Read Makhuwa-Shirima Ezekiyeli 14 Bible Online

Ezekiyeli 14 - Makhuwa-Shirima bible

Ezekiyeli 14

¹Asitokweene akina akina a oYixrayeli yaahoorwa okilaathi ohoolowaka.

²Vano Yave aakeerela:

³“Mwaana a mutthu, atthu ala aheemexa miluku mmirimanimwaya, yiikaatheraka sookwattula sootakhala vamaithoniwaya xaxaxa. Heeni kintthuneyaaka waatthunihera okaasa?

⁴Vano, muulume ni yaawo ni mwaaleele: ‘Yave onlamula sootheene oneera ha: Akhalaru muYixrayeli aneemexe miluku sikina vamurimanivawe, aniikaathi sookwattula sootakhala vamaithoniwawe xaxaxa, ni vahoolowaya anaarowe omukoherera mprofeeti, Miyo Yave, Yoomeene kinoomwaakhula moota omphwanelaaya ni olapawawe miluku.

⁵Nkipakele yeeyo weera kiwinetho murima wa muloko wa aYixrayeli mwa yoowo okihiyale okaakakhanyihaka ni miluku sikina.’

⁶Tivawo, mweerele muloko wa oYixrayeli Yave onlamula sootheene oneera ha: ‘Murukunxe murima! Muhiye milukusanyu ni mulape soopakasanyu soothaneya sootheene!

⁷Akhalaru muYixrayeli hoye hoye namarwa onkhala oYixrayeli aniimwalanyihe ni Miyo, aneemexe miluku sikina vamurimanivawe, aniikaathi sookwattula sootakhali vamaithoniwawe xaxaxa, ni vahoolowaya anaarowe omukoherera mprofeeti, Miyo Yave Yoomeene kinoomwaakhula.

⁸Kinoothatuwa Mwiittanaawe mulopwaneene yoowo ni kinoomukhaliha ethoonyero ni yootthebwano. Miyo kinoommalamaliha eriyari ya mulokwaaka. Hiiho, nyuwosa munoosuwela weera Miyo ti Yave.

⁹Vano mprofeeti alokottheya, anapacera othalihera itthu, ti Miyo Yave, kimulokontthe mprofeeteene yoowo, ni kinoomutheteela ntata kimphwateke ni kimvenxeke eriyari ya mulokwaaka aYixrayeli.

¹⁰Ooweeli awo — mprofeeti ni yoowo anaamukoherere — anookhalano nthowa nimoharu ni anoottaruxiwa.

¹¹Vano eniyeereele yeeyo weera muloko wa oYixrayeli ohikihiyetho, hata ohiivalihetho ni sootthekasaya sootheene. Awosa anookhala mulokwaaka, ni Miyo kinookhala Mulukwaaya, onghima Yave onlamula sootheene.’ ”

¹²Yave aahuuluma ni Miyo akeerelaka:

¹³“Mwaana a mutthu, muloko mmoha wakitthekela niwoko na ohiroromeleya, katheteela ntatanaka weera kimalihe yoocaaya ni karuuhela etala ni kaamalamaliha atthwaaya ni axinamaaya —

¹⁴naari Nowe, Daniyeli ni Yobi, ereene mpatta wa muloko owo, yaangwera wiitapuxa asineenaaya paahi ngwookoleleyanimwaya, onghima Yave onlamula sootheene.

¹⁵Hoye hoye Miyo kaarumihela axinama a ntuphini mulaponi mmo ni awosa yahiyasa ehiyanre, ni eyo yathatuwa yoothaamiwa moota wooweera khaawo anaaviremo, awoovaka axinama,

¹⁶kinlipela mwa okumaaka, onghima Yave onlamula sootheene, naari asilopwana araru ala ereene mwemmo, awosa khayaawera waatapuxa anamwanaaya asilopwana hoye hoye asithiyana. Yaamwiitapuxa paahi asineenaaya, mene elapo yaamphwatiwa.

¹⁷Hoye hoye Miyo karuuhela ekatana elapo eyo, kineera: ‘Ekatana eviravire elapo yootheene ela,’ ni Miyo kaamalamalihamo amakaaya ni axinama,

¹⁸kinlipela mwa okumaaka, onghima Yave onlamula sootheene, naari asilopwana araru ale ereene mwemmo, awosa khayaawera waatapuxa anamwanaaya asilopwana hoye hoye asithiyana. Yaamwiitapuxa paahi asineenaaya.

¹⁹Hoye hoye Miyo karumihela nihooxo elapo eyo, kinayeeheramo isarasaka, kiyeehaka ephome ni kaamalamalihaka amakaaya ni axinamaaya,

²⁰kinlipela mwa okumaaka, onghima Yave onlamula sootheene, naari Nowe, Daniyeli ni Yobi ereenemo, awosa khayaawera waatapuxa anamwanaaya asilopwana ni asithiyana. Moororomeleyanimwaya yaamwiitapuxa asineenaaya paahi.

²¹Vano Yave onlamula sootheene oneera ha: Onuutepaxe kaarumihelaka oYerusaleemu mattaruxowaaka oowoopiha maxexe ala: Ekatana, etala, axinama a ntuphini ni nihooxo, weera kaamalamaliheremo amakaaya ni axinamaaya!

²²Wa soothesene anoohalahala akina akina — anamwane asilopwana ni asithiyana eniivenxiwemo. Awosa eniirwe wa nyuwosa ni moonaka mweettelowaaya ni makhalelowaaya, munoopepeseya mwaha wa erisa kiruuhenlaaka oYerusaleemu — khula erisa kiruuhenlaaka yeeyo.

²³Nyuwosa munoopepeseya moonaka mweettelowaaya ni makhalelowaaya, niwoko munoosuwela weera nkaasiye opakawo sootheene iye, onghima Yave onlamula sootheene.”