Read Makhuwa-Shirima Ezekiyeli 23 Bible Online

Ezekiyeli 23 - Makhuwa-Shirima bible

Ezekiyeli 23

²“Mwaana a mutthu, yaakhala asithiyana eeli, yaayariwe ni maayi mmoharu.

³Awosa yaathatuwasa mapuuta wExipitu, evarexexaka opuuta okhuma emwalaaya. Mulaponi mmwe, ikakasasaya saatheelihasiwa ni mapelaaya a emwali yaavarakasiwa.

⁴Mutokweene iitthaniwa Ohola ni munneiye Oholiba. Awosa yaari awaka ni yaahaayarasa anamwane asilopwana ni asithiyana. Vano Ohola ti Samariya, ni Oholiba ti Yerusaleemu.

⁵Ohola aavarexexa opuuta areene nlelo awaka; owo aasareya waahaawelaxa yaawo aakonanaawe — anakhotto a awAsiriya,

⁶ewanreene sooxeera, maguvernadori ni asitokweene a anakhotto, ootheene awo yaari amiravo ooreera ni anamweettiha ikavalu*.

⁷Owo aahiixinnyerera moopuutani wa ooreerela ootheene a awAsiriya, aniivalihano miluku sootheene sa khula mulopwana aamuhaawelaawe.

⁸Owo khaahiyale opuuta aapacenraawe wExipitu, mweehuhuni ya emwalaawe asilopwana yaamukonano, yaavaravarasa mapelaawe a emwali, emuyeeheraka soohaawelasaya.

⁹Tivawo kimwinnyerenraaka mmatatani mwa yaawo aakonanaawe — awAsiriya, mwa yaawo owo aahaawelaxaawe.

¹⁰Awosa yaamurulasa soowara, enamuhiyasa tiriya, yaahaakuxasa anamwanaawe asilopwana ni asithiyana, enamwiivasa ni ekatana. Vahoolo wa ottaruxiwawawe, epilaawe yaari yoonanaraxa eriyari ya asithiyana.

¹¹Munneiye iitthaniwa Oholiba, aahoona yeeyo. Hata hiiho, moohaawelanimwawe ni moopuutani, owo aariheyaxa ompwaha munneiye.

¹²Aahaahaawelatho awAsiriya, maguvernadori ni asitokweene a anakhotto, anakhotto oowarelasa sootheene soolikana. Ootheene awo yaari amiravo oophwaneliwa ni anamweettiha ikavalu*.

¹³Kaahoona weera owotho aahiivaliha; ooweeli yaatthara ephiro emoharu.

¹⁴Vaheera Oholiba aatepihaxa opuutaawe. Aawoona asilopwana oocaambuliwa vaxirini, icaambulo sa aKaldeya, sicaambuliweene ni yooxeera,

¹⁵yaawanreene alaamba ni iturbante seera pettu pettu mmuru; ootheene yaalikana ni asitokweene a aBabiloniya yeettiha ikaaro, ooyareliwa oKaldeya.

¹⁶Owo awoonakaru, aahaahaawelaxa anaarumihela anamitthenga mpaka oKaldeiya.

¹⁷Vano aBabiloniya, yaahoorwa omwaasaasa, mpaka omukonano, ni moohaawelanimwawe, yaamvalihasa. Avalihiweene ni yaawosa, owo aasusa wa yaawosa oonyooseyeene.

¹⁸Vano aapwaherera ahikhuwanyeihaka oraruwawawe ni aahooniha etiriyaawe, tivawo Miyo kaasunsaaka wa yoowo oonyooseyeene, mooteene yoole kaasunsaaka wa munneiye.

¹⁹Wa soothesene, owo annatepaxa onyoowa, uupuwelelaka mahuku a emwalaawe aararuwaawe wExipitu.

²⁰Aahaahaawelaxa yaawo aakonanaawe, mipatta sa erutthu saari ntoko sa buuru mwaaxaana, ni owelawawe waari ntoko owelana wa ikavalu*.

²¹Hiiho, Oholiba, moohaawela yoosiva ya emwalaanyu, mwa yeeyo wExipitu ekakasaanyu yaatheelihasiwa ni mapele a emwalaanyu yaavarakasiwa.

²²Tivawo Yave onlamula sootheene oneeraawe ha: Kinimwaathubera yaawo munaakonanaanyu weera yoowananeni nyuwo — yaale mwaasunsaanyu oonyooseyeene, ni kinimwaaruuha weera yoowananeni mmipattani sootheene —

²³aBabiloniya ni aKaldeya ootheene, atthu a oPekode, oXowa ni oKowa vamoha ni awAsiriya ootheene, amiravo ooreera, ootheene ereene maguvernadori ni asitoweene a anakhotto, asitokweene anghoolela ikaaro ni atthu oottittimiheyaxa ni ootheene ari anamweettiha ikavalu*.

²⁴Awosa eniyoorweeleni ekuxaleene ikapwitthi, vamoha ni ikaaro sincipale, ni anakhotto ancipale; eniyoothataaneleni mipatta sootheene ni ixikudu* itokweene ni ikhaani vamoha ni ikapaseti. Kinoowinnyererani wa yaawosa weera yoottaruxeni, ni awosa eniyoottaruxeleni ettharaka mootaaya wa ottaruxa.

