Read Makhuwa-Shirima Ezekiyeli 16 Bible Online

Ezekiyeli 16 - Makhuwa-Shirima bible

Ezekiyeli 16

²“Mwaana a mutthu, muulumele oYerusaleemu mwaha wa soopakasaya soothanyeya,

³ni muleele: ‘Yave onlamula sootheene oneerela ha oYerusaleemu: Mukhumelenlaanyu ni muyareliwaanyu yaari elapo ya oKanaani. Atithinyu yaari ngwAmori, ni amayinyu yaari muHiti.

⁴Oyariwawanyu weereiye ha: nihuku mwaayariwaanyu, etekhwaanyu khayaathikiliwe, naari khamwaarapihiwe weera mureere, hata khamwaattikittheliwe maakha hoye hoye khamwaahuruweliwe ekuwo.

⁵Khaawo yoomorenleni ikharari hata naari mano ehaaya weera yoopakeleni yakhalaru etthu ya seiya. Ohiyanawaya, nyuwo mwaavonyeriwa okerekhere, mmatta, niwoko nihuku mwaayariwaanyu, mwaanyoosiwa.

⁶Vano, kaaviraaka mukhivirumwanyu, kaawoonani mpirituwasaka ephome teri teri, ni nyuwo mwaaluwelaanyu mureene ephomeru, Miyo kaaweerelani: “Mukhale ni okumi!”

⁷Miyo kaawunnuwihani ntoko mwiri woowaaliwa mmatta. Nyuwo mwaahunnuwa, munapomba, munathatuwa ooreeraxa a axiveeve. Mapelaanyu yaakhuma, ni mayihaanyu yaahunnuwa, vaheera nyuwo mwaari tiriya.

⁸Evinreene ehuhu ekina, kiviravirakarutho mukhivirumwanyu, kaahoowehani, kinoona weera mohunnuwa mungweraanyu osivela, ni kaawaatalelani malayaaka, kinakuttelela etiriyaanyu. Kaalipela, kinakhaliha wiiraana ni nyuwo, onghima Yave onlamula sootheene, ni nyuwo moothatuwa awaka.

⁹Miyo kohoorapihani, kaacapa ephomaanyu, kinawunkhelihani makhura.

¹⁰Kohoowarihani mukaandyo wooxoriwa ni ikwakwaatta sa exapala. Miyo kohoowarihani eliinyu* yootteettheya kinookuttelelani ni ikuwo soorikaxa.

¹¹Kohoophwanelihani ni axiveeve; kohoowarihani ipangiiri mmoononimwanyu, ni mukuhu muxikomwanyu;

¹²kohoovahani ecipini, axiveeve ni ecireemba yooreeraxa.

¹³Hiiho, nyuwo moophwanelihiwa ni eyuuma yoorikaxa ni eparatha*; yoowaraanyu yaari ya eliinyu* yootteettheya ni ekuwo yoorikaxa yooxoriwa. Yoocaanyu yaari ya ephepa yooreerela, oravo ni makhura a sooliveira*. Nyuwo mwaari ooreeraxa muthatuwaka pwiyamwene.

¹⁴Epilaanyu yoomwareela mmilokoni mwaha wa ophwaneliwawanyu, niwoko ovuwa koovanghaakani wookwanihera ophwaneliwawanyu,’ onghima Yave onlamula sootheene.

¹⁵‘Vaheera nyuwo muroromenle ophwaneliwawanyu ni epilaanyu, muniikhaliha puuta. Mohaavaha sooreelasanyu yaawo avinre mukhwipimwanyu, ni ophwaneliwawanyu woothatuwa wawayasa.

¹⁶Nyuwo moovarela muteko ikuwosanyu sikina sikina weera mulapeno altaari* a miluku vanttumuxani, weiwo mwaapwaherenraanyu opuutaanyu. Khawaatthuneyaru weereya itthu ntoko iya — hata vakhaani!

¹⁷Nyuwo mohaakuxa axiveeve ooreeraxa oopakiwa ni eyuuma yoorikaxa ni eparatha* koovanghaakani, muniipakela nyuwo miluku mwa ekhalelo ya mulopwana ni mooraruwano.

¹⁸Nyuwo moowarihatho soowarasanyu sooxoriwa, munaveleelela makhuuraaka ni erubanaaka.

¹⁹Hiihotho yoocaakeene koovanghaakani — ephepa yooreerela, makhura a sooliveira* ni oravo — nyuwo mooveleelela sootheene vamoha ni erubani* yoowunkhelaxa ohoolowaya. Ti yeeyo yeereiye, onghima Yave onlamula sootheene.

²⁰Vano nyuwo mohaakuxatho anamwaniinyu asilopwana ni asithiyana mwaakiyarenlaanyu, munaaveleela ntoko sooca wa miluku sikina. Opuutaanyu khawookwanneni?

²¹Nyuwo moowiiva anamwanaaka munaapakela yooveleelela miluku sikina!

