Read Makhuwa-Shirima Yeremiya 51 Bible Online

Yeremiya 51 - Makhuwa-Shirima bible

Yeremiya 51

¹Yave oneera ha: “Moone! Kinimoopihera epheyo yoophwata oBabiloniya ni wa muloko wa oLebi-Kamai.

²Kinimwaarumihela anamarwa oBabiloniya weera eveerewo ntoko etrigu ni ephwate elapwaaya. Munihukuni na erisaaya atthu a mipatta sootheene anoorweela yeeyo.

³Namuupa ahikunge muuraawe naari ahiwarele sa ekhotto. Muhiwuurele amiravowaaya ari anakhotto; mwaaphwate woomalela anakhottwaaya.

⁴Awosa anookhwela oBabiloniya, oovulaliheriweene mmiseweni ehalaka vakhaani okhwa.

⁵Yixrayeli ni Yuda khaathaamiwe ni Mulukwaaya, Yave a ikuru sootheene ntoko asinaamukhweli, elapo ya aBabiloniya eroosareyaru nthowa ohoolo wa Ootteela a oYixrayeli.

⁶Mutthawe oBabiloniya! Khula mutthu atthimakeke uurelaka okumaawe! Muhiphwatiwe niwoko na sootakhalasaya. Ti ehuhu ya ikukuttula sa Yave; Owo onooliva oBabiloniya yeeyo emphwanelaaya.

⁷Babiloniya aari ekoomixi ya eyuuma yoorikaxa mmatatani mwa Yave; eyo yoohapaliha elapo yootheene. Miloko soowura eviinyuwaaya; tivawo sipupurumiheiyaaya.

⁸Wootutuxereya oBabiloniya woomora, onaheleya nthala. Mulalamikele yeeyo! Mwaasere ebalsamu* nikhwattanaya; apaale nnoovola.

⁹‘Nannatthuna olammeene oBabiloniya, mene iwo khoongwera olamihiwa; muhiye, nrowe, khula mutthu mulaponimwawe, niwoko othorihiwawaya woophiya wiirimu, woorakamaxa mpaka waamahutte.’

¹⁰‘Yave oonaakiha; nrowe, nathalihe oSiyoni yeeyo Yave, Mulukwaahu opankaawe.’

¹¹Munone nyuupa, mukuxe ixikudu! Yave ohaatannya mamwene a oMediya, eerelaka ophwata oBabiloniya. Yave onimwiinlela ikukuttula ophwatiwa wa Empaawe!

¹²Mweemexe eneneero yoowanano oBabiloniya! Ngwaandyeerere anamalipelela! Mwaathate masintinela! Mwiirehererele owana! Yave onookwanihera yoovaanelaawe, yeeyo yoopopinghe opakeliwa amaki a oBabiloniya.

¹³Nyuwo munkhala moohithowa maahi ni musareiye mihakhu — woophiyera ommaleloniwanyu, aani ehuhu ya omalamalihiwawanyu.

¹⁴Yave a ikuru sootheene ohiilipela eeraka: “Vekhaikhai kinoosariha oBabiloniya ni atthu, ntoko nasope, ni awosa anookhuwela ngwoowinanimwanyu.

¹⁵Vaheera ti Muluku opattunxe elapo ya vathi ni ikurusawe; Owo aakhaliha yeeyo ni mirukusawe ni aakunga erimu ni wiiwexexawawe.

¹⁶Etaraawe erumaka, maahi a wiirimu anoorumatho; Owo ompakiha weera mahutte ekungeele okhuma ekotenle elapo. Owo omverunyiha epula, anoopiha epheyo yuukaannaayawo.

¹⁷Ootheenaawo alolo ni oohisuwela; khula neettottho onuulihiheya muru mwa ecaambulo opantthaawe. Icaambulosawe soopatthiwa ti mwiiyero, iyo khasinono ngwiya wa okumi.

¹⁸Iyo ti soohivareleya muteko, siri etthu yootthebwano. Waarwaaka othorihiwawaya, sinooriheya.

¹⁹Yoole ori ettima ya Yakobe khanlikana ni yaalasa, niwoko ti Yoowo ompaka itthu sootheene, ni Yixrayeli ti epuumba ya yoohiyeraawe; Nsinanawe ti Yave a ikuru sootheene.

²⁰Nyuwo ti enyuttwaaka, kapwitthaaka oongwanano. Kinnyaanya miloko mwa nyuwo; kimphwata imwene mwa nyuwo.

