Read Makhuwa-Shirima Ezekiyeli 22 Bible Online

Ezekiyeli 22 - Makhuwa-Shirima bible

Ezekiyeli 22

¹Yave aahuuluma ni miyo eeraka:

²“Mwaana a mutthu, munoothoriha? Nyuwo munoothoriha esidade ela yoosareya ephome? Vano ngwuupuxere soohiira sootheene yaapankaaya

³ni mweere: ‘Yave onlamula sootheene, oneera ha: Ii! Esidade, yiiruuhenle nthorihelo wooyeeha ephome eriyaraaya ni woowiivaliha epakaka miluku,

⁴Nyuwo mohiitatuxa nanthowa mwaha wa ephome muyeehalaanyu ni woowiivalihano miluku mpankaanyu. Nyuwo moomaliha mahukwaanyu; woophiyera ommaleloni wa iyaakhasanyu. Tivawo kineeraaka koopakeeni mutheelelo wa miloko ni mutthebwelo wa ilapo sootheene.

⁵Ii! Esidade yoowuuliha muru ni yoohimaaleleya, okhuma miloko soowaattamana mpaka soorakamela sinimootthebwani!

⁶Moone moota wa khula mwaana mulopwana a mwene a oYixrayeli ori mwa nyuwo omvarelaawe muteko ikurusawe wooyeehera ephome.

⁷Mpuwamwanyu awosa annaanyoosa atithaya ni amayaya, emuhooxaka namarwa ni emuhasulaka mukwaasuni ni naamukhweli.

⁸Nyuwo moonyoosa soovahasaka sootteela ni moohiiriha iSaabadusaka.

⁹Mpuwamwanyu aakhala anawunawu, oolikaneene oyeeha ephome; mpuwamwanyu aakhala yaawosa anca mmapuroni oolapa miluku sikina mmanyaakoni ni ampaka itthu soowuulihaxa muru.

¹⁰Mpuwamwanyu aakhala yaale amveiha ebeetti ya asitithaya, ni yaale ankonano asithiyana mmahukuni a mpingwaaya, awosa ereene oohitteela.

¹¹Mpuwamwanyu mulopwana mmoha onimuraruwano muthiyana a mukhwaawe, mukina onimvaliha moota woowuuliha muru pwiyamwaanaawe, ni mukina onimverula murokoriye, mwaana muthiyana a atithawe xaxaxa.

¹²Mpuwamwanyu, aakhala atthu anaakhulela makhwankwa weera eyeehe ephome; nyuwo munkoongoriha mweerelaka oliviwa iphura, ophwanya ewinelo, ni mungwina moota woohiroromeleya munnyesererihaka ni mmwiiyeraka mukhwiinyu. Nyuwo mookittiwala, onghima Yave onlamula sootheene.

¹³Vekhaikhai Miyo kinoomana matata mwaha wa soowina soohiroromeleya mwaaphwannyaanyu ni mwaha wa ephome muyeehalaanyu.

¹⁴Weeraka olipihawanyu murima onuuvilele hoye hoye matataanyu eniilipe vanihukuni kineeraaka koopakeleni yeeyo enoophwanelani? Miyo Yave, kohuuluma ni kinoopaka yeeyo.

¹⁵Kinoowoomolani eriyari ya miloko koomwaraxelekeni mulaponi; kinoomaliha woomalela ohitteelawanyu.

¹⁶Nyuwo mwaaveruliwaka vamaithoni wa miloko, munoosuwela weera Miyo ti Yave.’”

¹⁷Vahoolowaya, Yave aahuuluma ni miyo, eeraka:

¹⁸“Mwaana a mutthu, muloko wa aYixrayeli wookithatuwela manyowa — ekobre, eyuuma ya eseeta, eyuuma yoolipa ni eyuuma yoolemela — soohiiwa vattukutthani. Muloko owo onlikana ni manyowa a eparatha*.

¹⁹Tivawo Yave onlamula sootheene oneeraawe ha: ‘Mweenre ootheene nyuwo muthatuwa manyowa, Miyo kinimoothukumanyihani oYerusaleemu.

²⁰Musaranimwaka ni moonyoonyiwanimwaka, kinimoothukumanyihasani musidadeni, koototoxekeni mooteene yoole atthu anthukumanyihaaya eparatha*, ekobre, eyuuma ya eseeta, eyuuma yoolipa ni eyuuma yoolemela vattukutthani weera etothowe evekhulaxaka vayikho.

²¹Miyo kinimoothukumanyihasani koovekhulelekeni mooro wa isarasaka, ni nyuwosa mmwitothowase mpuwamwaya.

²²Nyuwosa mmwitothowase musidadeni mooteene yoole eparatha* entothowaaya vattukutthani, ni munoosuwela weera Miyo, Yave, kohooyeeherasani isarasaka.’ ”

²³Yave aahuulumatho ni miyo, eeraka:

²⁴“Mwaana a mutthu, mweerele elapo ela: ‘Nyuwo ti etthaya ehitonkoru orupeliwa epula, hata nthokolapalaka vanihukuni na isara.’

²⁵Wookhalamo ovaanelela wa asitokweenaanyu, ntoko mwatto onoopa murika anyaanyaka yoovaraawe; munaanyaanya atthu, munkuxa mihakhu ni itthu sootthuneyaxa, mwaakhalihaka asithiyana ancipele asinaamukhweli.

²⁶Asaserdotaanyu ampuhera Nlamulonaka ni anghiiriha itthusaka sootteela; Awosa khaanthanla eriyari ya yootteeliheriwa ni piswa; anxuttiha weera khoovirikanneru eriyari ya yootteela ni yoohitteela; khaampwatthelaru ottittimihera iSaabadusaka, moota wooweera Miyo kimveruliwa eriyaraaya.

²⁷Asitokweenaaya ari mpuwamwaya anlikana ni miici sinnyaanya soovarasaya; angyeeha ephome ewiivaka atthu weera ewine musurukhu moota woohiroromeleya.

²⁸Maprofeetaaya ankuttelela seiyo, elokotthaka muloko ni nyoonelo soolokottha ni sootthoma soowootha. Awosa aneera: ‘Yave onlamula sootheene onghima hiiho’ — Yave ahuulummeene.

²⁹Muloko wa mulaponi annyesereriha oliviwa, wiiyaka; onaahooxa oohaawa ni othoiwa waahasulaka anamarwa, waakhoottelaka waapakela ekhaikhai.

³⁰Koomwaasaasa eriyaraaya mulopwana eera arasele exiri ni eemelele mitari vamaithoniwaka, eerelaka elapo ela, weera Miyo kihiphwate, mene nkimphwannyeru.

³¹Tivawo kineeraaka kaayeeherase isarasaka ni kaalalihe ni onyoonyaxiwawaka woovarela; koottaruxelakani yoonanara opankaaya,’ onghima Yave onlamula sootheene.”