²²Mwa ipakelosanyu sootheene soothanyeya, ni oraruwawanyu, nyuwo khamuupuwelenle mmahukuni a oyariwawanyu, mwaaraanyu tiriya, muluwelaka ephome teri teri.

²³Ii! Ii! Wa nyuwo, onghima Yave onlamula sootheene. Ohiya soonanarasanyu sikina sootheene,

²⁴nyuwo mohiitekela altaari* vanttumuxani ni khula nipuwa ninkhalaxiwa mohiipakela mapuro oolapa oorakama.

²⁵Opacenraayaru khula musewe nyuwo mohiitekela mapurowaanyu oolapa oorakama, muveihaka ophwaneliwawanyu ni mwaasaka oveleela erutthwaanyu wa khula omviraru.

²⁶Nyuwo mooraruwa ni awExipitu, aximwaattamanaanyu oohaawelaxa, ni munaandyeerera opuutaanyu weera mutannye isarasaka.

²⁷Vano koowookolelani moonowaaka ni koovukula elapwaanyu. Koowinnyererani mwa soohaawelaxa sa amwiittanaanyu, anamwanaaya asithiyana a aFilisti mwa yaawo yaatikhinaxa mwaha wa okumaanyu wa opuuta.

²⁸Nyuwo mooraruwatho ni awAsiriya, niwoko mwaari oohikwaneya ni naari eviraleene yeeyo, khamukwaneiye.

²⁹Vahoolowaya mooraruwano aBabiloniya, muloko ole wa ananakoso. Wa soothesene, awosatho khayookwaningheni.

³⁰Murimaanyu woovoreyeya, onghima Yave onlamula sootheene, nyuwo mpakaka itthu sootheene iya, mweettaka ntoko puuta oohiyuleya!

³¹Mwaatekaanyu altaaraanyu a miluku wa khula nttuumba ni mwaapakaanyu mapurowaanyu oolapa oorakama wa khula nipuwa ninkhalaxiwa, mwaatepaxa opuuta mweenre muhinyesereraka oliviwa.

³²Nyuwo muthiyana ooraruwa! Munaakupaleela anamarwa omuhiya iyinyu!

³³Khula puuta onooliviwa, vaheera nyuwo mwaavaha itthu yaawo munaakonanaanyu ootheene, mwaavahaka soovaha weera ewe wa nyuwo mmapuroni moothemwene waakhela wa nyuwo munkhaleloni wa opuuta.

³⁴Mooraruwanimwanyu omvirikana ni yeeyo eneereya ni asithiyana akina; khaawo ongwaasani nyuwo. Nyuwo moovirikana, niwoko mummwaasa opuheriwa.

³⁵Tivawo, nyuwo puuta, mwiiwe masu a Yave!

³⁶Yave onlamula sootheene oneera ha: Mweenre munanariha mihakhusanyu mooniheraka etiriyaanyu ni yaawo munaakonanaanyu, ni niwoko na milukusanyu soothanyeya sootheene, ni niwoko na owiivelawanyu anamwaniinyu milukusanyu,

³⁷mwaha wa yeeyo, kinimwaathukumanyiha ootheene yaawo munaakonanaanyu, yaawo nyuwo munaatthunaxaanyu — okhuma yaawo mwaasivenlaanyu mpakatho yaawo mwaathannyaanyu. Miyo kinimoothukumanyiherani mipatta sootheene, koohiyekeni tiriya ohoolowayasa, ni awosa eniyoone etiriyaanyu yootheene.

³⁸Miyo kinimoothorihelani nttaruxo alakeleliwaaya asithiyana anraruwa ni angyeeha ephome; kinoowiinlelelani ikukuttula sa ephome ya isarasaka ni onyoonyiwa ontannyeriwa ni ehacaaka.

³⁹Vahoolowaya, Miyo kinoowinnyererani mmatatani mwa yaawo munaasivelaanyu, ni awosa animwaakurumula altaaraanyu a miluku sikina, ephwateke mapurowaanyu oolapa oorakamela. Awosa anoowaakhani soowarasanyu yaakuxeke axiveevaanyu ooreeraxa ni yoohiyekeni tiriya.

⁴⁰Eniyooruuhelaseni nakupa anoovonyeeni maluku oonyaanyekeni ni ikatana.

⁴¹Awosa anoohisa impasanyu, yoottaruxekeni vamaithoni wa asithiyana ancipale. Kinoomaliha opuutaanyu ni nyuwo khamwaalivarutho yaawo nyuwo munaakonanaanyu.

⁴²Hiiho wookhalelaniwaka isara onookhurunuwa ni onyoonyiwawaka woosareya ehaace onimoohiyani; kinoomaaleleya ni nkinnyoonyiwatho.

⁴³Mweenre muhuupuwelela mahuku a emiravowaanyu mutannyaka isarasaka ni itthu sootheene iya, woohihovela kinoomoroxela mmurumwanyu yeeyo mpankaanyu, onghima Yave onlamula sootheene. Nyuwo mohaandyeerera ohiroromeleya ni soopakasanyu sikina sootheene iya.

⁴⁴Yaawo onaasivela wuuluma maxiripulo, eniiwuulumeleni nxiripulo nna: “Mwaana muthiyana onaalatta amayawe!”