²¹Mwa nyuwo kinnyaanya ekavalu* ni namweettihaaya, aani kinnyaanya ekaaro ya ekhotto ni namweettihaaya;

²²mwa nyuwo kinimunyaanya mulopwana ni muthiyana, mutokweene ni mukhaani, mmiravo ni mwaamwali,

²³mukukhuli ni muhuwo, namalima ni emombe, maguvernadori ni asitokweene.

²⁴Vamaithoniwanyu kinootthuvela oBabiloniya ni ootheene ankhalawo yoonanara yootheene apankaaya oSiyoni,” onghima Yave.

²⁵“Ii!, mwaako woophwata, elapweeneeyo, Miyo koowiittani,” onghima Yave. “Kinoowookolelani moonowaaka, Miyo kinimoopirikixelani vamwala, ni kinimoopakani mwaako wa ettuxuweene.

²⁶Khanikhalaru nluku nneera nivenxiwe mwa nyuwo weera nikhale noottittimiheya, naari wa mathipelo, niwoko nyuwo munooheleya nthala wa mahuku ootheene,” onghima Yave.

²⁷“Mweemexe eneneero mulaponi! Mwiipe nipalapatta eriyari ya miloko! Murehererele miloko soowanano; mwiitthane imwene iya: wArarate, oMini ni wAxekenaxi. Munthanlele mutokweene a anakhotto anaawaneno; murumihele ikavalu* okhottoni ntoko nasope.

²⁸Mureherere miloko weera siwaneno oBabiloniya: Mamwene a waMedu, maguvernadoraaya ni asitokweenaaya ootheene, ni ilapo sootheene anlamulaaya.

²⁹Elapo enthukumela, epirituwaka mwaha wa ovoreya, niwoko soovaanela sa Yave simpwahererela oBabiloniya: Ohela nthala elapo ya oBabiloniya weera ehimakiwe.

³⁰Anakhotto a oBabiloniya aahiyerera owana; ampwaherera okhala moolipamwaya. Sohaamalela ikurusaya; aathatuwa ntoko asithiyana. Moomakamwaya moohisiwa; anampattika a maselaaya akarasuliwa.

³¹Murummwa onrowa mmoha mmoha ni namutthenga omvenya mmoha mmoha weera emulaleere mwene a oBabiloniya weera esidadaawe yootheene yoovariwa,

³²mithato sa nyooloko sookuxiwa, munyepu wa muttaponi woohisiwa, ni anakhotto ahoopopiheya.”

³³Yave a ikuru sootheene, Muluku a oYixrayeli oneera ha: “Esidade ya oBabiloniya eri ntoko waneepettheliwa; ehuhu ya ohepha enoophiyerela woowaakuveya.”

³⁴Nebukadenezari, mwene a oBabiloniya, ooninyaanya, oonipupurumiha, oonipaka exaaru yoohikhala etthu. Oonimira ntoko enowa, oonivona ni ikhaanikhaanisahu, ananirapheya.

³⁵“Nipuhero nipakeliwe irutthusahu nikhale mwa oBabiloniya,” aneera amaki a oSiyoni. “Ephomaahu yaamorele yaale ankhala oBabiloniya,” oneera Yerusaleemu.

³⁶Tivawo Yave oneeraawe ha: “Moone, kinimwaakiha mulattwaanyu ni kinoowiinlelani ikukuttula; kinimuumiha ephareiyaaya ni kinimwaaweleliha anaattuuttwaaya.

³⁷oBabiloniya onoohala ittuxoru, woomaka wa akhwatte, moopopihero ni yootthebwano; nipuro nihinkhaliwaru.

³⁸Mulokwaaya wootheene wa oBabiloniya ontturuma ntoko amwatto axaana, ankonga ntoko axaana a mwatto.

³⁹Vaheera ehaawelaxaka oca, kinimwaarehererela efesta kaahapaliheke, weera ehakalalaxe, ni evirelele okona woohivenyatho,” onghima Yave.

⁴⁰“Miyo kinimwaakuxa ntoko eputtiputthi eronghiwaka owiiviwani, ntoko ikhondoolo ni anapunci.

⁴¹Moota oXexaki ovariwaaya! Moota wiixoona wa elapo yootheene okuxiwaaya! Moota oBabiloniya woopihaaya eriyari ya miloko!

⁴²Ephareiya enookhalela owali oBabiloniya; mitekutekusaya sinookhuneela iwo.

⁴³Isidadesaya sinoophwatiwa, elapo yoowuumelela ni ya nikare, elapo ehinkhaliwaru, mwa weiwo ohimviriwaru.

⁴⁴Kinoomuttaruxela Beli oBabiloniya, kimurapheihaka ominraawe. Miloko khasitthimakelawo. Ni exiri ya oBabiloniya enoomora.

