Read Makhuwa-Shirima Ezekiyeli 36 Bible Online

Ezekiyeli 36 - Makhuwa-Shirima bible

Ezekiyeli 36

¹“Mwaana a mutthu, muthaliherele otthuna wa Muluku nyaako sa oYixrayeli, mweeraka: ‘Ii! Nyaako sa oYixrayeli, mwiiwe masu a Yave.

²Yave onlamula sootheene, oneera ha: ‘Mwaha wa nyuwosa mwiittana eenre ha: “Eya! Eya! Ittuttuwa sa khalayi soothatuwa sawihu.” ’

³Tivawo, muthalihere otthuna wa Muluku ni mweere weera Yave onlamula sootheene, ‘Oneera ha: Awosa yaahoophwatani, enoottharelelasani mmapuroni moothemwene, moota wooweera nyuwosa moothatuwa okhala a miloko sincipale ni ethoonyero ya mutheelelo woonanara ni ya onawunawu wootheene.

⁴Tivawo ii! Nyaako sa oYixrayeli, mwiiwe masu a Yave onlamula sootheene: Owo oneerela ha nyaako, mattumuxa, maxepa, mareyareya, mathala oophwatiwa ni isidade soothaamiwa sihuhuliwe, sinatthebwiwa ni miloko sikina sa mukhwipimwaya:

⁵Yave onlamula sootheene oneera ha: Muhacenimwaka moopatta, kohuulumela miloko sihanle ni wEdomi wootheene, niwoko moohaawelani ni murima woonanara yaakhaliha elapwaaka okhala yawayeene, weera ehuhule mihuwosaya.’

⁶Tivawo, muthalihere otthuna wa Muluku mwaha wa elapo ya oYixrayeli, ni mweerele nyaako, mattumuxa, maxepa ni mareyareya weera Yave onlamula sootheene oneera ha: Kinuuluma ni ehace musaranimwaka, niwoko nyuwosa moohaawa otthebwiwa ni miloko.

⁷Tivawo Yave onlamula sootheene, oneeraawe ha: Kinlipela kitheteiyeene ntata, weera miloko sa mukhwipimwanyu nsihaawetho otthebwiwa.

⁸Vaheera nyuwosa, nyaako sa oYixrayeli, munooruwera iphandi ni soowiima wa mulokwaaka aYixrayeli, niwoko woowaakuveya owo onoohokoleela owaani.

⁹Kinootthukuruwelasani nyuwo, ni nkoowehaseni ni murima wooreera; nyuwosa mmwittipurasiwe ni mmwaaliwe,

¹⁰ni kinoowaandyeererasani, aani, muloko wootheene wa oYixrayeli. Isidade sinoomakiwa ni mathala anooraseliwa.

¹¹Kinoowaattiha atthu ni axinama, ni awosa anooyaranasa yaatteke. Kinimwaatekiha ntoko khalayi, ni kinooweettiherelani nnene opwaha khalayi. Hiiho, nyuwosa munoosuwela weera Miyo ti Yave.

¹²Nyuwosa mulokwaaka wa oYixrayeli, kinoopakiha weera muhokoleeletho mulaponimwanyu, weera mwakhalemotho. Elapo eyo enookhalatho yawinyu ni khangwiiyeratho anamwanaaya.

¹³Yave onlamula sootheene oneera ha: Yeenre atthu eweerelakani: ‘Nyuwo munaanyaanya atthu ni munooceeliha mulokwaanyu okhalano anamwane,’

¹⁴vanonto, okhuma vaanaano va woorowa muhoolo, kinlamulela elapo ela weera muhaanyaanyetho atthu, hata muhaayeleelihetho anamwanaaya, onghima Yave onlamula sootheene.

¹⁵Miyo nkitthuniheratho weera nyuwosa moone matthebwa a miloko, ni nyuwo khamuhaawatho matthebwa a miloko, hata kheemoroxa mulokwaanyu, onghima Yave onlamula sootheene.”

¹⁶Yave aahuulumatho ni miyo, eeraka:

¹⁷“Mwaana a mutthu, aYixrayeli yaakhalaaya mulaponimwaya, awosa yaavaliha elapo eyo ni mweettelowaaya ni ipakelosaya. Mweettelowaaya koonela okhala ntoko ohitteela wa muthiyana areene ni mpingu.

¹⁸Mwaha wa yeeyo kaahaayeehera isarasaka, niwoko awosa aayeehera ephome mulaponi ni aavaliha ni milukusaya.

