Read Makhuwa-Shirima Ezekiyeli 12 Bible Online

Ezekiyeli 12 - Makhuwa-Shirima bible

Ezekiyeli 12

¹Yave aahuuluma ni miyo moota ola:

²“Mwaana a mutthu, nyuwo munkhala eriyari ya muloko woovaanya. Awosa aakhalano maitho oowoonela, mene kaanoona, ni maaru oowiiwela, mene khaaniiwa, niwoko ari anamavaanya.

³Vanonto, mwaana a mutthu, mutthukatthuke mirindisanyu soorowano wootthukiwani moothanani ootheene yoonaka, muttimuleke ni muroweke nipuro nikina. Awosa arookhalaru muloko woovaanya, apaale eniyiiwexexe.

⁴Moothanani, muloko woonaka, mukhumihere vaate seiyo siri sawinyu sootthukatthukiwasene soorowano wootthukiwani. Vano moohiyuni, awosa yoonaka, murowe ntoko munronghiwa wootthukiwani elapo ekina.

⁵Awosa yoonaka, mpake nlaka vaxirini ni mvirihekewo mirindisanyu.

⁶Muthateleke iyo muloko woonaka ni mukuxeke oxekuwaka. Mukuttelele ekhove weera muhooneru mulaponi, niwoko Miyo kohoopakani eneneero wa muloko wa oYixrayeli.”

⁷Vano miyo kaapaka yeeyo kaalamuleliwaaka. Moothanani, kaakhumihera vaate itthusaka sitthukatthukiweene soorowano wootthukiwani. Vahoolowaya, wiilaka, kaahula nlaka vaxirini ni matataaka. Wiilaka kaakhuma ni mirindisaka kithatenleene, ootheene yoonaka.

⁸Oxeexelo, kaahaakhela masu a Yave ala:

⁹“Mwaana a mutthu, muloko woovaanya ole wa oYixrayeli wohookohani: ‘Mumpakani?’

¹⁰Mwaaleele weera Yave onlamula sootheene oneera ha: Mutthenga ola ti mwaha wa mutokweene a oYerusaleemu ni muloko wootheene wa oYixrayeli ori weiwo.

¹¹Mwaaleele ha: ‘Miyo kiri eneneero wa nyuwo.’ Mooteene yoowo kipankaaka, munoopakeliwatho hiiho. Awosa anoorowa wootthukiwani mulaponi ekina ntoko anamatthukiwa.

¹²Mutokweenaaya anaathatele murindaawe wiilaka, aphutuweleke vanlakani nihuliwe vaxirini weera owo avirewo. Owo anaakuttelele ekhove weera ahooneru elapo.

¹³Kinoomureya ntthavinaka ni owo onoopharihiwa munraakhonimwaka; Miyo kinoomurongha oBabiloniya, mulaponi mwa aKaldeya, mene owo khoona ni onookhwelawo.

¹⁴Ootheene ari mukhwipimwawe kinimwaamwaraxela mpheyoni — asitokweenaawe ni anakhottwaawe ootheene, kaatthareleleke kivarenleene ekatana.

¹⁵Miyo kaamwaraxelaka eriyari ya miloko ni awosa yaamwareelaka mulaponi, anoosuwela weera Miyo ti Yave.

¹⁶Vaheera kinoowuurela akina akina a yaawosa mwa ekatana, etala ni mwa nihooxo weera mmilokoni eneeraaya eroweru, yalape mitekosaya sootheene soohiira. Hiiho anoosuwela weera Miyo ti Yave.”

¹⁷Yave aahuuluma ni miyo eeraka:

¹⁸“Mwaana a mutthu, muthukumele mwaacaaka yoocaanyu, aani muthukumelaxe ni woova mwaawuraka maahaanyu.

¹⁹Mweerele muloko wa mulaponi weera Yave onlamula sootheene oneera ha mwaha wa yaale ankhala oYerusaleemu ni oYixrayeli: ‘Awosa animooca yoocaaya moohaawelani ni anoowura maahaaya moohiwehererani, niwoko sootheene siri mulaponimwaya animwaakhiwamo mwaha wa nipuhero na yaawo ankhalamo.

²⁰Isidade simakingwe sinoophwatiwa ni elapo enoothaamiwa. Hiiho nyuwosa munoosuwela weera Miyo ti Yave.’”

²¹Yave, aakeerelatho:

²²“Mwaana a mutthu, nxiripulo heeni nna nyuwosa murinaanyu oYixrayeli nneera: ‘Mahuku amvira ni nyoonelo sootheene khasivareleya muteko.’

²³Vano mwaaleele: ‘Yave oneera ha: Kinoomaliha niphwanaphwaniho nna ni khanuulummwatho oYixrayeli.’ Mwaaleeletho ha: ‘Eneera ekhuveelaka mahuku sineeraaya sikwaniheriwe nyoonelo sootheene.

²⁴Vano khasikhalatho nyoonelo soowootha hoye hoye sootthoma soolokottha eriyari ya muloko wa oYixrayeli.

²⁵Vaheera Miyo Yave, kinimuuluma yakhalaru kintthunaaka ni ohilekenleene, eyo enookwanihereya. Ii! Muloko woovaanya, mmahukunimwaya kinookwanihera sootheene kineeraaka kihime, onghima Yave onlamula sootheene.’ ”

²⁶Yave aahuuluma ni miyo moota ola:

²⁷“Mwaana a mutthu, muloko wa oYixrayeli oneera ha: ‘Moonelo owo onoonaawe oniweereye muhoolommo, ni owo onthalihera otthuna wa Muluku mwaha wa sa muhooloxa.’

²⁸Vano mwaaleelase weera Yave onlamula sootheene oneera ha: ‘Khaawoworu maswaaka eniipisetho weereya; sootheene kineeraaka kihime, sinookwanihereya, onghima Yave onlamula sootheene.’ ”