Read Makhuwa-Shirima Ezekiyeli 32 Bible Online

Ezekiyeli 32 - Makhuwa-Shirima bible

Ezekiyeli 32

¹Vanihukuni noopacera na mweeri wanaamuloko ni miili wa eyaakha yanaamuloko ni piili, Yave aahuuluma ni miyo, eeraka:

²“Mwaana a mutthu, mmwiipele Farawu*, mwene a wExipitu ecipo ya olalamika, ni mmweerele: ‘Nyuwo muri ntoko mwatto eriyari ya miloko, ntoko enowa yoowoopihaxa ya moowiixera, enyoongolowaka mmaxaapwanimwanyu, etekumihaka maahi ni yiihelaka nttoko ni inaawosanyu.

³Yave onlamula sootheene, oneera ha: Kinimooreyani ntthavinaka ohoolo wa muloko mwincipale, ni awosa animookhumiherani omokoni muntthavinimwaka.

⁴Kinimookhumiherani omokoni, koovonyerekeni mutuphini. Kinoohiya ipalame sootheene sa wiirimu soopakakani wootthawelawaya, ni axinama a mulaponi moothemwene animookhuurani mpaka ovona.

⁵Kinimwaaneya erutthwaanyu mmanyaakoni, ni mmareyareyani kinoosariha makhuvaanyu.

⁶Elapo kinoosariha ephomaanyu ephiroweeneeyo mpaka mmanyaakoni, ni mareyareya anoosareya erutthwaanyu.

⁷Koophwatakani, kinookuttelela erimu kirimiheke ithenyeeri; kinookuttelela nsuwa ni nihutte, ni mweeri khawaara.

⁸Ithenyeeri sinaara wiirimu nsoorimeleni, ni kinooruuha epiphi mulaponimwanyu, onghima Yave onlamula sootheene.

⁹Kaatannyaka ophwatiwawanyu eriyari ya miloko, kinootutuxa miloko sa atthu ancipale, mulaponi mwahaasuwenlaanyu.

¹⁰Kinoopakiha weera saawoonakani miloko sincipale suumiwe owanoni, ni weera mamwenaaya yoopihaxiwe niwoko na nyuwo, Miyo kaavukhulaka ekatanaaka ohoolowaya. Vanihukuni na omorawaya, khula mutthu a yaawo anaathukumele ni woova woohihiyerera mwa okumaawe.

¹¹Niwoko Yave onlamula sootheene, oneera ha: Ekatana ya mwene a oBabiloniya enimoorweelani.

¹²Kinoopakiha weera ancipale a mulokwaanyu yiiviwe ni ekatana ya aweri, oohimorelaxa ikharari a miloko sootheene. Awosa eniiphwate wiixoona wa Exipitu, ni mulokwaawe wootheene onoowiniwa.

¹³Kinoophwatela muhuwaawe wootheene, muxerexere wa maahi mancipale, mwa yaawo eneera ehitekumihiwetho ni nnaawo na mutthu, hata eneera ehisarihiwe nttoko ni mapita a axinama.

¹⁴Vano, kinoohiya maahaaya elakhelaka, ni maxaapwaaya epiluwaka ntoko makhura, onghima Yave onlamula sootheene.

¹⁵Miyo kaamphwataka Exipitu ni kaavenxaka sootheene sirimo, kaawiivaka ootheene amankemo, awosa anoosuwela weera Miyo ti Yave.’

¹⁶Wu ti olalamika wa ecipo eneeraaya yiipe mwaha wa yoowo. Anamwane asithiyana a miloko eniyiipe; awosa eniyiipe mwaha wa wExipitu ni nakupaaya ootheene, onghima Yave onlamula sootheene.”

¹⁷Vanihukuni nanaamuloko ni mathanu na mweeri, wa eyaakha yanaamuloko ni piili, Yave aahuuluma ni miyo, eeraka:

¹⁸“Mwaana a mutthu, munlalamikele nakupa a wExipitu ni munkuruxele mulittini, okhuma owo mpaka anamwane asithiyana a miloko sa aweri, vamoha ni yaawo ankuruxeliwa mulittini.

