Read Makhuwa-Shirima Ezekiyeli 21 Bible Online

Ezekiyeli 21 - Makhuwa-Shirima bible

Ezekiyeli 21

¹Yave aahuuluma ni miyo, eeraka:

²“Mwaana a mutthu, muhuluwele oYerusaleemu, ni mulaleere Nipuro Nootteela*. Muthaliherele oYixrayeli otthuna wa Muluku,

³mweerelaka: ‘Yave oneera ha: Koowiittani. Kinoohulula ekatanaaka munluwoni weera kimmalamalihe okhuma oororomeleya mpaka mutakhali eriyaraanyu.

⁴Hapo kinoommalamaliha oororomeleya ni mutakhali, kinoovarela ekatanaaka weera kiwiive ootheene, okhuma oNegeba mpaka mpatta wa ottuttuwani.

⁵Hiiho, ootheene eniisuwele weera Miyo, Yave, kootholola ekatana munluwoni ni nkithokororatho.’

⁶Tivawo, mwaana a mutthu, mpacere wiipulela! Mpacere wiipulela ohoolowayasa ni murima wooriipeene ni othananaxa.

⁷Vano, yookohakani weera muniipulelela heeni? Nyuwo mweere: ‘Mwaha wa ihaali singwa. Khula murima onuutothowe, ni ntata nootheene khanilipalipa; munepa wootheene onuukomoke, ni makutha ootheene eniithatuwe oohilipa ntoko maahi.’ Eneera ewaaka! Woohihovelaru, enimweereya, onghima Yave onlamula sootheene.”

⁸Yave aahuuluma ni miyo, eeraka:

⁹“Mwaana a mutthu, muthalihere otthuna wa Muluku ni mweere: ‘Yave oneera ha: Ekatana emoha, aani ekatana yoowiitha ni yoocapeya —

¹⁰enoneliwe weera yiive, yoocapeya weera eceremele ntoko overinya! Weeraka nnoohakalalela ekopo ya mwanaka Yuda? Ekatana ennyoosa yakhalaru ekopo.

¹¹Ekatana yoovaheriwa ocapeya ni ovareliwa; yoononiwa ni yoocapeya, yoorehereriwa weera evareliwe ni ntata na namwiiva.

¹²Mwaana a mutthu, mukhuwele ni mwiikhupanyere, niwoko ekatana eyo yohiittanano mulokwaaka; yoowiittanano asitokweene ootheene a oYixrayeli. Awosa ni mulokwaaka amvonyeriwa vakatanani. Vano mmane ekakasa.

¹³Vekhaikhai onimoorwa wootiwa murima. Vanonto, eniikhuweleleni ekopo ya Yuda, ennyoosiwa ni ekatana eyo, ekopo eyo yaahipwaherera okhalatho? onghima Yave onlamula sootheene.’

¹⁴Tivawo mwaana a mutthu, muthalihere otthuna wa Muluku, ni mmane matata. Ekatana ekakatthe imaara piili — mpaka tthaarutho. Eyo ti ekatana ya noomala, aani noomala mutokweene, aakhuveelaka yaawosa mipatta sootheene.

¹⁵Vano, kookhaliha ekatana kimweerelaka noomala mmilakonimwaya moothemwene weera mirima sitothowe ni emoroxiwe ancipale. Ii! Eyo epakeliwe weera eceremele ntoko overinya; yoovareliwa eereliwaka noomala.

¹⁶Ii! Ekatana, mverunyihele mpattaanyu woolopwana ni mpattaanyu woothiyana — wakhalaru mpatta muntthunaanyu okakatthawo.

¹⁷Miyotho, kinimwiipa makuphi, ni isarasaka sinookhurunuwa. Miyo Yave, kohuuluma.”

¹⁸Yave aahuuluma ni miyo, eeraka:

¹⁹“Mwaana a mutthu, mulepelele misewe miili eneeraaya eviremo ekatana ya mwene a oBabiloniya, soomiili sikhumaka elapo emoharu. Vano vamathakalaano mwiikaathi eneneero enthoonyera epacerero ya musewe onkela osidade.

²⁰Mulepelele musewe mmoha weera ekatana engwanane Raba, elapo ya awAmoni ni okina weera engwanane Yuda ni oYerusaleemu olipihiwe.

²¹Vano mwene a oBabiloniya aneemele vamathakalaano weera apakele macitta oothanlano. Owo anaapakele macitta ni nyuupa, anaakoherere milukusawe angwehawehaka hapa.

²²Muntatanimwawe noolopwana, anaathanleliwe Yerusaleemu, mwa weiwo aneeraawe arehererele ikaruma soottiittano ixiri, alamulele opakiwa noomala, alamule munyakunyaku wa ekhotto, iikaatheriwe ikaruma soottiittano ixiri sa esidade, epakiwe yooricano ni atekeliwe ikaaro sookurumulela ixiri sirukureenre.

²³Vaheera amaki a oYerusaleemu eniyuupuwele weera ti macitta oowaalokottha. Awosa yaapaka wiiraana munlipeloni, vaheera mwene a oBabiloniya anawuupuxere nthowanaya ni anaakuxe ootthukiweene.

²⁴Tivawo, Yave onlamula sootheene oneeraawe ha: ‘Mweenre muupuxera sootakhalasanyu, mooniheraka ovaanyawanyu ni sootthekasanyu mwa sootheene mumpakaanyu, munooronghiwa wootthukiwani.

²⁵Ii! Mwaana a mwene oohiira ni ootakhala a oYixrayeli, mwa yoowo niphiyenre nihukunawe ni ehuhu ya ottaruxiwawawe,

²⁶Yave onlamula sootheene oneera ha: Murule eturbante* ni ecireemba. Khookhala ntoko khalayi — oowiiyeviha eniivuwihiwe ni oovuwihiwa eniiyevihiwe.

²⁷Oheleya nthala! Oheleya nthala! Miyo kinooheliha nthala! Kheerehereriwa ahirwiiye yoole ophwanenle okhala muneene yeeyo; vano wa yoowo kinoomvaha.’

²⁸Vano nyuwo mwaana a mutthu, muthalihere otthuna wa Muluku, mweeraka: ‘Yave onlamula sootheene oneera ha mwaha wa awAmoni ni oruwanawaya: Ekatana emoha, ekatana emoha, evareliwe ompakela noomala, yoocapeya weera enyaanye ni weera eceremele ntoko overinya!

²⁹Atakhali anthalihera nyoonelo soowootha ni sootthoma munlokottheliwaanyuno. Tivawo eneeraya ehiteliweno ekatana eyo antthuneya wiiviwa, wa yaawosa nihukunaya niphiyale, ni ehuhu ya nttaruxonaya yookhuveela.

³⁰Muthokorore ekatana munluwoni. Vanipuroni mpattuxerasiwaanyuwo, mulaponi mwa makholowaanyu, Miyo kinimoothorihelanimo.

³¹Kinimooyeeherasani isarasaka, kinoowiiseelelasani onyoonyiwawaka woowuupaxa Miyo kinoowinnyererasani mmatatani mwa atthu oopuhera, mwa yaawo akhovelenle ophwata.

³²Nyuwosa mmwikhalase yoopattihera mooro, ephomaanyu eniiyeeheriwe mulaponimwanyu, ni nyuwosa khamuupuweleliwatho, niwoko Miyo Yave, kohuuluma.’ ”