Read Makhuwa-Shirima Ezekiyeli 1 Bible Online

Ezekiyeli 1 - Makhuwa-Shirima bible

Ezekiyeli 1

¹Vanihukuni nanaathanu na mweeri wanaaxexe wa eyaakha yanaamiloko miraru, ni miyo kireene eriyari ya anamatthukiwa muxerexere mooloko Kebari, yaahuleya erimu ni miyo kaahoona nyoonelo sa Muluku.

²Yaari eyaakha yanaathanu ya oronghiwa wootthukiwani wa mwene Yehoyakini, vanihukuni nanaathanu na mweeri wanaaxexe.

³Yave aahuuluma ni musaserdoti* Ezekiyeli, mwaana mulopwana a Buzi, muxerexere mooloko Kebari, mulaponi mwa aBabiloniya. Iwe, ntata na Yave naari mwa yoowo.

⁴Kaaweha kinoona ettheku yaarweela mpatta wa ottuttuwani — nihutte ntokotoko ni overinya wooceremela nirukureeriweene ni waara wootutha. Eriyari ya mooro yaalikana ni eyuuma yooweera mangani,

⁵ni mmooroni owo saakhala ikhalelo ixexe sa okumi. Ekhalelowaaya yaari ntoko ya mutthu,

⁶vaheera khula ekhalelo ya seiyo yaakhalano ikhove ixexe ni maphupha maxexe.

⁷Nyettosaya saari soowookowa; inaawosaya saari ntoko sa mwaamombe ni saacapeya ntoko ebronze* yoohaniwa.

⁸Waamapuphawaya, mipatta soomixexe, iyo saakhalano matata ntoko a atthu. Sooxeexe iyo saakhalano ikhove ni mapupha,

⁹ni mapuphaaya yaamukumanela. Yaaramaramaaya, yaakela ohoolo ni khayaarukunuwa.

¹⁰Ohoolowaya, khula ekhalelo yaakhalano ekhove enlikana ya mutthu, moono woolopwana ekhove ya mwatto, moono woothiyana ekhove ya emombe, ni ottuliwaya ya xaaka.

¹¹Ikhovesaya saari hiiho. Mapuphaaya yaakungeela osulu; khula ekhalelo yaakhalano mapupha meeli yaakumanela ni ekhalelo ekina, okhuma mpatta mmoha ni mukina, ni mapupha meeli yaakuttelela irutthusaya.

¹²Khula ekhalelo ya seiye, yaarowa muhoolo paahi. Mapuro ootheene Munepa waatthunaaya orowa, iyo saamurowatho; saaramaramaaya, khayaarukunuwaru.

¹³Ikhalelo iyo saalikana ni makhala a mooro; saari ntoko mithuko. Mooro waarowa ninno ninno eriyari ya ikhalelo sa okumi, mmooroni mmwe waamverinya ni ottetthereya.

¹⁴Ikhalelo sa okumi iye saarowa, sinarwa woowaakuveyaxa ntoko overinya.

¹⁵Miyo kaawehaaka, kaahoona nreko vatthayani muxerexere wa khula emoha ya seiyo, nreko nimoha wa khula ekhalelo eyo.

¹⁶Ekhalelowaaya ni olikanawaya nreko waari ha: Mareko awo yaaceremela ntoko krisolito*; ooxeexe yaamulikana. Khula nreko naakhala ntoko naarino nreko nikina mpuwamwaya.

¹⁷Ikhalelosene seiyo saaramaramaaya, saakela wakhalaru mpatta wa ikhove ixexe, ni saarowaaya, mareko khayaarukunuwaru.

¹⁸Maviiraaya yaari oorakamela ni oowuumiha owanoni ni yaasareya maitho mukhwipimwaya.

¹⁹Ikhalelo sa okumi saaramaramaaya, mareko a mukhwipimwaya yaamuramaramatho; ikhalelo saattukhuwaaya, marekotho, yaamuttukhuwa.

²⁰Weiwo Munepa waatthuneyaaya orowa, ikhalelo sa okumi iyo saamurowawo, ni mareko yaamutthara, niwoko Munepeene yoowo waari mwa mareko awo.

²¹Ikhalelo iye sa okumi saaramaramaaya, awotho yaamuramarama; iye sahaaramaramaaya, awotho khayaaramarama; ikhalelo sa okumi saattukhuwaaya, marekotho yaamuttukhuwano, niwoko Munepaayeene yoowo waari mwa yaawo.

²²Vasulu wa nyuru sa ikhalelo sa okumi yaakhala etthu yaalikana ni erimu, yooceremela ntoko maahi oowoopaana, ni yaari yoowuumiha owanoni.

²³Vathi wa erimu, mapupha meeli a khula ekhalelo yaakungeeleya yeeyo yaakhuveelannaaya, ni mapupha meeli makinaawo yaakuttelela erutthu.

²⁴Saaramaramaaya, kaahiiwa oruma wa mapuphaaya, waalikana ni oruma wa maahi mancipale, ntoko nsu na Muluku a ikuru sootheene. Waari oruma ntoko okhuwela wa anakhotto ancipalexa. Seemelaaya, saangwala mapuphaaya.

²⁵Vano naahoorwa nsu nikhumaka wiirimu, iyo siwanleene mapuphaaya.

²⁶Vasulu wa erimu yaari mmurumwaya, yaakhala etthu yaalikana ni ehice ya safira* ni yoorakamelaxa, vahiceni, yaakhala ekhalelo yaalikana ni mutthu.

²⁷Kaahoona weera mpatta wa osulu okhuma muyuununi mpaka waamuru waari ntoko eyuuma yoowaara, aani ntoko yoosareya mooro, ni mpatta wa vathi wa yeeyo waalikana ni mooro; waaraxa waamurica.

²⁸Mooteene yoowo saakhalaaya nyoota sa nyuura mmahutteni vanihukuni na epula, hiihotho ovuwaxa waamurukureera Yoowo. Ti moota ola koonnaaka ekhalelo ya ovuwaxa wa Yave. Woowoona sootheene iyo, kaamora ni wiipopheya, kiniiwa nsu na mukina akuulumanaka.