Read Makhuwa-Shirima Ezekiyeli 17 Bible Online

Ezekiyeli 17 - Makhuwa-Shirima bible

Ezekiyeli 17

¹Yave aahuuluma ni miyo moota ola:

²“Mwaana a mutthu, muulume ni niphwanahwaniho ni muthalihere yoolikanyiha muloko wa oYixrayeli.

³Mwaaleelase: ‘Yave onlamula sootheene oneera ha: Xaattula makula ni mapuphaawe ooweraxa, mapururu oorakama ni a malepa oohiyanahiyana aahoorwa oLebanoni. Aaheemela osuluxa wa esedari*,

⁴anavasula ephuwela ya osulu wa wiikhaani wa esidari*, anarongha mulaponi mwa ananakoso, ophatteiyaawewo musidadeni mwa ananakoso.

⁵Aakuxatho inuku vakhaani sa mulaponimwanyu, anaala vathaadyirani. Owo aaphatteya ntoko mwiri mutokweene muxerexere wa maahi mancipale,

⁶ni iyo saaphuwa, sinakhala evideira* yookhuveya ni yoopombaxa. Iphandisaya, saakuttukutteela wa xaattula makula, mene mikwankhwaarisaya saapwaherera vathi wa evideira*. Evideira* yaahunnuwa, enasareya iphandi ni soophuwaphuwa ni makukhu.

⁷Vaheera aakhala xaattula makula mukina aarino mapupha ooweraxa ni mancipale. Mikwankhwaari sa evideira* saakhuruwelela mpatta wa xaattula makula anaaveeli owo, okhuma yaaphatteiwalaayawo, ni iphandisaya saamukuttukutteela yoowo, saasaka maahi.

⁸Vano, eyo yaaphatteiwale vataadyirani, muxerexere wa maahi mancipale, yeeraaya ephuwe iphandi, yiime ni ethatuwe evideira* yooreerelaxa.’

⁹Mwaaleelase: ‘Yave onlamula sootheene oneera ha: Weeraka eyo enimunnuwa nnenesene? Hoye! EnoooyeEnoopheliwa ni soowiimasaya sinoorukuliwa weera eyo yuume. Sootheene sineera siphuwemo, sinimuuma. Khasitthuneyaru nyoono sookhomaala hata atthu ancipale weera epheliwe.

¹⁰Naari epheliwaka, epatteiwaka nipuro nikina, weeraka enimunnuwa nnenesene? Hoye! Eniyuume woomalela yaaphwanyiwaka ni epheyo ya mpatta ninkhuma nsuwa, enyaalaka ni elakaseyaka vanipuroni yaaphatteiwalaayawo.’”

¹¹Vahoolowaya Yave aahuuluma ni miyo eeraka:

¹²“Mweerele muloko woovaanya owo: ‘Nyuwo khamusuwenle etaphulelo ya itthu iya?’ Mwaaleelasetho ha: ‘Mwene a oBabiloniya aarowa oYerusaleemu anamurowano mwene a weiwo ni maneethaayeene, anaahokoloxera oBabiloniya vamoha ni yoowo.

¹³Aamukuxa mutthu a emusi ya emwene anamwiiraanano ni anamulipeliha. Aahaakuxatho aweri a mulaponi,

¹⁴weera ahele vathi omwene, ohiweraka opwaherera. Onoowera okhala paahi mookwaniherani wiiraanawaya ni oBabiloniya.

¹⁵Vaheera mwene aamvaanya yoowo, anarumihela mutthenga wExipitu, avekelaka ikavalu* ni anakhotto ancipale. Weeraka owo sinoomweettela nnene? Yoowo onuupuwela mooteene yoola onootthawa? Owo onoonanariha wiiraana oopoweke nttaruxo?

¹⁶Kinlipela mwa okumaaka, onghima Yave onlamula sootheene, owo anaakhwele oBabiloniya, mulaponi mwa mwene omukhalinghe namalamula, mwa yoowo onyoosale nlipelo ananarihaka wiiraana.

¹⁷Farawu* ni anakhottwaawe oowera vamoha ni nakupaawe kheekhalaru ekhaviherowaawe mukhottoni, saatekiwaka ikaaro sookurumulela exiri ni saapakiwaka sooricano weera siwiive atthu ancipale.

¹⁸Owo aanyoosa nlipelo, ananarihaka wiiraana. Eenre aroromeliha, anapaka itthu sootheene iya, khoopowaru.

¹⁹Tivawo Yave onlamula sootheene oneeraawe ha: Kinlipela mwa okumaaka weera kinoomoroxela mmurumwawe nlipelonaka onyoosalaawe ni wiiraanawaka owo onanarihalaawe.

²⁰Kinoomureya ntthavinaka, ni owo onoopharihiwa munraakhonimwaka. Miyo kinoomurongha oBabiloniya kamuttaruxelekewo, niwoko kharoromeleiye wa Miyo.

²¹Anakhottwaawe ootheene yaatthawaka, animwiiviwa ni ekatana, ni yaawo eniihalahale anoomwaraxeliwa mulaponi moothemwene. Hiiho nyuwo munoosuwela weera ti Miyo Yave kuulumme.

²²Yave onlamula sootheene oneera ha: Yoomeene kinoovasula ephuwela ya osulu wa wiikhaani wa esidari* kiphatteyeke; kinoovasula ephandi ya iphandisaya soorakamaxa kiphatteyeke vamwaako woorakamaxa ni mutokotoko.

²³Kinoophatteya mmanyaakoni soorakamela sa oYixrayeli; owo onookhalano iphandi wiimeke ni othatuweke esidari* yooreerelaxa. Ikhalelo sa ipalame sootheene nsipake ipuurusaya mwemmo; sinoophwanyamo munttuusi.

²⁴Nyiri sootheene sa ntuphini sinoosuwela weera Miyo, Yave, kimmoroxa mwiri woorakama, kinunnuwiha mwiri wookhuveya. Miyo kinuumiha mwiri mukithi, kinattuviha mwiri woowuuma. Miyo Yave kohuuluma ni kinoopaka yeeyo.’”