Read Makhuwa-Shirima Icipo Soolalamika 4 Bible Online

Icipo Soolalamika 4 - Makhuwa-Shirima bible

Icipo Soolalamika 4

¹Moota ehingyaaya waara eyuuma yoorikaxa! Moota ehingyaaya ottittikala eyuuma yoorikaxa yooreerela! Maluku oowaaraxa aamwaraxeliwa mmathakalaano a misewe.

²Anamwane asilopwana oottittimiheya a oSiyoni, khalayi yooneleyamo ntoko eyuuma yoorikaxa, olelo anooneliwa ntoko iyoopwe, muteko wa matata a namoopa!

³Mpaka akhwatte anaavaha mapele anamwanaaya weera ewaamwihe, mene mulokwaaka khoononotho murima; ori ntoko makhakandore a munikareni.

⁴Nlumi na anamwane noovolaxiwa ntthona nootthukana waahottokoroko; anamwane andyoonttelela yooca, mene khaawo onaavaha.

⁵Yaale yaakhovelenle oca yooca yooreerela, anghaawela mmiseweni. Yaale yiiphwaneliha ni ikuwo sa kanka olelo anuupuruwa mukokholani.

⁶Ottaruxiwa wa mulokwaaka wootepaxa opwaha wa oSodoma, waaphwatiwa ehuhu emoharu woohikhala ookhaviherawo.

⁷Anamwane asilopwana a mamwenaaya yaari oowaara opwaha etthapwe, ootteelaxa opwaha mukaka; exapalaaya yaari yooxeera opwaha erubi*; ni ekhalelowaaya yaari yakanka opwaha maluku a safira*.

⁸Vaheera vano aariipaxa opwaha makhala; khaansuwanyeya mmiseweni, exapalaaya yohuumelela mmakhuvanimwaya; yaathatuwa ntoko ephandi yoowuumaxa.

⁹Fataari yaale yiiviwe ni ekatana ohikhanle okhwa etala; awosa ankomoka oowoondeene, niwoko soowiima sa mmatta sohaathowa.

¹⁰Asithiyana annene aawaapeya anamwanaaya asilopwana ni matataaya, athatungwe yoocaaya, mulokwaaka waaphwatiwaaya.

¹¹Yave ohoonihera moota woomalela isarasawe; ooyeeha onyoonyaxiwawawe woowoopiha. Owo oopattiha oSiyoni mooro olalinghe mathipelowaaya.

¹²Mamwene a mulaponi ni miloko sa elapo ya vathi yootheene khayaakhulela weera amwiittana ni awanani yaangwera ovoleela mmilakoni sa oYerusaleemu.

¹³Vaheera yeereiye niwoko na yoottheka ya maprofeetaaya ni sootakhala sa asaserdotaaya mwa yaawo yaayeeha ephome ya oororomeleya musidade.

¹⁴Olelo, awosa anxoraxora mmiseweni ntoko oohoona. Erampeene ephome, khaawo aneera eerere otava soowarasaya.

¹⁵“Mususeke! Nyuwosa khamutteenle!” muloko onaakhuwelelasa yaawosa! “Mususe, muhinitave!” Awosa yaatthawaka ni yeettaka oothweeleleene, miloko sa ilapo sikina sineera: “Awosa ehimakase va.”

¹⁶Yave muneenaawe ohaamwaraxasa; Owo khanaakosoopasatho. Khawoworu onaattittimiha asaserdoti* hata ahooleli.

¹⁷Maithwaahu aakhulumuwa waasaasa ekhavihero vasiiyoniwene; naaweherera mmatoorenimwahu* muloko wahaawera onivuluxa.

¹⁸Khula malipaahu nannawehawehiwa; khanaaweraru weetta mmisewenimwahu. Waakhuveela ommaleloni, mahukwaahu yaanimalela, niwoko waaphiyera ommaleloniwahu.

¹⁹Anamattharattharaahu yaari oowaaluwa waapwaha axaaka a wiirimu; yaanittharelela mmanyaakoni, yaaniweherera munikareni.

²⁰Oottikittheliwa a Yave, ngwiya xaxaxa wa okumaahu woopharihiwa mmiraakhonimwaya. Hiyo nuupuwela weera mwa okhapelelawawe naamukhala eriyari ya miloko.

²¹Muhakalale, mwaana muthiyana a Edomi, munkhala mulaponi ya wUzi. Vaheera munoowuratho ekoomixi yoowaawa ya nttaruxo eneera yoohapaliheni yoohiyakani pwitipwiti.

²²Ii! Esidade ya oSiyoni, nttaruxonanyu nnoomala; Yave khapwahereriha oroihiwawanyu wootthukiwani. Vaheera, ii! Nyuwo mwaana muthiyana a Edomi, Owo onoottaruxa yootthekaanyu ni onimoonihera yootakhalaanyu.