⁴⁵Vekhaikhai nyuwo ti mwaana muthiyana xaxaxa a amayinyu, mwa yaawo yaathannye aiyaya ni anamwanaaya; ni nyuwo ti munna xaxaxa a axunninyu, mwa yaawo yaathannye asiiyaya ni anamwanaaya. Amayinyu yaari muHiti ni atithinyu yaari ngwAmori.

⁴⁶Munninyu mutokweene aakhala mpaattaanyu wa ottuttuwani aari Samariya aakhala vamoha ni anamwanaawe asithiyana; ni munninyu mukhaani aakhala mpattaanyu wa ohitto vamoha ni anamwanaawe asithiyana aari Sodoma.

⁴⁷Nyuwo khamweettiye paahi mphironimwaya mutakihaka soopakasaya soohiira, menetho mphironimwanyu moothemwene wowaakuveya mootepaxa otakhala waapwaha yaawo.

⁴⁸Kinlipela mwa okumaaka, onghima Yave onlamula sootheene, munninyu Sodoma vamoha ni anamwanaawe asithiyana khaanapake yeeyo mpankaanyu ni anamwaniinyu asithiyana.

⁴⁹Vano, yoottheka ya munninyu Sodoma yaari ti ela: Owo ni anamwanaawe asithiyana yaari oowiixoona, yaakhalano yooca yincipale ni khayaatthukuruwa; khayaakhavihera oohaawa ni oothoiwa.

⁵⁰Yaari oowiixoona, enapaka soohiira ohoolowaka. Tivawo Miyo kaavenxalaaka, ntoko moonnaanyu.

⁵¹Samariya khatthenke ntoko nyuwo. Nyuwo moottheka moota woohiira waapwaha yaawosa, ni nyuwo moopakiha weera axunninyu ekhale ntoko oororomeleya ni soohiira sootheene mpankaanyu.

⁵²Mvilele wuulihiheyawanyu muru, niwoko nyuwo mumpakiha weera axunninyu ekhale ntoko ooreerela opwaha yaaraaya. Seenre sootthekasanyu sithanyeyaxa opwaha sawaya, awosa ankhala ntoko oororomeleyaxa woopwahani nyuwo. Vano muulihiheye muru ni mvilele oyeviheyawanyu mweenre nyuwo mpakiha weera axunninyu ekhale ntoko oororomeleya opwaha yaaraaya.

⁵³Wa soothesene, Miyo kinooreherera oreereliwa wa Sodoma ni wa anamwanaawe asithiyana, ni wa Samariya vamoha ni anamwanaawe asithiyana nitho oreereliwawanyu vamoha ni yaawosa,

⁵⁴weera nyuwo muhaawe wuulihiheyawanyu muru ni muyeviheye wa sootheene nyuwo mpankaanyu ngwaapepesanimwanyu.

⁵⁵Axunninyu — Sodoma ni anamwanaawe asithiyana, ni Samariya vamoha ni anamwanaawe asithiyana, anoohokoleela okhala ntoko yaaraaya; ni nyuwotho vamoha ni anamwaniinyu asithiyana, munoohokoleela okhala ntoko mwaaraanyu.

⁵⁶Mweehuhunimwanyu yoowiikuxerera nyuwo mwaamunyoosa munninyu Sodoma —

⁵⁷ohinaaye wooniheriwa otakhalawanyu. Vaheera vano nyuwo muri mutheelelo wa anamwane asithiyana a Edomi ni amwaattamanaaya ootheene, ni anamwane asithiyana a aFilisti — ootheene yaawo ankhala mukhwipimwanyu anoonyoosani.

⁵⁸Munoohaawa niwoko na otakhalawanyu ni ipakelosanyu soohiira, onghima Yave onlamula sootheene.’ ”

⁵⁹“ ‘Yave onlamula sootheene oneera ha: Miyo kinimoopakelani yeeyo mphwanenlaanyu, niwoko nyuwo moonyoosa nlipelonaka woonanarihani wiiraana.

⁶⁰Wa soothesene, Miyo kinimuupuwelela wiiraanawaka ni nyuwo kaapankaaka mmahukuni a emiravowaanyu, ni kinimookhaliheranitho wiiraana woohimala.

⁶¹Vano nyuwo munimuupuwelela iphirosanyu ni munimuulihiheya muru mwaawaakhelaka axunninyu mutokweene ni mukhaani. Kinimoovahasani yaawosa ntoko anamwaniinyu asithiyana, mene khoohiyono niwoko na owiiraanananiwaka.

⁶²Tivawo kineeraaka kikhalihe wiiraana ni nyuwo, ni nyuwo munoosuwela weera Miyo ti Yave.

⁶³Vano Miyo kaarehereraka wiiraana mwaha wa nyuwo niwoko na sootheene mpankaanyu, nyuwo munimuupuwelela ni munimuulihiheya muru ni khamuhularutho eyano niwoko na oyeviheyawanyu, onghima Yave onlamula sootheene.’”