Read Makhuwa-Shirima Icipo Soolalamika 3 Bible Online

Icipo Soolalamika 3 - Makhuwa-Shirima bible

Icipo Soolalamika 3

¹Miyo ti mutthu oonne makacamiho aruuhiwe ni ekopo ya isarasawe.

²Yave ookoomola, anakeettiha mpiphini, ohikhanle ngwaarani;

³vekhaikhai ntatanawe khaninkihiyaru hata vakhaani imaara imaarasene.

⁴Oopakiha weera exapalaaka ni erutthwaaka yuuluvale, ni oopwexa makhuvaaka.

⁵Owo ookirica, ookipakela yookuttelela yoowaawa ni yoovoreya.

⁶Ookimakiha mpiphini ntoko yaale akhwiiye khalayi.

⁷Ookirica ni ixiri, ni nkingwera woopowa; ookitthukaxa ni onyooro.

⁸Naari kiitthanaka hoye hoye kikhuwelelaka ekhavihero, Owo onookhootta mavekelowaaka.

⁹Ookuttelela ni maluku kimviraakamo, anakeettiha mphironi mootapanyeya.

¹⁰Ntoko ursu* athurumelaka, aani ntoko mwatto iipintheene ntuphini,

¹¹ookikhumiha mphironimwaka anakinyaanya akihiyaka oothaamiweene.

¹²Ooreherera muuraawe, anakikhaliha yoolatha nyuupasawe.

¹³Oolatha murimaaka ni nyuupa sa munrupanimwawe.

¹⁴Koothatuwa mutheelelo wa mulokwaaka; muciponimwaya ankitheya miyo mahuku ootheene.

¹⁵Ookivoniha ni makukhu oonyuunya, anakiwuriha wamwa.

¹⁶Ookhula mainowaaka ni maluku; ookinyikalela vantthupini.

¹⁷Ookaakha murettele; koottiwala weetteleya nnene.

¹⁸Tivawo kineeraaka: “Waarawaka woolakaseya nitho sootheene miyo kaawehereraaka wa Yave.”

¹⁹Kinuupuwelela ohaawawaka ni othananawaka, onlikana ni wamwa ni yoohapala.

²⁰Kinnuupuwelela nnenesene sootheene iyo, ni munepaaka ooriipiweene mpuwamwaka.

²¹Wa soothesene, yeeyo kinuupuwelelaaka ni kingwehereraaka ti ela:

²²Niwoko na murimaawe wooreera Yave, nlelo khoomanle, weenre osivelawawe ohooceeleyaka.

²³Ti onyowani khula oxeexelo; ororomeleyawawe ti otokotoko.

²⁴Kiniixeerela: Ettimaaka ti Yave; tivawo, mwa Yoowo kinoohela owehererawaka.

²⁵Yave ti ooreera wa yaale owehererawaya ori mwa Yoowo, aani yaale ammwaasa;

²⁶ti wooreera oweherera oomaaleleyeene wa ovuluxa wa Yave.

²⁷Ti wooreera mutthu ovilela soonyesereriha nlelo areene mmiravo.

²⁸Owo aakilaathi meekhaawe oomaaleene, niwoko Yave oomwiikaathera.

²⁹Uupuruxe ekhovaawe vantthupini; apaale onuukhale oweherera.

³⁰Ahinghuluwe yoowo ontthuna ommana, ni aakhele onyemulawawe.

³¹Vano Yave khanaakhootta atthu mahuku ootheene.

³²Naari Owo aruuhaka othanana, onimoonihera ikharari niwoko na osivelawawe otokotoko woohooceeleya.

³³Vano Owo khoonimusivela waahasula anamwane a atthu.

³⁴Atthu yaanyakatta ni inaawo anamatthukiwa ootheene a mulaponi,

³⁵ni yaamukhoottiha mukina soophwanelasawe vamaithoni wa Muluku a musulusulu;

³⁶ni yaakhootta ekhaikhai, vano, vekhaikhai Yave onoona yeeyo!

³⁷Taani anaawere wuuluma ni okhumeleliha Yave ahilamulenle?

³⁸Ti wa eyano ya Musulusulu sinrweelaaya irisa ni mareeliho.

³⁹Ongwereya hai mutthu okhupanya attaruxeliwaka sootthekasawe?

⁴⁰Niwehawehe nnenesene mweettelowaahu, vahoolowaya nihokoleeleke wa Yave.

⁴¹Nivekele ni murima wootheene, nitheteelaka nyoono wa Muluku a wiirimu.

⁴²“Noottheka ni noovaanya, vano Nyuwo khamunilevelenle.

⁴³Nyuwo mohiisariha isara munanittharelela, moonihonona woohinimorela ikharari.

⁴⁴Mohiixiipithiha wiithela nihutte weera muhiiweru nakhalaru nivekelonahu.

⁴⁵Moonitatuxa nsala ni ikokhola eriyari ya miloko.

⁴⁶Amwiittanaahu ootheene annaathamela hiyo.

⁴⁷Ninghaawa woova ni mirakho, oheleya nthala ni ophwatiwa.”

⁴⁸Owiithowaka aasareya maithori niwoko mulokwaaka woophwatiwa.

⁴⁹Maithwaaka aniinla woohihiyerera, woohiitthuuwaru,

⁵⁰mpaka Yave ari wiirimu, awehe ni oone!

⁵¹Ankivoreya maitho koonaka yeeyo yaakhumelenle asithiyana a esidadaaka.

⁵²Yaale yaari amwiittanaaka woohinthowa yaakilupattha ntoko mwaapalame.

⁵³Yaasaasa okiivela mulittini, enakivonya maluku;

⁵⁴kaamireya mmaahini, mpaka kaahuupuwela weera ommaleloniwaka woophiya.

⁵⁵Moowiixera mwa nlitti kaahiitthana Nsinananyu Yave.

⁵⁶Nyuwo mohiiwa okhuwelawaka: “Muhiwale maaruwaanyu kaakhuwelelaka ekhavihero.”

⁵⁷Nyuwo mwaakaattamela kookhuwelenlaakani, muneera: “Muhoove.”

⁵⁸Ii! Yave, Nyuwo mohaakiha nthowanaka; ni mohoopola okumaaka.

⁵⁹Mohoona ohasuliwawaka woohinthowa, Yave; mwaakihe mulattwaaka.

⁶⁰Nyuwo mohoona moota soopinghaaya ikukuttulasaya, miraakho sootheene akireiyaaya.

⁶¹Ii! Yave, mohiiwa oruwanawaya, miraakho sootheene akireiyaaya,

⁶²yeeyo amwiittanaaka anaapaaya, ekikhupanyaka ehuhu yootheene.

⁶³Mwaawehase! Ekilaantheene hoye hoye yeemenleene, ankitthebwa miyo ni iciposaya.

⁶⁴Yave, mwaavahe yeeyo amphwanelaaya, niwoko na yeeyo apankaaya matataaya.

⁶⁵Muumihe mirimasaya, ni nlaphonanyu nikhale vasuluwaya.

⁶⁶Mwaattharelelase moonyoonyiwani ni mwaamalamalihe vathi wa wiirimuwanyu, Yave.