Read Makhuwa-Shirima Yeremiya 8 Bible Online

Yeremiya 8 - Makhuwa-Shirima bible

Yeremiya 8

¹“ ‘Ehuhuweene yeeyo, onghima Yave, makhuva a mamwene ni asitokweene a oYuda ni makhuva a asaserdoti* ni maprofeeti ni makhuva a amaki a oYerusaleemu anookhumihiwa mmahiyenimwaya.

²Anookhala vanlakani yoopeliweke nsuwa, ni yaareliweke mweeri ni ithenyeri sa wiirimu mwa seiyo awosa yaasivelaaya ni yaarumeelaaya ni mwa seiyo yaattharaaya, yaakokhorelaaya ni yaattottopelaaya. Makhuveene yaawo kheethukumanyihiwa hata kheevithiwa, mene eniikhale ntoko ikokhola vatthayani.

³Ootheene ahalahanle a muloko owo anoothanla wiiviwa ohiya okhala ni okumi mmapuroni ootheene mwa weiwo kineeraaka kiwoomolele, onghima Yave a ikuru sootheene.’”

⁴“Mwaaleele: ‘Yave oneera ha: Atthu yaamoraka, khaamvenyatho? Mukina ahapuwa, khanghokoleelamotho?

⁵Vanonto heeni muloko ola ohapungwaaya? Heeni oYerusaleemu ompwahereraaya opahuwa? Amakaaya aavarexexa olokottha, ekhoottaka ohokolowa.

⁶Kohoonexexa nnenesene, mene awosa khaanghima ya ekhaikhai. Khawoworu onrukunxa murimaawe eeraka: “Kipankeni?” Khula mutthu a yaawo ontthara ephirowaawe muneenaawe ntoko ekavalu* eniivonyeraxa mukhottoni.

⁷Mpaka ntiki onsuwela ihuhu ovaheriwaawe; hiihotho ekhunda, meenkesa ni malooya annoona ihuhu sa othaamawaya, mene mulokwaaka khoosuwenle soonyesereriha sa Yave.

⁸Mungwera hayi weera: “Hiyo asuweli niwoko nookhalano Nlamulo na Yave,” mene vekhaikhai sireene paahi soowootha sa anamalepa atatunxaaya?

⁹Asuweli animuulihiheya muru; animoopopiheya ni anoopharihiwa. Yeenre ekhootta masu a Yave — vano miruku heeni awosa arinaaya?

¹⁰Tivawo kineeraaka kaavaherere axaaraya asilopwana akina ni imattasaya wa atthu akina. Ootheene oosareya ohaawela mihakhu — okhuma asikhaani mpaka asitokweene; maprofeeti nitho asaserdoti* ootheene aneetta moolokotthani.

¹¹Awosa anreherera makhwatta a mulokwaaka ehoonelakamo. Aneera: “Murettele, murettele” ohikhanleru murettele.

¹²Awosa khaanuuliwa muru niwoko na mweettelowaaya wa mwiikho. Awo khaanoonaru wuuliha muru — mpaka kheenaamoraru ekhove. Tivawo eneeraaya emorele variyari wa yaale ammora. Anooyevihiwa Miyo kaattaruxaka, onghima Yave.

¹³Yave onghima: Kinoovurula soohephasaya. Khasihalaru soowiima mmatta mwa iwuuwa. Khasihalarutho soowiima sa nyiri sa efiigu* ni makukhwaaya animuuma. Yeeyo kaavanghaaka animwaakhiwa.’ ”

¹⁴Nikilaathenleni va? Muthukumane! Nitthaweleke isidade soolipihiwa weera nakhwelewo. Yave Mulukwaahu oonithorihela weera niphwatiwe ni oonivaha maahi ooheliwa yoohapala weera niwure niwoko noomutthekela.

¹⁵Nannaweherera murettele, mene khawaarwiiyeru mpuha; nannaweherera ehuhu ya olama, mene oriwo paahi woopiha.

¹⁶Otturuma wa ikavalu* sa amwiittana onimwiiwanyeya okhuma oDani; woowiiwa oruma wa mikhittosaya elapo yootheene enootetereya. Awosa yaarweenle onyaanya elapo ela ni sootheene siri mwemmo, esidade ela ni amakaaya.”

¹⁷“Moone, kinoorumihelani inowa soohapalaxa variyariwanyu mwa seiyo khawowo anaawere wiipela ni iyo sinimoolumani,” onghima Yave.

¹⁸Othanana wookivara; murimaaka woovalavelaxa.

¹⁹Mwiiwe okhuwela wa mulokwaaka mweelaponi ya ottai: “Yave khakhanle oSiyoni? Mwenaaya khamphwanyaneyawo?” Vano Yave aahaakhula: “Heeni awosa atannyalaaya isarasaka ni icaambulosaya ni milukusaya soohimuteko sa anamarwa?“

²⁰“Yoovira ehuhu ya ohepha, yoomala eyiita ni hiyo khanivulungwe.”

²¹Weenre mulokwaaka ovulalihiwa, miyotho koovulalaxa; kinnalamikaxa ni koothananaxa.

²²Khoowowo murette oGileyade? Khawowo meediku? Nihimvolela heeni nikhwatta na mulokwaaka?