²⁵Kinimooruuhelani isara sa ehacaaka, ni enyoonyasiweene, awosa anoosuwela moota woowoopakani. Anoothikila ephulaanyu ni maaruwaanyu, ni atthu eneera ehalahale animwiiviwa ni ekatana. Animwaakuxa anamwaniinyu asilopwana ni asithiyana, ni yaawo eniihalahale anoolalihiwa ni mooro.

²⁶Anoowaakhanitho soowarasanyu yaakuxeke axiveevaanyu ooreera.

²⁷Hiiho, kinoomaliha onyoowawanyu ni opuutaanyu nyuwo mwaapacenraanyu wExipitu. Nyuwo mmuhiye oweha woohaawela itthusene seiya ni khamuupuwelelatho wExipitu.

²⁸Vano Yave onlamula sootheene oneera ha: Kihanle vakhaani owinnyererani mmatatani mwa yaale munaathanyaanyu, mwa yaale nyuwo mwaasunsaanyu oonyooseyeene.

²⁹Awosa eniyoopakeleni moota woothanyeya ekuxaka sootheene nyuwo mphwannyaanyu mmutekonimwanyu. Awosa eniyoohiyeeni yoorunleeneni mukhalaka tiriya, ni wuulihiheya muru wa opuutaanyu onimoonihereya. Eyo eniyookhumeleleni niwoko na otakhalawanyu ni oveleela erutthwaanyu,

³⁰niwoko nyuwo moohaawelaxa miloko ni muniivalihano milukusaya.

³¹Nyuwo mookuxera ephiro ya munninyu; mwaha wa yeeyo Miyo kinimwiikaathi ekoomixaawe mmatatanimwanyu.

³²Yave onlamula sootheene oneera ha: Nyuwo mmwiwure ekoomixi ya munninyu, ekoomixi etokotoko ni yoowiixa; eyo enootannyera otheiwa ni otthebwiwa moota woohilikanxereya.

³³Nyuwo onimootepelaxani ohapaliwa ni othanana, ekoomixi eyo ya ehasara ni oheleya nthala, aani ekoomixi ya munninyu Samariya.

³⁴Nyuwo mmwiwure, mmiraka mpaka nttonyo nookisera; vahoolowaya, mmwipwexakase ni mmuthikile mapelaanyu. Miyo koohima, onghima Yave onlamula sootheene.

³⁵Vano Yave onlamula sootheene oneera ha: Mweenre nyuwo mukittiwala Miyo, munakirera ettuli, munoohaawa niwoko na otakhalawanyu ni opuutaanyu.”

³⁶Yave aakeerela: “Mwaana a mutthu, nyuwo munoomuthoriha Ohola ni Oholiba? Vanonto, mwaawanane ni soopakasaya soohiira,

³⁷niwoko awosa aararuwa ni mmatatanimwaya ori ephomeru. Aararuwano milukusaya; mpakatho ahaahisa ntoko sooveleela anamwanaaya asilopwana wa milukusaya, mwa yaawo yaakiyarenlaaya.

³⁸Aakipakelatho ha: Ehuhuweene yeele, yaavaliha Nipuronaka Nootteela*, enahiiriha iSaabadusaka.

³⁹Nihuku nenenenne yaaveleelasaaya anamwanaaya asilopwana wa milukusaya, awosa yaamvolowa vaNipuroniwaka Nootteela*, enahiiriha. Ti yeeyo apankaaya Mpaanimwaka.

⁴⁰Awosa yaahaarumihasatho anamitthenga eweerelasaka asilopwana yaarweelasa ottaiwene, ni asilopwana awo ephiyakaru, nyuwo mwaarapa weera ngwaakhelele; mwaaphwaneliha maitho, munaawara axiveeve.

⁴¹Nyuwo mwaakilaathi vahiceni yooreeraxa, ohoolowanyu yaakhala meesa, mwa yaawo nyuwo mwiikaathiyaanyuwo erubani* ni makhura yaari awaka.

⁴²Mukhwipimwawe wiiwanyeya onyakula wa atthu ancipale yahaakacamiheya — aSabeyani yaaruuhiwe onikareni vamoha ni asilopwana oohiyanahiyana, ni awosa yaangwariha ipangiiri muthiyana ole ni munneiyeenetho, ni icireemba sooreeraxa.

⁴³Vanonto miyo kaahuuluma kimuhimaka yoole aaphwatingwe mooraruwani: ‘Vano mumvarele muteko woopuuta niwoko owo puuta paahi.’

⁴⁴Vahoolowaya alesa yaamukonano. Yaahaakonanosa asithiyana ale ootakhala — Ohola ni Oholiba mooteene yoole onkonaneliwaawe puuta.

⁴⁵Vaheera atthu oororomeleya eniyaattaruxele yeeyo amphwanelaaya asithiyana anraruwa ni angyeeha ephome, niwoko awosa ari anamararuwa ni mmatataniwaya ori ephomeru.

⁴⁶Yave onlamula sootheene oneera ha: Nakupa a atthu aawanane ni awosa yinnyereriwe mootteenguwani ni moohuhuliwani.

⁴⁷Nakupa anaavonye maluku ni anaanyaanye ni ekatana; anaawiive anamwanaaya asilopwana ni asithiyana, ahiseke impasaya.

⁴⁸Hiiho kinoomaliha otakhala wa mulaponi weera asithiyana ootheene yooperereye ni ehootakihaseni.

⁴⁹Nyuwosa munoohaawa nttaruxo na ohaawelawanyu ni munoottaruxiwa niwoko na soottheka moolapani miluku. Hiiho nyuwosa munoosuwela weera Miyo ti Yave.”