Read Makhuwa-Shirima Ezekiyeli 10 Bible Online

Ezekiyeli 10 - Makhuwa-Shirima bible

Ezekiyeli 10

¹Kaaweha, kinoona etthu yaalikana ni ehice ya safira* yaari vasulu wa nipatho naari mmuru wa akerubini*.

²Yave aamweerela mulopwana aawanre sa eliinyu*: “Murowe eriyari ya mareko vathi wa akerubini*. Musarihe mmatatani makhala a mooro muneeraanyu mwakuxe eriyari ya akerubini* ni mwamwaraxele musidadeni.” Vano owo aarowa miyo kingwehaka.

³Vano akerubini* yaari mpatta wa ohitto wa Empa ya Yave mulopwana aavolowaawe, ni nihutte naasareya vanipuwani na mpuwa.

⁴Hiiho ovuwa wa Yave waakhumelela vasulu akerubini*, onasuseerela vamulako wa Empa ya Yave. Nihutte naasareya Empa ya Muluku ni nipuwa naasareya waara wa ovuwa wa Yave.

⁵Oruma wa mapupha a akerubini* waamwiiwanyeya mpaka vanipuwani na omokoni, ntoko wiiwanyeya wa oruma wa Muluku a ikuru sootheene, Owo uulumaka.

⁶Yave aamulamulenlaawe mulopwana aawanre sa eliinyu*: “Mukuxe mooro ori eriyari ya mareko ni ya akerubini*,” mulopwana ole aarowa aneemela muxerexere nreko.

⁷Vano mmoha a akerubini* aahookola moono mmooroni waari eriyaraaya. Aattotta makhala makina a mooro ole, anahela mmatatani mwa mulopwana aawanre sa eliinyu* mwa yoowo aakhenle, anavenya.

⁸Waamapupha a akerubini* yaamooneya etthu yaalikana ni matata a mutthu.

⁹Kaaweha, kinoona muxerexere akerubini* mareko maxexe, nreko nimoha muxerexere mwa khula akerubini*; mareko yaaceremela ntoko krisolito*.

¹⁰Ekhalelowaaya mareko yaamulikana, ni khula nreko naakhala ntoko naarino nreko nikina mpuwamwaya.

¹¹Yeettaaya, yaarowa wakhalaru mpatta yaakelaaya akerubini*; akerubini* yaaramaramaaya, mareko khayaarukunuwaru. Awo yaarowa wakhalaru mpatta wa ohoolowaya ehirukunuwakaru.

¹²Irutthusaya sootheene ni ottuliwene, matata ni mapupha, yaasareya maitho ni hiihotho marekwaayeene ootheene.

¹³Wa mareko kaawiiwa yiitthanelaka “mareko oorukureera.”

¹⁴Khula kerubini* aakhalano ikhove ixexe — ekhove yoopacera yaari ya kerubini*, yanaaveeli ya mutthu, yanaararu ya mwatto ni yanaaxexe ya xaaka.

¹⁵Vano akerubini* yaahiittukhula. Saari ikhalelosene seiye sa okumi koonnaaka muxerexere mooloko Kebari.

¹⁶Akerubini* yaaramaramaaya, mareko a mukhwipimwaya yaamuramaramatho; vano akerubini* yaakungaaya mapupha weera yiittukhule, marekotho yaamurowano.

¹⁷Akerubini* yahaaramaramaaya, awotho khayaaramarama; vaheera akerubini* yiittukhulaaya, mareko awo yaamwiittukhulatho niwoko munepa wa ikhalelo sa okumi iye waakhalamo.

¹⁸Vano ovuwa wa Yave waasusa vamulako wa Empa ya Yave, oneemela vasulu wa akerubini*.

¹⁹Miyo kaawehaka hiihaale, akerubini* yaakunga mapupha eniittukhula, ni mareko yaarowano. Awosa yaaheemela vamulako ori mpatta ninkhuma nsuwa wa Empa ya Yave ni ovuwa wa Muluku a oYixrayeli, waari vasulu wa yaawosa.

²⁰Ikhalelo sa okumi iye ti seiyeene koonnaaka vathi wa Muluku a oYixrayeli, muxerexere mooloko Kebari. Kaahoonelela weera alesa yaari akerubini*.

²¹Khula kerubini* aakhalano ikhove ixexe ni mapupha maxexe, ni waamapuphawaya yaakhala etthu yaalikana ni matata a mutthu.

²²Ikhovesaya saalikana seiyo miyo koonnaaka muxerexere mooloko Kebari. Ootheene yaarowa paahi ohoolo.