Read Makhuwa-Shirima Ezekiyeli 18 Bible Online

Ezekiyeli 18 - Makhuwa-Shirima bible

Ezekiyeli 18

¹Yave aahuuluma ni miyo eeraka:

²“Muntthuna ohimani muulumelaka oYixrayeli nxiripulo nna: ‘Asitiithi aakhuura iwuuva* soonyuunya, anamwane enaasosomera maino’?

³Kinlipela mwa okumaaka, onghima Yave onlamula sootheene, nyuwosa khamuulumelatho nxiripulo nna oYixrayeli.

⁴Vano akumi ootheene ti awaka, okhuma tiithi mpaka mwaana — ooweeli ti awaka. Yoowo anaattheke ti aneera akhwe.

⁵Noone ha: areene oororomeleya ompaka yeeyo eri ya ekhaikhai ni yoowookoleleya.

⁶Owo khanca mmapuroni oolapa miluku sikina mmanyaakoni ni khampwattharu miluku sa muloko wa oYixrayeli. Owo khanimvaliha mwaara a mukhwaawe ni khanimukonano muthiyana mweehuhuni ya mpingwaawe.

⁷Owo khanimuhasularu mutthu, mene onghokoloxera yeeyo eemexenraawe mookoongoranimwawe. Khaniiya, mene onaavaha yooca oovoliwa aakawelaka soowara oothaaleliwa.

⁸Owo khankoongoriha eerelaka owina musurukhu hata khankokoca eerelaka iphura. Owo onghuluxa ntatanawe weera nihipake soonanara, athorihaka ni ekhaikhai eriyari ya atthu eeli.

⁹Owo oneettela ikanosaka, iiwelelaka oororomeleyeene malamulowaaka. Mutthu owo ti oororomeleya; vekhaikhai, owo anaakhale ni okumi,’ onghima Yave onlamula sootheene.

¹⁰Noonetho ha: owo areeneno mwaana oopuhera, ongyeeha ephome hoye hoye ompaka yakhalaru etthu ya seiya,

¹¹atithawe ahitonkwaaya opaka: Onkhalela mpatta mfestani ya sooveleela mmapuroni oolapa miluku sikina mmanyaakoni, anamukonano mwaara a mukhwaawe.

¹²Owo onaahasula oohaawa ni oothoiwa. Onimwiiya. Khanghokoloxa aakuxalaawe ntoko mweemexero. Onlapa miluku sikina ni ompaka itthu soothanyeya.

¹³Onkoongoriha eerelaka owina musurukhu ni onkokoca iphura. Mutthweene yoowo akhaleke ni okumi? Hoye! Mwa ipakelosawe sootheene iya soothanyeya, vekhaikhai owo onimwiiviwa, ni nthowa na okhwawawe ti nawawe.

¹⁴Vaheera, noonetho ha: mulopwana anaaveeli ola areene mwaana mulopwana, onkhalela onamoona soottheka sa atithawe, mene khanaatakiha.

¹⁵Owo khanca mmapuroni oolapa miluku sikina mmanyaakoni ni khampwattharu miluku sa muloko wa oYixrayeli. Owo khanimvaliha mwaara a mukhwaawe.

¹⁶Khanimuhasularu mukina hata khannyesereriha weemexerela ekoongori. Khaniiya, mene onaavaha yooca oovoliwa, aakawelaka soowara oothaaleliwa.

¹⁷Owo onghuluxa ntata weera nihittheke ni khankoongoriha eerelaka owina musurukhu hata khankokoca iphura. Oniiwelela malamulowaaka ni oneettela ikanosaka. Owo khankhwela sootakhala sa atithawe; vekhaikhai, anaakhale ni okumi.

¹⁸Vaheera atithawe eniikhwele niwoko na yootakhalaaya xaxaxa, yeenre awo yakuxa musurukhu ngwoopopihani, emwiiyeraka mukhwaaya, enapaka yeeyo eri yoonanara eriyari ya mulokwaaya.

¹⁹Vano apaale munookoha: ‘Ohimpakelani mpatta wa nthowa na atithawe?’ Eenre mwaana owo apakaka yeeyo eri yoororomeleya ni yoowookoleleya ni iiwelela nnenesene ikanosaka sootheene, vekhaikhai owo anaakhale ni okumi.

²⁰Yoowo anaattheke ti anaakhwe. Mwaana khakuxa nthowa na atithawe, hata tiithi khakuxa nthowa na mwanawe. Oororomeleya, onimwaakhuleliwa ngwookoleleyanimwawe, ni sootakhala sa mutakhali onookokoceriwa.

²¹Vaheera, mutakhali ahiya soottheka sootheene opankaawe, aniiwelela ikanosaka, apakaka yeeyo eri yoororomeleya, vekhaikhai anaakhale ni okumi.

²²Khasuupuweleliwaru soottheka opankaawe. Eenre owo apaka itthu soororomeleya, anaakhale ni okumi.

²³Weeraka kinoohakalalela okhwa wa mutakhali? onghima Yave onlamula sootheene. Ohiyanawaya, kinghakalalela woomoona ahapuwaka iphirosawe ni akhalaka ni okumi.

²⁴Wa soothesene, oororomeleya ahapuwa moororomeleyanimwawe, anattheka, apakakatho itthu soothanyeya atakhali ampakaaya, onookhala ni okumi? Khasuupuweleliwaru mitekosawe soororomeleya. Owo anaakhwele ohiroromeleya ni soottheka opankaawe.

²⁵Wa soothesene, nyuwosa muneera: ‘Ephiro ya Yave kheeroromeleiye.’ Ii! Muloko wa oYixrayeli, mwiiwe: Ephirowaaka ti yoororomeleya. Ti iphirosanyu siri soohiroromeleya.

²⁶Oororomeleya ahiya ororomeleyawawe, anattheka, owo anaakhwele yeeyo; aani, anaakhwele yoottheka opankaawe.

²⁷Vaheera, mutakhali ahiya yoonanaraawe, anapaka yeeyo eri yooreera ni yoowookoleleya, owo anoopole okumaawe.

²⁸Eenre oonelela sootthekasawe sootheene opankaawe, anahiya, vekhaikhai owo anaakhale ni okumi ni khakhwa.

²⁹Wa soothesene muloko wa oYixrayeli oneera weera ephiro ya Yave kheeroromeleiye. Ii! aYixrayeli, munuupuwela weera ephirowaaka kheeroromeleiye? Ti ephirowaanyu eri yoohiroromeleya.

³⁰Ii! Muloko wa oYixarayeli, vanonto Miyo kinimoothorihasani, khula mutthu kimuttharihelaka mweettelowaawe, onghima Yave onlamula sootheene. Murukunxe murima! Muhiye soonanarasanyu sootheene weera yoottheka ehoomoroxeni.

³¹Mwiitapuxe mwa soonanara sootheene mpankaanyu, ni mphwanye murima munyowani ni munepa munyowani. Ii! Muloko wa oYixrayeli, mmwikhweleni?

³²Miyo khoonkisiveliharu okhwa wa mutthu, onghima Yave onlamula sootheene. Murukunxe murima ni mukhale ni okumi!”