¹⁹Mweerele muloko: ‘Weeraka ti nyuwo mphwanenle opwatthiwa opwaha miloko sikina? Mukhuruwe ni mwiixaatalele vamoha ni oohiineliwa.’

²⁰Awosa eniimore eriyari ya yaawo yiiviwe ni ekatana. Ekatana eri yoorehereriweene; awosa epurulasiwe vamoha ni nakupa ootheene a mulokwaaya.

²¹Munihiyeni, ahooleli ooweraxa enimweerele Exipitu ni yaawo iiraanannaawe: ‘Awosa aakuruxeliwa mulittini ni aniixaatalela vamoha ni oohiineliwa — ni yaawo yiiviwe ni ekatana.

²²Asiriya ori vale vamoha ni anakhottwaawe ootheene; orukureeriwe ni mahiye a anamakhwa ootheene, aani, ootheene yiiviwe ni ekatana.

²³Mahiyaaya ari moowiixera, ni anakhottwaaya aniixaatalela muxerexere mwa nihiyenaya. Ootheene yaamwaraxenle otteenguwa mulaponi mwa akumi ahiiviwa ni ekatana.

²⁴wElami ori vale ni mulokwaawe wootheene orukureenre nihiyenaya. Ootheene awo ahiiviwa ni ekatana. Ootheene yaamwaranxe otteenguwa mulaponi mwa akumi aakuruxeliwa mulittini oohiineliweene. Aniireya wuulihiheyawaya muru vamoha ni yaawo ankuruxeliwa mulittini.

²⁵Ooreherereliwa ekaama eriyari ya anamakhwa vamoha ni anakhottwaawe ootheene arukureenre nihiyenawe. Ootheene awo ti oohiineliwa, yiiviwe ni ekatana. Woopihawawe waamwareela mulaponi mwa akumi, tivawo awo aniireyaaya overuliwawaya vamoha ni yaawo ankuruxeliwa mulittini; aniixaatalela eriyari ya anamakhwa.

²⁶Meseki ni Tubali, ari vale vamoha ni mulokwaaya wootheene erukureenreene mahiyaaya. Ootheene awo ti oohiineliwa ni yiiviwe ni ekatana, niwoko yaamwaraxela woopihawaya mulaponi mwa akumi.

²⁷Khaaniixaatalela vamoha ni anakhotto akina oohiineliwa, yiiviwe enakuruxeliwa mmahiyeni ni ikapwitthisaya sa ekhotto, mwa yaawo ikapwitthisaya siikaathiwe waamuruwaya? Nttaruxo na sootakhalasaya nri mmakhuvanimwaya, niwoko otteenguwa waatannyeriwe ni anakhottwaaya, nooviravira mulaponi mwa akumi.

²⁸Ii! Farawu*, nyuwotho munimwiiviwa ni mmwiixaatalele eriyari ya oohiineliwa, vamoha ni yaawo yiiviwe ni ekatana.

²⁹Edomi ori vale, mamwenaawe ni asitokweenaawe ootheene; ni naari ekhalaka ooweraxa, aniixaatalela vamoha ni yaale yiiviwe ni ekatana. Aniixaatalela ni oohiineliwa, vamoha ni yaawo ankuruxeliwa mulittini.

³⁰Asitokweene ootheene a mpatta wa ottuttuwani ni aZidoni ootheene ari vale; awosa aakuruxeliwa mulittini esareiyeene wuulihiheya muru, yaarookhalanaru owera otannyera otteenguwa. Awosa aniixaatalela oohiineliweene vamoha ni yaawo yiiviwe ni ekatana, ni aniireya overuliwawaya vamoha ni yaawo ankuruxeliwa mulittini.

³¹Farawu* vamoha ni anakhottwaawe ootheene anaawoone ni anaapepesiwe mooyeleelanimwawe mulokwaawe wootheene, wiiviwe ni ekatana, onghima Yave onlamula sootheene.

³²Kaaroopakiharu weera owo amwaraxele otteenguwa mulaponi mwa akumi, Farawu* ni mulokwaawe wootheene eniyiixaatalele eriyari ya oohiineliwa, vamoha ni yaawo yiiviwe ni ekatana, onghima Yave onlamula sootheene.”