⁴⁵Mulokwaaka, mukhumemo! Khula mutthu oopole okumaawe musarani soopatta sa Yave.

⁴⁶Muhiporore naari muhoove mwiiwaka minyakunyaku mulaponi; munyakunyaku mmoha mutano, mukina mwaahiyu, munyakunyaku mwaha wa nipuhero mulaponi ni wa mulamuli mmoha angwananaka mukina.

⁴⁷Vanonto, woohihovela, anoophiyera mahuku kineeraaka kittaruxe icaambulo soopatthiwa sa oBabiloniya; elapwaaya yootheene enimuulihiheya muru, ni anamakhwaaya animwaataleleyamo oomoreene.

⁴⁸Vano erimu ni etthaya ni sootheene sirimo sinookhuwela ni ohakalala mwaha wa oBabiloniya, niwoko anamaphwata a mpatta wa ottuttuwani anoowanano,” onghima Yave.

⁴⁹“oBabiloniya onoomora mwaha wa anamakhwa a oYixrayeli, ntokotho anamakhwa a elapo yootheene yaamonraaya niwoko na oBabiloniya.

⁵⁰Nyuwosa moopongwe mwa ekatana mukhume! Muhipwaherere! Mmuupuwelele Yave mulaponi yoorakamela, ni muupuwelele oYerusaleemu.”

⁵¹Nyuwosa mmweere: “Nohuulihiheya muru niwoko nooruwaniwa ni wuuliheya muru woosareya mukhovenimwahu, yeenre anamarwa ephutula mmapuroni ootteela a Empa ya Yave.

⁵²Vanonto vekhaikhai anoophiyera mahuku,” onghima Yave, “kineeraaka kittaruxe icaambulosaya soopatthiwa, ni mulaponimwaya yootheene oovulala onimwiipulela.

⁵³Naari oBabiloniya ophiyaka wiirimu ni opakaka osulu wootthawelawaya woolipa, kinoorumihela anamaphwata,” onghima Yave.

⁵⁴“Oniiwanyeya onyakuliwa oBabiloniya; onyakula wa ophwata otokotoko onrweela mulaponi ya oBabiloniya.

⁵⁵Yave onoophwata oBabiloniya; Owo onoomaaliha orumawaya woowiiwanyeya. Mitekuteku sa amwiittana sinoopwaherera ntoko maahi oowaatta; otturuma wa maswaaya onooruma.

⁵⁶Namaphwata onoorweela oBabiloniya; anakhottwaawe anoovariwa, ni nyuurasawe sinimwintakiwa. Niwoko Yave ti Muluku a ikukuttula; Owo onootthuvela woomalela.

⁵⁷Kinimwaahapaliha ahoolelaaya ni anamirukwaaya; maguvernadoraaya, asitokweenaaya ni anakhottwaaya. Awosa anoovirelela okona kheevenyatho,” onghima Mwene, mwa Yoowo Nsinanawe ti Yave a ikuru sootheene.

⁵⁸Yave a ikuru sootheene oneera ha: “Exiri yoothanuwa ya oBabiloniya enoomoroxeliwa vathi ni maselaaya oorakama anoohisiwa. Miloko nsaase okhulumuwawene, ommaleloni wa muteko wa miloko onimooza.”

⁵⁹Ola mutthenga Yeremiya aamvanghaawe Seraiya, mwaana mulopwana a Neriha, mwaana mulopwana a Makheseya, owo aarongwaawe oBabiloniya ni mwene Zedekiya a oYuda, vayaakhani yanaaxexe ya olamulawawe.

⁶⁰Yeremiya aalepa munikwakhwalani irisa sootheene seera sirwe oBabiloniya, sootheene saalempwale mwaha wa oBabiloniya.

⁶¹Owo amweerela Seraiya: “Mwaaphiyaka oBabiloniya, mwiipasoope weera mwasome masu ala ni nsu noowiiwexexeya.

⁶²Vano mweere: ‘Ii! Yave, mwaaheera weera munoophwata nipuro nna, moota wooweera naari mutthu hata mwaamunama ahikhalemo, niwoko enooheleya mathala wa mahuku ootheene.’

⁶³Nyuwo mmalihaleene osoma nikwakhwala nno, mwatthukelelemo nluku ni mwavonyere mmoolokoni Efratesi.

⁶⁴Vano mweere: ‘oBabiloniya onoottatta ntoko hiiha ni khootekiwatho, niwoko na erisa kineeraaka kiruuhele. Ni mulokwaaya onoomora. Mpaka va masu a Yeremiya.’ ”