Read Makhuwa-Shirima Yeremiya 7 Bible Online

Yeremiya 7 - Makhuwa-Shirima bible

Yeremiya 7

¹Masu Yeremiya aakhenlaawe wa mpatta wa Yave ti ala:

²“Mweemele vamulako wa Empa ya Yave ni mwalaleiyewo mutthenga ola: ‘Nyuwosa muloko wootheene wa oYuda mumvira mmilakoni iya weera munttottopele Yave, mwiiwe masu a Yave.

³Yave a ikuru sootheene, Muluku a oYixrayeli oneera ha: Muceendye mweettelowaanyu ni mitekosanyu ni Miyo kinimootthuniherani okhala vanipuroni nna.

⁴Muhiroromele masu oolokhottha mweeraka: “Ela ti Empa ya Yave, Empa ya Yave, Empa ya Yave!”

⁵Nyuwosa vekhaikhai mwaceendya mweettelowaanyu ni mitekosanyu ni mwapakelana ekhaikhai,

⁶nyuwosa mwaahaahasula anamarwa, akwaasuni hoye hoye asinaamukhweli ni mwaahiyeehera ephome yoohinthowa nipuro nna, ni mwaahitthara miluku sikina mwiihelaka nthala,

⁷vano kinimootthuniherani okhala vanipuroni nna, mweelaponi kaavanghaaka makholowaanyu wa mahuku ootheene.

⁸Mene moone, nyuwosa munroromela masu oolokhottha ni oohimuteko.

⁹Munuupuwela weera onoowereya wiiya, wiiva, oraruwa, wootha, omuhisera erubani* Bahali* ni otthara miluku sikina muhisuwenlaanyu,

¹⁰ni vahoolowaya okhala ohoolowaka Mpaanimu ela erino Nsinanaka, mweeraka: “Noolipa!” Noolipa weera mpwaherere ni miteko sootheene iyo sa mwiikho?

¹¹Mootatuxa Empa ela erino Nsinanaka nikhuku na anamwiiya, mene nnene! Miyo kineera koonaka yeeyo, onghima Yave.

¹²Murowe vaanaano va oXilo mwa weiwo nri Nipuronaka na ovekeliwa kaapacenraakawo omaka kittittimiherelaka Nsinanaka, ni moone yeeyo Miyo kaapakenlaaka nipuro nno niwoko na sootakhala sa mulokwaaka aYixrayeli.

¹³Nyuwosa mwaapakaanyu itthu sootheene iya,’ onghima Yave, ‘Miyo kannooleelani imaara sincipale, mene khamwiiwale; kaawiitthanani, mene khamwaakhunle.

¹⁴Tivawo, yeeyo kipakenlaaka oXilo vano kinoopakela Empa ela erino Nsinanaka, Empa ya Yave mwa yeeyo munroromelaanyu, nipuro koovanghaakani nyuwosa ni makholowaanyu.

¹⁵Kinoowoomolasani vamaithoniwaka ntoko kaapakenlaaka axunninyu, muloko wa wEfrayimi.’”

¹⁶“Ni nyuwo, Yeremiya, muhivekelele muloko ola naari muhidyoonttelele mwaha wa yoowo; muhikidyoonttelele, niwoko nkirwa kiwiiwaani.

¹⁷Khamunoona yeeyo awosa ampakaaya mmittettheni sa oYuda ni mmiseweni sa oYerusaleemu?

¹⁸Anamwane anaasa ikhuuni, asitiithi ampattiha mooro ni asithiyana aneetheya ephepa empakelaka iboolu pwiyamwene a wiirimu. Awosa angyeehera sooveleela soowura miluku sikina weera etannyere isarasaka.

¹⁹Mene weeraka ankitannya Miyo? onkoha Yave. Awosa aniixuulihiha muru asineenaaya.

²⁰‘Tivawo Yave onlamula sootheene oneeraawe ha: Onyoonyiwawaka ni isarasaka sinooyeeheriwa nipuro nna, mwaatthuni, mwaaxinamani, mmirini sa mmatta nitho mwa soowiima sa vathi; iyo sinoohisa ni khasicipihiwa.

²¹Yave a ikuru sootheene, Muluku a oYixrayeli oneera ha: Muroweke, mwathukumanye sooveleelasanyu soohisa ni sooveleelasanyu sikina ni mukhuureke inama asineenaanyu!

²²Vano Miyo kaakhumihalaaka makholowaanyu wExipitu, kuulumaka ni yaawo, nkaalamulenleru mwaha wa sooveleela soohisa hoye hoye sikina.

²³Ohiyanawaya, nlamulo kaavanghaaka ti nna: mukiiwelele ni kinookhala Mulukwaanyu ni nyuwosa munookhala mulokwaaka. Mweette mphironi kinoolamulelaakani weera itthu siweetteleni nnene.

²⁴Vaheera awosa khayaakiiwale hata khayaakipwantthe; ohiyanawaya yaatthara soowuupuwela soovaanya sa mirimasaya soonanara. Yaahokoleenle ottuli ohiya ohoolo.

²⁵Okhuma ehuhuweene yeele makholowaanyu yaakhummaaya wExipitu mpaka vanaano va, Miyo kaahaarumihelasa arumeiyaaka maprofeeti nihuku ti nihuku.

²⁶Vaheera awosa khayaakiiwale hata khayaakipwantthe. Yaari oottiyamaaru ni yaapaka soonanara waapwaha makholowaaya.’

²⁷Nyuwo mwaaleelaka sootheene iya, awosa kheewiiwani; nyuwo mwaawiitthanaka, awosa kheewaakhulani.

²⁸Vano mwaaleele: ‘Ola ti muloko ohimmwiiwelela Yave Mulukwaaya naari ohintthuna wookoleliwa. Ekhaikhai yoophwateya, enalakaseya mmwaanomwaya.

²⁹Mmetthe mayihaanyu ni murihe; mulalamike mmattumuxani oothaamiwa, niwoko Yave oohiya ni ookhootta ekhapira ela entannya isarasawe.

³⁰Muloko wa oYuda woopaka soonanara vamaithoniwaka, onghima Yave. Wookhaliha milukusaya sa mwiikho Mpaani erino Nsinanaka oveihaka yeeyo.

³¹Wookhaliha mapuro ootteeliheriwa miluku sikina sa oTofete vanreyareyani na Beni-Hinomi weera yaahise anamwanaaya asilopwana ni asithiyana — etthu Miyo kihitonkwaaka olamulela hata kahuupuwenlaaka.

³²Vano mwiipasoope, anoophiyera mahuku, onghima Yave, nipuro nno nneeraaya nihiitthaniwetho oTofeti hoye hoye Nreyareya na Beni-Hinomi, mene Nreyareya na Noomala niwoko awosa anoovithawo mittembo mpaka ohiphwanyaneya nipuro.

³³Vano mittembo sa atthweene yaawo sinoociwa ni ipalame sa wiirimu ni axinama a nthupini ni kheekhalaru oowoomolela.

³⁴Kinoomalamaliha okhuwela wa ohakalala ni otteeliwa murima nitho masu a namatthomeriwa ni namatthomera mmittettheni sa oYuda ni mmiseweni sa oYerusaleemu, niwoko elapo ela enooheleya mathala.’”