Read Makhuwa-Shirima Yeremiya 9 Bible Online

Yeremiya 9 - Makhuwa-Shirima bible

Yeremiya 9

¹Ii! Muruwaaka waari naatuuttu a maahi ni maitwaaka ehime ya maithori! Vano kaamwiinla ohiyu ni othana niwoko na okhwa wa mulokwaaka.

²Ii! Waariwo woophiyerawaka munikareni, weera kihiye mulokwaaka kisusaka mwa yoowo; ootheene awo anamararuwa ni nakupa a anamavariha.

³“Awosa anreherera nluminaya ntoko muupa weera elathele soowootha. Ti soowootha, ehikhanle ekhaikhai sinlamula mweelaponi. Awosa anghelelela opaka sootakhala; awosa khaankisuwela Miyo,” onghima Yave.

⁴“Mwiipasoope ni asinthamwenaanyu; muhaaroromele axunninyu. Niwoko khula munna ti namalokottha ni khula nthamwene ti nawunawu.

⁵Nthamwene onimulokottha mukhwaawe ni khawowo onuuluma ekhaikhai. Awosa anxutteriha malumaaya wootha; aniikhulumula mwa soottheka.

⁶Awosa ankuukelelaxa ohooxa ni olokottha, ehitthunaka okisuwela Miyo,” onghima Yave.

⁷Tivawo Yave a ikuru sootheene oneeraawe ha: “Moone, Miyo kinimwaatteeliha ni kinoowoota murima, niwoko kweewowo etthu ekina kineeraaka kipakele mulokwaaka.

⁸Nluminaya ti muupa woowiiva; anuuluma moota woolokottha. Ni eyano khula mutthu oniixoonihera oosaambwaneya ni mukhwaawe, mene mmurimanimwawe amurehererelaka ntapha.

⁹Kintthuneya waattaruxa niwoko na yeeyo,” onghima Yave. “Kintthuneya wiinlela ikukuttula muloko ntoko ola.”

¹⁰Kinimwiinla, kinimwiikhupanyera ni kinoolalamikela nyaako niwoko na moocihamo weenre othaamiwamo ni khaawowo amviramo. Khooniiwanyeya onyakula wa mihuwo; ipalame sa wiirimu sootthawa ni axinama aalakaseya.

¹¹“Kinootatuxa oYerusaleemu ittuxoru, nipuro ankhalaayawo akhwatte; ni kinoophwata mittetthe sa oYuda weera ehikhale eneera emakewo.”

¹²Taani ori oosuwelaxa weera iiwexexe yeeyo? Taani oxuttihiwe ni Yave anaawere othaliha yeeyo? Heeni elapo eheleiyaaya nthala ni ephwatiwaaya ntoko nikare nihimviriwaru?

¹³Yave eenre: “Ti niwoko awosa ahingyaaya nlamulonaka kaavanghaaka; awosa khaakiiwelenle hata khaatthanre nlamulonaka.

¹⁴Ohiyanawaya, aatthara ettiyamaaru ya mirimasaya; ahaatthara aBahali*, ntoko makholowaaya yaaxuttinghaaya.”

¹⁵Tivawo Yave a ikuru sootheene, Muluku a aYixrayeli oneeraawe ha: “Moone, kinoonyesereriha muloko ola oca sooca soowaawa ni owura maahi ooheliwa yoohapala.

¹⁶Kinimwaamwaraxela variyari wa miloko awosa naari makholowaaya yahaasuwenlaaya ni kinimwaarumihela ekatana mpaka kineeraaka kaaphwate.”

¹⁷Yave a ikuru sootheene oneera ha: “Moonelemo! Ngwiitthane anamwiikhupanyera oothummwa; mulamulele wiitthaniwa yaawosa angweraxa wiinla eriyaraaya.

¹⁸Awosa erwaase woowaakuveya weera enilalamikele mpaka maithwaahu osareya maithori ni maahi okhwalalela mmakwikhwinimwahu.

¹⁹Oruma wa olalamika wohiiwanyeya oSiyoni: ‘Moota niphwatiwaahu! Moota niyevihaxiwaahu! Nintthuneya ohiya elapwaahu niwoko impasahu sooheleya nthala.’”

²⁰Vano asithiyana, mwiiwe masu a Yave; muhuleke maaruwaanyu weera mwiiwe masu a eyanowaawe. Mwaaxuttihe anamwaniinyu asithiyana moota woolalamika; muxuttihane ecipo yoowiikhupanyera.

²¹Okhwa woowela onavolowa muxanelanimwahu ovolowakatho mapurowaahu oolipihiwaxa; wohaamalamaliha anamwane mmiseweni ni amiravo mmapuwani.

²²Mweere: “Yave oneera ha: ‘Mittembo sinookhala ntoko ikokhola vanlakani, ntoko etrigu enghiiwahiiwa ni namahepha, ahikhalaka oothukumanya.’ ”

²³Yave oneera ha: “Namiruku ahiivuwiheno mirukusawe hata nakuru mukurunimwawe naari namapuha moopuhanimwawe.

²⁴Hoye, yoowo ontthuna ovuwiha, avuwiheke ha: mookiiwexexani ni mookisuwelani, niwoko Miyo ti Yave onoonihera murima wooreera, oororomeleya ni a ekhaikhai mweelaponi yootheene. Vano ti mwa itthusene seiya Miyo kinghakalalelaaka,” onghima Yave.

²⁵“Anoophiyera mahuku,” onghima Yave, “Kineeraaka kaattaruxe ootheene yaawo yiineliwe mweerutthuni paahi —

²⁶awExipitu, aYuda, awEdomi, awAmoni, aMowabe ni ootheene ankhala munikareni na ottaiwene. Vano milokosene seiyo sootheene siri soohiineliwa ni mpakatho ekhapira yootheene ya oYixrayeli ti yoohiineliwa mmurimanimwaya.”