Read Makhuwa-Shirima Icipo Soolalamika 1 Bible Online

Icipo Soolalamika 1 - Makhuwa-Shirima bible

Icipo Soolalamika 1

¹Moota eheleiyaaya nthala esidade, khalayi yaari yoosareiya atthu! Moota enlikanaaya ni naamukhweli mwa yeeyo khalayi yaari etokotoko eriyari ya miloko! Khalayi yaari pwiyamwene variyari wa ilapo sootheene, vano yoothatuwa epottha.

²Ohiyu onimwiinlaxa, maithoraaya ankhwalala owiithowaya. Variyari wa oosiveleyaawe ootheene khawoworu onimpembesa. Asinthamwenaawe ootheene aamvariha; aani aathatuwa amwiittanaawe.

³Moothananani ni mmitekoni soonyesereriwa, Yuda ooronghiwa wootthukiwani. Onkhala eriyari ya miloko ahiphwanyaka wiitthuuwa. Yaamuttharelela ootheene yaamvarasa moohaawanimwawe.

⁴Iphiro sinrowa oSiyoni sinlalamika niwoko khaawo anrowa mufestanimwaya soothanliwa. Milakosaya sootheene sooheleya nthala, asaserdotaaya animwiipulela, asimwalaaya anoothanana ni eyo emphwanyaneya moothanananixa.

⁵Awananaawe aathatuwa asitokweenaawe; amwiittaanaawe ahiimaaliha. Yave oomuruuhela othanana niwoko na sootthekasawe sincipale. Anamwanaawe asilopwana aaronghiwa wootthukiwani, anamatthukiwa a awanani.

⁶Waara wootheene woolakaseya osidade ya oSiyoni. Anamwane a mwenaaya ari ntoko anamungoma ahimphwanya yooca; aatthawa emaleliweene ikuru ohoolo wa namattharelela.

⁷Mmahukuni mwa makacamiho ni othanana, oYerusaleemu onuupuwelela itthu sooreerela sincipale waarinaaya mmahukuni avinre. Vano amakaaya amorenlaaya mmatatani mwa amwiittanaaya, khaakhanleru ookhavihera. Amwittanaaya annoona ni anootheya ohaawawaya.

⁸Yerusaleemu ootthekaxa; tivawo othatungwaawe oohitteela. Ootheene yaamuttittimiha, vano aamunyoosa niwoko ahoona etiriyaaya; owo muneenaawe oniipulela ni onaahapuwa yaawosa.

⁹Ohitteelawawe woosareya mukuwoni; eyo khayaaweherera ophiya ommaleloniwaya. Omorawaya waari woowuumiha owanoni; khaawo arwiiye opembesa.”Ii! Yave, moone othananawaka niwoko mwiittana oowina.”

¹⁰Mwiittana onghuhula mihakhusanyu sootheene; owo ohoona miloko sa amalapo sivolowaka vaNipuroniwaya Nootteela* — yaawosa nyuwo mwaakhoottihalaanyu ovolowa mmuthukumanonimwanyu.

¹¹Mulokwaaya wootheene onlalamika orowaka waasa yooca weera okhaleno okumi; onceendya mihakhusaya ni sooca. “Moone Yave, ni moonelemo, niwoko kooramusiwa.”

¹²“Ootheene nyuwo mumvira va, murwe moone moota kihaawiyaaka! Eyo khamumpwatthela? Khoowoworu ovoreya onlikana ovoreya wu okitannyenraawe Yave vanihukuni aakinyoonyeringwaawe.

¹³Ari osulu, oorumiha mooro ovolongwe mmakhuvanimwaka; ooreya muraakho inaawosaka onakimoroxela vathi; ookihiya oophwateyeene ni oohihakalala mahuku ootheene.

¹⁴Owo ookipakela yoolemela ni matataawe avarelaka muteko sootakhalasaka sootheene anakiwariha muxiko; Yave oomaliha ikurusaka anakinnyerera mwa amwiittana, mwa yaawo kihingweraaka waawina.

¹⁵Yave ohaamwaraxa anakhotto ootheene yaakikhavihera; ookirumihela anakhotto weera yaaphwate amiravowaaka. Yave oomunyikalela mwali oowiikosoopa wanaameliwa iwuuva*, eyo tiiyo esidade ya oYuda.

¹⁶Tivawo miyo kiniinlaaka; mmaithonimwaka esareiyeene maithori. Khawoworu onkaattamela weera akipembese, khawoworu onreherera okumaaka. Anamwanaaka khaanonoru oowaakosoopa, niwoko mwiittana oopwaherera owina.”

¹⁷“Siyoni ontheteya nyoono adyoonttelelaka, mene khawoworu onimpembesa. Yave oolamulela weera amwaattamana a Yakobe ethatuwase amwiittanaawe; Yerusaleemu oothatuwa etthu yoohitteela eriyaraaya.

¹⁸Yave ti oororomeleya, vaheera miyo koovaanya olamulenlaawe. Nyuwosa miloko sootheene mwiiwe; ngwehe ohaawawaka. Amiravowaaka ni asimwalaaka aaronghiwa wootthukiwani.

¹⁹Kaawiitthana yaawo kiiraanannaaka, mene awosa aakivariha. Asaserdotaaka ni ahoolelaaka aakhwela musidade yaasaasaka yooca weera ewere okhalano okumi.

²⁰Yave, moone moota kithanannaaka! Koohooxeya mpuwa wa murimaaka ni kooriipiwa murima niwoko kootepaxa ovaanya. Mmuseweni, ootheene annyaanyiwa ni ekatana; mpuwa ori okhwa paahi.

²¹Olalamikawaka wohiiwanyeya, mene khawoworu onkipembesa. Amwiittanaaka ootheene aasuwela othananawaka; awosa anghakalalela yeeyo mpankaanyu. Ii! Nyuwo fataari muruuhe nihuku mulaleiyaanyu weera awosa ethatuweke ntoko miyo!

²²Yootakhalaayasa esuweliwe ohoolowanyu; mwaapakelase yaawo yeeyo mukipakenlaanyu niwoko na sootthekasaka sootheene. Wiipulelawaka wootepaxa ni murimaaka onnakomoka.”