Read Makhuwa-Shirima Ezekiyeli 34 Bible Online

Ezekiyeli 34 - Makhuwa-Shirima bible

Ezekiyeli 34

¹Yave aahuuluma ni miyo, eeraka:

²“Mwaana a mutthu, mwaathaliherele otthuna wa Muluku akukhuli a oYixrayeli; mwaathalihere ni mwaaleele weera Yave onlamula sootheene oneera ha: ‘Ii! Akukhuli a oYixrayeli aniipwattha asineenaayaru! Weeraka khawaatthuneya weera akukhuli ekosoope mihuwo?

³Nyuwosa mungwura mukaka, mungwara sa mutteengo ni mungwiiva axinama ooreerela, mene khamunkosoopa muhuwo.

⁴Nyuwosa khamulipihenre yoohilipa, hata khamulaminghe yoovoreiwa, naari khamutthunke nikhwattanaya. Nyuwosa khamuhokolonxe soothweelela naari khamwaasaanse sooriheya. Nyuwosa munuumela murima mooxililini.

⁵Tivawo iyo simwareiyaaya, niwoko khawoworu mukukhuli, ni simwareiyeene, iyo soothatuwa yooca ya axinama a mutuphini.

⁶Ikhondoolosaka sooxoraxorela mmanyaakoni ni mmattumuxani oorakamela osulu ootheene. Soomwareela elapo yootheene, ni khaawo otthukuruwenle ni aasaanse.

⁷Tivawo, akukhuli, mwiiwe masu a Yave:

⁸Kinlipela mwa okumaaka, onghima Yave onlamula sootheene: Weenre muhuwaaka ohikhalanaka mukukhuli, woohuhuliwa, onathatuwa yooca ya axinama ootheene a mutuphini, ni yeenre akukhulaaka ehitthukuruwelaka muhuwaaka, mene aniipwattha asineenaaya ohiya opwattha muhuwo,

⁹vano nyuwosa akukhuli, mwiiwe masu a Yave:

¹⁰Yave onlamula sootheene oneera ha: Koowiitta akukhuli ni nthowa na oriheya wa ikhondoolo ti nawaya. Miyo kinoowaakha muteko woociha muhuwo moota wooweera akukhuli ehikhuuretho. Kinootapuxa muhuwaaka mmwaanomwaya, ni kheekhuuratho ikhondoolo.

¹¹Vano, Yave onlamula sootheene, oneera ha: Yoomeene kinimwaasaasa ikhondoolosaka kikosoopeke.

¹²Miyotho kinookosoopa ikhondoolosaka ntoko mukukhuli onaasaasaawe ikhondoolo sooriheya akosoopaka muhuwo. Vanihukuni na mahutte ni epiphi Miyo kinimoopola mmapuroni moothemwene simwareenlaayamo.

¹³Miyo kinookhumiha mmilokoni sikina, kithukumanyiheke, kihokoloxaka omilokoni sikina, kiruuhelaka mulaponimwaya. Kinoociha mmanyaakoni sa oYixrayeli, mureyareyani ni mmittettheni sootheene sa elapo.

¹⁴Kinookosoopa seiyo moociha mooreera, ni mmanyaakoni soorakamela osulu sa oYixrayeli enookhala elapo sineeraaya sice; wu nsicewo moociha mootikanela mmanyaakoni sa oYixrayeli.

¹⁵Yoomeene kinookosoopa ikhondoolosaka, kihiyeke siixaatalelaka ni siitthuuwaka,onghima Yave onlamula sootheene.

¹⁶Kinimwaasaasa sooriheya, kihokoloxeke soothweelela. Kinootthuka sineera sivulale kilipihereke yoohilipalipa, vaheera sooneneva ni soolipa, kinoophwata. Kinoociha muhuwo moororomeleyani.

¹⁷Wa nyuwo, muhuwaaka, Yave onlamula sootheene oneera ha: Kinoothoriha khula ekhondoolo ni anapunci a ikhondoolo ni anapunci a ipuri.

¹⁸Khawookwanneni oca mooreera? Onootthuneyatho onyikalasa mooca ohanle? Khayookwanneni owura maahi ooreera? Onootthuneyatho wuutuwanyera ni inaawo maahi ahanle?

¹⁹Onootthuneya muhuwaaka oca yeele nyuwosa munyikalansaanyu ni owura maahi yaale nyuwosa muutuwanyenraanyu ni inaawo?

²⁰Tivawo Yave onlamula sootheene ongweerelaawe ha: Moone, Yoomeene nkithorihe eriyari ya ekhondoolo yooneneva ni yoowoonda.

²¹Mweenre mutthunya ni erutthu ni makhata, mukakhaka ikhondoolo soohilipalipa sootheene ni manyaka mpaka woomola,

²²Miyo kinimoopola muhuwaaka, ni owo khoohuhuliwatho. Kinoothoriha eriyari ya ikhondoolo.

²³Kinoomwiikaathi eriyaraaka mukukhuli mmoha, murumeiyaaka Davide, ni owo anaakosoope seiyo ni anaakhale mukukhulaaya.

²⁴Miyo Yave, kinookhala Mulukwaaya, ni murumeiyaaka Davide anaakhale mwaana a mwene eriyari ya seiyo. Miyo Yave, kohuuluma.

²⁵Kinookhaliha wiiraana wa murettele ni seiyo, kihiyeke elapo etapuxeiyeene ni axinama a mutuphini weera ikhondoolosaka siwere okhala soolipeene munikareni ni sikone moothakoni.

²⁶Miyo kinooreeliha seiyo vamoha ni mapuro arukureenre nttumuxanaka. Kinoorupiha epula mweehuhunimwaya; enookhala epula ya mareeliho.

²⁷Nyiri sa mutuphini nsiime soowiimasaya, etthaya eniiruwere soohephasaya, ni ootheene eniikhale oolipeene mulaponi. Awosa anoosuwela weera Miyo ti Yave, kaapasaka onyooro wa opotthaaya, kaatapuxaka mmatatani mwa yaale yaahasula.

²⁸Kheehuhuliwatho ni miloko, hata kheenyaanyiwa ni axinama a mutuphini. Eniikhale oolipeene, ni khaawo anaawoopopihe.

²⁹Miyo kinimwaavaha elapo yoowiiwanyeyaxa ni soohephasaya, ni awosa kheevoliwatho etala mulaponi, hata kheetthebwiwa ni miloko.

³⁰Hiiho, awosa anoosuwela weera Miyo Yave, Mulukwaaya, kiri ni yaawosa, ni awosa, muloko wa oYixrayeli, ti mulokwaaka, onghima Yave onlamula sootheene.

³¹Nyuwosa, ikhondoolosaka, mwa seiyo kinkosoopaaka, ti mulokwaaka; Miyo ti Mulukwaanyu, onghima Yave onlamula sootheene.’ ”