Read Makhuwa-Shirima Ezekiyeli 27 Bible Online

Ezekiyeli 27 - Makhuwa-Shirima bible

Ezekiyeli 27

¹Yave aahuuluma ni miyo, eeraka:

²“Mwaana a mutthu, mulalamikele oTiro.

³Muleele oTiro ori vamulako wa ephareiya, ni ommweetta nakoso ni miloko sinkhala muxerexere ephareiya: ‘Yave onlamula sootheene oneera ha: Nyuwo mwaleele ha oTiro: “Ophwaneliwawaka ti wookwanela.”

⁴Eriyari ya ephareiya yaari omwenaanyu, anamatekaanyu ahoophwanelihani moota wookwanela.

⁵Itthaabwasanyu sootheene ti sa ipinyeiru* sa oSeniri; aakuxa esidari* ya oLebanoni weera apakeleno nrimbunanyu na nikula ntokotoko.

⁶Aapakela itthaabwa sineettiheriwa nikula ntokotoko sa nyiri sitokotoko sa oBaxani; sa nyiri sa goferi* saarweela muxerexere ephareiya ya oKipro, aapakela mpuwa mwa nikula ntokotoko sihuruweliweeneno maino a itthepo.

⁷Mitthambosanyu sipakeliwe eliinyu* yooreera yooxoriwa yaaruuhiwe wExipitu, sivarelaka muteko ntoko eneneerowaanyu; sookhuneela nikula ntokotoko saari sooxeera ni sa kanka saarweela muxerexere ephareiya ya wElixa.

⁸Amaki a oSidoni ni wArevadi yaari anamweettihaanyu nikula ntokotoko; asilopwanaanyu oowaaluwa, ii! oTiro, yaari anamweettiha a makula matokotoko*.

⁹Anakhotto oowereene a oGebali yaari aneettottho ooratta opaka makula weera ettiye moothorowa. Makula matokotoko ootheene a mphareiya ni anamweettihaaya yaarweela woothumiherasani nakoswaanyu.

¹⁰aPersiya, aLidiya ni asilopwana a oPuti yaavarela muteko ntoko anakhotto ereene mukhottonimwanyu. Awosa yaathomeya ixikudusaya* ni ikapaseti muxirinimwanyu yooruuhelakani ovuwa.

¹¹Asilopwana a wArevadi ni oHeleki yaalipelela ixirisaya mmipattani sootheene; asilopwana a oGamade yaari mutoorenimwanyu*. Awosa yaathomeya ixikudusaya* muxirinimwanyu saarukureenre; awosa yaakwaneliha ophwaneliwawaya.

¹²oTaresisi woompaka nakoso ni nyuwo, sooneyaka sooreelasanyu sincipale; awosa yaakhumiha eparatha*, eyuuma, eyuuma ya eseeta ni eyuuma yoolipa yaakakhanyihaka ni soothumihasanyu.

¹³oGresiya, oTubali ni oMeseke yaampakasa nakoso ni nyuwo; yaakuxa ipottha ni ikaruma sa ebronze* mwa sooreelasanyu.

¹⁴Atthu a oBete-Togarema yaahaakakhanyiha ikavalu* sooteexa mirindi, ni sa ekhotto mpakatho abuuru mwa soothumihasanyu.

¹⁵Atthu a oRodesi yaampakasa nakoso ni nyuwosa ni ilapo sincipale sa muxerexere ephareiya saathatuwa anamathumaanyu; yaahoolivani ni maino a itthepo ni itthaabwa sa ebanu*.

¹⁶wArani waampaka nakoso ni nyuwo niwoko na soothumihasanyu sincipale; waahoolivani ni yaspe*, ekuwo yooxeera, itthu sooxoriwa, eliinyu* yootteettheya, korali* ni rubi* wa soothumihasanyu.

¹⁷Yuda ni Yixrayeli yaampakasa nakoso ni nyuwo; mwa sooreelasanyu yaahaakakhanyiha etrigu ya oMiniti, ifiigu, oravo, makhura ni balsamu*.

