakoni sa oKaremelu ni oBaxani; onoomaliha ovoliwawawe etala mmattumuxani a wEfrayimi ni oGiliyade.

²⁰Mmahukuni awo ni mweehuhuni eyo,” onghima Yave, “sinimwaasaasiwa sootakhala sa oYixrayeli, mene khasiphwanyiwaru; mwa soottheka sa oYuda, mene khasiphwanyiwaru, niwoko kinimwaalevelela ahalahanle kineeraaka kiwuurele.

²¹Ngwanane elapo ya oMeratayimi ni yaale ankhala oPekodi. Mwaattharelele, ngwiive ni mwaaphwate woomalela,” onghima Yave. “Mpake sootheene koolamulenlaakani.

²²Wookhala oruma wa owaniwa mulaponi; ophwata otokotoko!

²³Moota epwexiwaaya ni ephwatiwaaya enyutto ela ya mulaponi moothemwene! Moota othaamiwaaya oBabiloniya eriyari ya miloko!

²⁴Ii! oBabiloniya, kohoorehererelani ntapha, nyuwo mvariwe muhisuwelaka; nyuwo mphwanyeriwe ni mvareliwe niwoko na omvaanya Yave.

²⁵Yave oohula okapwitthiniwawe, anakhumihera vaate ikapwitthi sa isarasawe, niwoko Yave onlamula sootheene, Yave a ikuru sootheene, ookhalano muteko woovara mulaponi mwa oBabiloniya.

²⁶A ekotenle elapo murwe ngwaneno yeeyo. Mukarasule matathaaya; muthataanyere ntoko ihupu sa irooro. Mphwate woomalela ni muhimuhiyeru naari oohalahala mmoha.

²⁷Ngwiivakase amiravowaaya ootheene! Awosa erowase owiiviwani! Ii! Wa yaawosa! Nohaaphiyera nihukunaya, ehuhu ya ottaruxiwawaya.

²⁸Ngwiiwe anamatthawa ni yaale atthangwe ekhumaka oBabiloniya, elaleiyaka oSiyoni moota Yave, Mulukwaahu, iinlenlaawe ikukuttula, aani iinlenlaawe Empaawe.

²⁹Ngwiitthanele ananyuupa oBabiloniya, ootheene yaale amvarela nyuura. Ekonele ootheene mukhwipimwawe; ahikhaleru anaatthawe. Mutthuvele muttharihaka ipakelosaya; mpakele iwo sootheene opankaaya. Niwoko iwo woomveiha Yave, Ootteela a oYixrayeli.

³⁰Tivawo, amiravowaaya eneeraaya emorele mmiseweni ni anakhottwaaya ootheene anoomaala nihuku nno,” onghima Yave.

³¹“Ii! Namwiixoona, moone, koowiittani,” onghima Yave onlamula sootheene, Yave a ikuru sootheene, “Niwoko noophiyera nihukunanyu, ehuhuwaanyu ya ottaruxiwa.

³²Namwiixoona onookwakwathuwa, uuweke ni khaawo anaamukhavihere ovenya. Kinoopattiha isidadesawe, ni mooro onoolaliha sootheene sa mukhwipimwawe.”

³³Yave a ikuru sootheene oneera ha: “Muloko wa oYixrayeli onnihasuliwa, mpakatho muloko wa oYuda. Anamavaraaya ootheene anaavara yaalipihaka, ekhoottaka waahiya orowa.

³⁴Wa soothesene, Namoopolaaya ti oolipa; Nsinanawe ti Yave a ikuru sootheene. Yooweene ti anaakihe mulattwaaya, ni onooruuhela wiitthuuwa elapwaaya, mene onoowuungurumiha yaawo ankhala oBabiloniya.

³⁵Ekatana yoowaawanano aBabiloniya!” onghima Yave, “wa yaawo ankhala oBabiloniya ni wa ahooleli ni anamirukwaaya!

³⁶Ekatana yoowaawanano maprofeetaaya oowootha! Awosa anoothatuwa masikini. Ekatana yoowaawanano anakhottwaaya! Awosa anootteenguwa.

³⁷Ekatana yoowanano ikavalusaya*, wa ikaarosaya sa ekhotto ni wa anamarwa ootheene mmisewenimwaya! Awosa eniikhale ntoko asithiyana. Ekatana yoowanano mihakhusaya! Awosa anoohuhuliwa.

³⁸Ekatana yoowanano maahaaya! Awo animuuma. Niwoko ti elapo yoosareya icaambulo soopatthiwa, ni elapo eyo ensivelaxa icaambulo iyo.

³⁹Tivawo soopattuxiwa sa munikareni ni akusupa eneeraaya ekhalemo, ni isiisi sinoomakamo. Eyo kheemakiwatho hata muhoolommo khakhalaru anaamakemo.

⁴⁰Mooteene yoole Muluku aaphwantaawe oSodoma ni oGomora ni isidade soowaattamana,” onghima Yave, “khaawo anaamakewo, naari mmoha.

⁴¹Moone! Oneera orwaaka muloko wa mpatta wa ottuttuwani; muloko mutokotoko ni mamwene mancipale aniireherera okhuma ekotenle elapo.

⁴²Awosa amvarela muura ni nivaka; ti oowuuma murima ni oohimorela ikharari. Onyakulawaya ori ntoko oruma wa ephareiya. Anrwa ewenleene ikavalu*, ethataanelaka owana, weera yoowananeni nyuwo, esidade ya oBabiloniya.

⁴³Mwene a oBabiloniya iiwakaru suulummwaka sa yaawo, matataawe yaatteenguwa. Othanana waamvara, ovoreya ntoko muthiyana ayaraka.

⁴⁴Miyo kinoolupattha oBabiloniya wootutuxereya ntoko mwatto onkhuma mutuphini na oYordanu arowaka omunyepuni wooreerela, iirakamelihaka elapwaawe. Oothanliwa heeni kineeraaka kimurume yeeyo? Taani onlikana ni Miyo ongwera okipakela mpikisaano? Khawowo mukukhuli anaawere okiwanano.”

⁴⁵Tivawo, mwiiwe yeeyo Yave aavaanelenlaawe aBabiloniya, yeeyo orehererenlaawe oBabiloniya: Axaana a mihuwo anoopuruliwa, ni moocihamo onoonanarihiwa niwoko na yaawosa.

⁴⁶Elapo enootetereya woowiiwa oruma wa okuxiwa wa elapo ya oBabiloniya; okhuwelawaya onimwiiwanyeya eriyari ya miloko.