Read Makhuwa-Shirima Icipo Soolalamika 5 Bible Online

Icipo Soolalamika 5 - Makhuwa-Shirima bible

Icipo Soolalamika 5

¹Muupuwelele Yave yeeyo enikhumelenle; ngwehe ni moone wuulihiheyawahu muru.

²Yoohiyeriwaahu ahinnyereriwa amalapo, impasahu ahinnyereriwa anamarwa.

³Nri akwaasuni a wuutiithini, asimayihu ari ntoko asinaamukhweli.

⁴Ontthuneya othuma maahi oowura; ikhuunisahu nnimweera othuma.

⁵Yaawo annittharelela aanikhuveelaxa; nookhulumuwa ni khanimphwanya wiitthuuwa.

⁶Nohiixinnyerera wExipitu ni wAsiriya weera niphwanye yooca.

⁷Asitithihu yaattheka ni khaawowotho ni hiyo ninttaruxeliwa sootthekasaya.

⁸Ninlamuliwa ni ipottha, ni khawoworu oonitapuxa mmatatanimwaya.

⁹Nimphwanya yooca nilevaka okumaahu, niwananiwaka ni ekatana ya munikareni.

¹⁰Exapalaahu yooviha ntoko ttukuttha, yoovihereya evolaxiweene etala.

¹¹Asithiyana ampuherasiwa oSiyoni, ni aximwali oowiikosoopa ampuheriwa mmasidadeni sa oYuda.

¹²Ahooleli aathomeiwa ni matataaya; mamookwaaxa khaanooniheriwa nttittimiho.

¹³Asimiravo amvaraxa muteko mmaxiloni; asinamwane amveveleya yiireiyeene mavisi a ikhuuni.

¹⁴Ahooleli khaanthukumana mmilakoni sa esidade; amiravo aahiya wiipawaya.

¹⁵Mmurimanimwahu khoowowo ohakalala; wiinawahu woothatuwa olalamika.

¹⁶Ecireemba yoomora mmurumwahu. Ii! Wa hiyo, niwoko noottheka!

¹⁷Tivawo murimaahu onkomokaaya, ni maithwaahu ahinceremelaaya.

¹⁸Yeereenle hiiho niwoko mwaako Siyoni wooheleya nthala ni akhwatte aneetteetta mwemmo.

¹⁹Nyuwo, Yave, munlamula wa mahuku ootheene; ehicaanyu ya emwene empwaherera wa ekhapira ni ekhapira.

²⁰Vano munnittiwalelani mahuku ootheene? Munnithaamelani mweehuhuni yincipale?

²¹Munironghe wa Nyuwo Yave, weera nihokolowe; mureherere mahukwaahu ntoko a khalayi,

²²waahikhanle weera moonikhootta woomalela ni onipattiherawanyu isara soohimala!