¹⁸Mwaha wa itthu sincipale murinaanyu ni mihakhu sincipale sa sooreelasanyu, oDamasku woompaka nakoso ni nyuwo, woolivakani eviinyu ya oHeleboni ni mapururu a ikhondoolo sa oZahari.

¹⁹aDani ni aGrego a wUzali yaathumasa soothumihasanyu, yaakakhanyihaka ni eyuuma yoohaniwa, kasiya* ni itthu soowunkhelaxa.

²⁰Dedani oompaka nakoso ni nyuwo oothumiherakani mikaandyo sa sookilaathelano ikavalu*.

²¹awArabi ni asitokweene ootheene a oKedari yaari anamathumaanyu; yaampaka nakoso ni nyuwo yoolivakani iputtiputthi, anapunci a ikhondoolo ni a ipuri.

²²Ananakoso a oXeba ni oRaama yaampaka nakoso ni nyuwo; mwa soothumihasanyu awosa yaahaakakhanyiha sooreerelasaya sa soosivasiva soohiyanahiyana, maluku ootthuneyaxa ni eyuuma yoorikaxa.

²³oHarani, oKane, wEdeni ni ananakoso a oXeba, wAxuri ni oKilimade yaampaka nakoso ni nyuwo.

²⁴Moothumihanimwanyu, awosa yaampaka nakoso ni nyuwo, ethumihaka ikuwo sooreera, soowara sa kanka, itthu sooxoriwa ni matthatto a ikoore soovaxavaxiwa ni mikhoyi sooyevela soorithiwa ni malutte oolipaxa.

²⁵Makula matokotoko a oTaresisi anttuutta sooreelasanyu. Mooreiwa mirindi soolemela mureene eriyari ya ephareiya.

²⁶Anamweettihaanyu nikula ntokotoko ahooronghani eriyari ya ephareiya. Epheyo enrweela mpatta wa ninkhuma nsuwa yohoonyaanyerani mphareiya.

²⁷Mihakhusanyu, soothumihasanyu ni sooreelasanyu, anamweettiha a makulaanyu matokotoko, anamiteko a makula matokotoko, ni anamaratta a makulaanyu, ananakoswaanyu ni anakhottwaanyu ootheene ari munikulani nitokotoko anoomireya eriyari ya ephareiya vanihukuni na noomalaanyu.

²⁸Ilapo sa mukerekhere ephareiya nsithukumele yaakhuwelaka anamweettiha a makula matokotoko.

²⁹Anamweetiha ootheene a makula matokotoko, anoohiya makulaaya matokotoko; anamiteko a makula matokotoko ni ootheene aneetta mmakulani matokotoko anookhala muxerexere ephareiya.

³⁰Anookhuwelaxa ni othanana niwoko na nyuwo; animwiihela ntthupi mmuru yiixuupuruxeke vattuurani.

³¹Anoomettha mayihi niwoko na nyuwo ni anoowarela soolalamikano. Anoowiinlelani ni munepa woothananaxa ni murima wooriipeene.

³²Yaakhuwelasaka ni yookhupanyerakani, anoolalamikaxa mwaha wa nyuwo, yeeraka: “Taani otonko omaalihiwa ntoko Tiro, oriciwe ni ephareiya?”

³³Soothumihasanyu saaronghiwaaya ophareiya, nyuwo mwaahakalaliha miloko sincipale; nyuwo mwaahaathadyiriha mamwene a mulaponi ni mihakhusanyu ni sooreelasanyu sincipale.

³⁴Vano mphwatiwaanyu ni ephareiya, moowiixera mwa maahi; mihakhusanyu ni ootheene anoohoolani aamireya ni nyuwo.

³⁵Ootheene ankhala ilapo sa muxerexere ephareiya yohaathananihaxa yeeyo enookhumelelani; mamwenaaya anoova oowoopopiheyeene ni ikhovesaya sohaamora mwaha woowoova.

³⁶Ananakoso a eriyari ya miloko angwoopelani murika yaawoonakani; woophiya ommaleloniwanyu woowoopiha, ni nyuwo khamukhalatho.’ ”