¹⁹Miyo kaahaamwaraxela eriyari ya miloko ni awosa aamwareelamo; Miyo kohaathoriha kittharihaka mweettelowaaya ni ipakelosaya.

²⁰Vano, weiwo yaarowaayaru eriyari ya miloko, awosa yaahiiriha Nsinanaka Nootteela, niwoko yeerelasiwa: ‘Ola muloko wa Yave, mene waarookhalaru hiiho, waatthuneya okhuma mulaponi yaavahiwaaya ni Yave.’

²¹Kaatthukuruwela Nsinanaka Nootteela, mwa nenne nihiirihiwe ni muloko wa oYixrayeli eriyari ya miloko yaarowaaya.

²²Tivawo, muleele muloko wa oYixrayeli weera Yave onlamula sootheene, oneera ha: ‘Ii! Muloko wa oYixrayeli, khanihiyono nthowananyu kineeraaka kipakele itthu iyo, mene niwoko na Nsinanaka Nootteela nyuwosa muhiirihalaanyu eriyari ya miloko mwaarowaanyu.

²³Kinimoonihera otteela wa Nsinanaka Nootteela nihiirihiwe eriyari ya miloko, Nsina muhiirihalaanyu eriyaraaya. Miyo kiixooniheraka ootteela mwa nyuwosa vamaithoniwaya, miloko sinoosuwela weera Miyo ti Yave, onghima Yave onlamula sootheene.

²⁴Vano Miyo kinimoovenxani eriyari ya miloko, kinimoothukumanyihani eriyari ya ilapo sootheene, koohokoloxerekeni elapwaanyu.

²⁵Kinimoomiserani maahi ooreera ni munootteela; Miyo kinimoocapani ohitteelawanyu wootheene ni wa milukusanyu sikina sootheene.

²⁶Kinimoovahani murima munyowani kiheleke mwa nyuwo munepa munyowani; kinimoovenxani murima wa nluku koovahasekeni wa ethai.

²⁷Kinoohela wa nyuwosa Munepaaka, kipakiheke weera muttharihe ikanosaka ni mwiiwelele oororomeleyeene Malamulowaaka.

²⁸Nyuwosa munookhala mulaponi kaavanghaaka makholowaanyu; nyuwosa munookhala mulokwaaka, ni Miyo kinookhala Mulukwaanyu.

²⁹Miyo kinimoovuluxani moohitteelanimwanyu wootheene. Kinooromola irooro sittupeke, ni nkooruuhelasani etala.

³⁰Kinimwaandyeerera soowiima sa nyiri, ni soohepha sa mmatta, moota wooweera nyuwo khamuhaawatho wuulihiheya muru eriyari ya miloko niwoko na etala.

³¹Hiiho, nyuwosa mmuupuwelele iphirosanyu soonanara ni ipakelosanyu sootakhala, ni munimwiixeettiha murima niwoko na sootakhalasanyu ni ipakelosanyu soohiira.

³²Kintthuna weera nyuwosa musuwele weera nkimpakela yeeyo mwaha wa nyuwosa, onghima Yave onlamula sootheene. Muulihiheye muru ni mwiiyevihe niwoko na mweettelowaanyu, ii! Muloko wa oYixrayeli!

³³Yave onlamula sootheene, oneera ha: Vanihukuni kineeraaka kicape sootthekasanyu sootheene, kinookhaliha isidadesanyu, ni mathala anooraseliwa.

³⁴Elapo yoophwateya enoolimmwa; kheepwaherera yoophwateyeene vamaithoni wa ootheene eniivirewo.

³⁵Awosa eniyeere: “Elapo ela yaari yoophwateyeene, yoothatuwa ntoko nttimbe na wEdeni; isidade saari mathalaru, sookurumuwa ni soophwateya, vano soolipihiwa ni soomakiwa.”

³⁶Vano miloko sineera sikhale mukhwipimwanyu, ni sineera sihakalale nsisuwele weera Miyo Yave koorasela yaaphwatiwe, kinaphatteya yooheleya nthala. Miyo Yave, kohuuluma ni kinoopaka yeeyo.’

³⁷Yave onlamula sootheene oneera ha: Kinimwaakhulelatho wiidyoonttelela wa muloko wa oYixrayeli, kipakelaka ha: Kinootatuxa mulokwaaya woowaattaxa ntoko ikhondoolo,

³⁸ni ntoko mihuwo soowaatta sinronghiwa wooveleeliwani wa ifesta soothanliwa sa oYerusaleemu. Mooteene yoowo isidade sihanle mathalaru, sinoosareya mihuwo sa atthu. Hiiho, awosa anoosuwela weera Miyo ti Yave.”