Read Makhuwa-Shirima Ezekiyeli 3 Bible Online

Ezekiyeli 3 - Makhuwa-Shirima bible

Ezekiyeli 3

¹Owo aakeerela: “Mwaana a mutthu, mukhuure nikwakhwala nna; vahoolowaya murowe ni muulume ni muloko wa oYixrayeli.”

²Miyo kaahaathama ni owo aakivaha nikwakhwala weera miyo kikhuure.

³Vano aakeerela: “Mwaana a mutthu, mukhuure nikwakhwala nna kinoovahaakani, ni mvone.” Hiiho miyo kaakhuura, ni mmwaanomwaka naacoocowa ntoko oravo.

⁴Vahoolowaya, owo aakeerela: “Mwaana a mutthu, vano murowe omulokoni wa aYixrayeli ni mwaaleele maswaaka.

⁵Nyuwo khamunrumiheliwa omulokoni wa nuulumo nohiiweya ni noorika, mene wa muloko wa aYixrayeli;

⁶khamunrowa mmilokoni sincipale sa nuulumo nohiiweya ni noorika, mwa seiyo maswaaya nyuwo muhingweraanyu wiiwexexa. Vekhaikhai, miyo koorumihenleni wa seiyo, miloko iyo saangwiiwani.

⁷Vaheera muloko wa aYixrayeli khoontthuna owiiwani niwoko owo khoontthuna okiiwa. Vano muloko wootheene wohuumiha murima ni woottiyamaaru.

⁸Wa soothesene, miyo kinimootatuxani oottiyamaaru ni oowuumiha murima ntoko yaawo.

⁹Eyuucaanyu kinootatuxa yoolipaxa opwaha maluku, aani opwaha mwala woolipaxa. Muhiwoove, hata muhitteenguwe mwaawoonaka, arookhalaru muloko woovaanya.”

¹⁰Owo aapwaherera eeraka: “Mwaana a mutthu, mwiiwe nnenesene ni muhele vamurimani masu ootheene kineeraaka kooleeleni.

¹¹Vano murowe wa axunninyu aronghiwe wootthukiwani ni mwawuulumane. Mwaaleele, hata yiiwe, ehiiwe: Yave onlamula sootheene ti oohimala.”

¹²Vahoolowaya, Munepa waakittukhula, kiniiwa okhuwelaxiwa ottuliwaka ntoko ha:” Ovuwa wa Yave ottottopeliwe omankaawewo!”

¹³Kaahiiwa oruma wa mapupha a ikhalelo sa okumi emananaka, ni muxerexeremwaya, oruma wa mareko, aani oruma otokotoko!

¹⁴Vano Munepa waakittukhula onakivenxawo, munepaaka othanananxeene ni owaawanxeene musarani, ntata noolipaxa na Yave nreene mwa miyo.

¹⁵Kaarowa wa anamatthukiwa yaakhala oTeli-Habibe, muxerexere mooloko Kebari. Wu kaakhala eriyaraaya mahuku mathannameeli kirukureereiyeene muru!

¹⁶Emanleene mahuku mathannameeli, Yave aahuuluma ni miyo.

¹⁷Owo aakeerela: “Mwaana a mutthu, Miyo kohoopakani namalipelela a muloko wa aYixrayeli; tivawo, mwiiwe masu kinghimaaka ni mwaaleele woopererawaka.

¹⁸Miyo kaamweerelaka mutakhali weera onimookhwa, ni nyuwo mwaahimooperera, hata mwaahimuleela weera ahiye mweettelowaawe woonanara eerelaka woopola okumaawe, mutakhali owo onimookhwa niwoko na sootakhalasawe, vaheera wa Miyo, nyuwo munookhalano nthowa na okhwawawe.

¹⁹Wa soothesene, nyuwo mwamooperera mutakhali ni owo aahihiya otakhalawawe ni mweettelowaawe woonanara, owo anaakhwele sootakhalasawe, vaheera nyuwo mmwiivuluxe okumaanyu.

²⁰Mooteene yoowo, oororomeleya ahiya ororomeleyawawe, anapaka yoonanara, ni Miyo kamwiikaathera nluku nookwattula ohoolowawe, owo anaakhwe. Vano mweenre nyuwo muhimooperera, owo anaakhwele soottheka opankaawe. Soopakasawe soororomeleya nsuupuweleliwa ni wa Miyo, nyuwo munookhalano nthowa na okhwawawe.

²¹Wa soothesene, nyuwo mwamooperera oororomeleya ni owo aahittheka, vekhaikhai owo anaakhale ni okumi niwoko ohiiwelela woopereriwa, ni nyuwo khamukhalano nthowa.”

²²Iwe, ntata na Yave naari mwa miyo, ni Owo aakeerela: “Mvenye ni murowe onghawalawani ni kinimuulumawo ni nyuwo.”

²³Vano, kaavenya, kinarowa onghawalawani. Iwe, waakhalawo ovuwa wa Yave, ntoko ovuwa koonnaaka muxerexere mooloko Kebari. Kaahuuramihela vathi ekhove.

²⁴Vano Munepa waakivolowa, onakeemexa. Owo waakeerela: “Murowe owaani ni mwiiwalelewo.

²⁵Vanonto nyuwo, mwaana a mutthu, munootthukiwa ni mikhoyi moota wooweera khamuwera okhumela eriyari ya muloko.

²⁶Kinoopakiha weera nluminanyu nitthukeye waahottokoroko weera mmaale ni muhiwere waawiiha, arookhalaru muloko woovaanya.

²⁷Vaheera Miyo kuulumaka ni nyuwo, kinoohula eyanowaanyu ni nyuwo mmwaaleelase weera Yave onlamula sootheene oneera ha: ‘Yoowo ontthuna wiiwa, iiwe, ni yoowo ohintthuna, akhootte, niwoko awosa ti muloko woovaanya.”