Read Makhuwa-Shirima Ezekiyeli 37 Bible Online

Ezekiyeli 37 - Makhuwa-Shirima bible

Ezekiyeli 37

¹Ntata na Yave naari ni miyo, ni mwa Munepaawe, Owo aakirongha mureyareyani noosareya makhuva.

²Owo aakeetteettiha, ni kaawera woona weera makhuva yaahaattaxa mureyareyani, ni weera makhuva ale yaahuumaxa.

³Owo aakikoha: “Mwaana a mutthu, makhuva ala anooweratho okhala ni okumi?” Miyo kaamwaakhula: “Ii! Yave onlamula sootheene, ti Nyuwo paahi musuwenle.”

⁴Vano Owo aakeerela: “Muthalihere otthuna wa Muluku makhuva ala ni mweerele: ‘Makhuva oowuuma, mwiiwe masu a Yave!

⁵Yave onlamula sootheene oneerela ha makhuva ala: Kinoopakiha weera iphumu sivolowe mwa nyuwo, ni nyuwosa munookhalano okumi.

⁶Kinoohela mwa nyuwosa misemba, kihuruweleke ni ethai vamoha ni exapala; kinoohela iphumu mwa nyuwosa, ni nyuwosa munookhalano okumi. Hiiho, nyuwosa munoosuwela weera Miyo ti Yave.’”

⁷Vano Miyo kaathalihera otthuna wa Muluku kittharihaka yeeyo kilamuleliwaaka. Kithaliherakaru hiihaale, waakhala munyakunyaku, aani, onyakuleleyaxa ni makhuva, ni awo yaattombaanyereya.

⁸Kaaweha, ni makhuva yaahuruweleya ni misemba, ethai ni exapala, mene khasaarimo iphumu.

⁹Woottharelana, Owo aakeerela: “Mwaana a mutthu, muthalihere iphumu otthuna wa Muluku, ni mweerele weera Yave onlamula sootheene, oneera ha: ‘Ii! Iphumu, murwe okhuma mattuumba maxexe a ipheyo, ni mwiiseelele mpuwa wa anamakhwa ala, weera ekhaleno okumi.’”

¹⁰Kaathalihera otthuna wa Muluku ntoko Owo okilamulenlaawe, ni iphumu saavolowa mwa yaawo; awo yaahaakhela okumi, eneemela. Vano yaari anakhotto ancipale.

¹¹Vano Owo aakeerela: “Mwaana a mutthu, makhuva ala ti muloko wootheene wa oYixrayeli. Awosa aneera: ‘Makhuvaahu ahuuma ni owehererawahu woolakaseya; vano, noomalamalihiwa.’

¹²Tivawo, muthalihere otthuna wa Muluku ni ngweerele weera Yave onlamula sootheene oneera ha: Ii! Mulokwaaka, kinimuuhula mahiyaanyu, kikhumihekemo; kinoohokoloxera mulaponi mwa oYixrayeli.

¹³Vano, kuuhulaka mahiyaanyu, kinookhumihasanimo ni nyuwosa, mulokwaaka, munoosuwela weera Miyo ti Yave.

¹⁴Kinoohela Munepaaka mwa nyuwosa, ni munookhala ni okumi ni Miyo kinimootekihasani mulaponimwanyusa. Hiiho, nyuwosa munoosuwela weera Miyo, Yave, kaahuuluma, kinapaka, onghima Yave onlamula sootheene.”

¹⁵Yave aahuuluma ni miyo, eeraka:

¹⁶“Mwaana a mutthu, mukuxe ekopo emoha ni mulepe: ‘Ekopo ya Yuda ni ootheene ari awawe.’ Vano mukuxe yanaaveeli, mulepe: ‘Ekopo ya Efrayimi, eri ya Yoseefe ni ya muloko wootheene wa oYixrayeli ari awawe.’

¹⁷Muthukumanyihe mukoponi emoha weera eyo ekhale emoha paahi mmatatanimwanyu.

¹⁸Axunninyu yookohakani, yeeraka: ‘Nyuwo khamunnileela etaphulelo ya yeela?,’

¹⁹mwaaleelase weera Yave onlamula sootheene oneera ha: Kinookuxa ekopo eri mmatatani mwa Efrayimi, eri ya Yoseefe ni ya ipuumba sikina iyo sa oYixrayeli siri sawawe, kitakanseke ni ekopo ya Yuda. Hiiho, kinookhaliha ekopo emoha paahi, ni iyo sinoothatuwa emoha paahi mmatatanimwaka.

²⁰Mvarele ikopo vamaithoniwaya, mwa seiyo nyuwo mulempaanyu,

²¹ni mwaaleelase weera Yave onlamula sootheene, oneera ha: Kinimwaakhumiha aYixrayeli mmilokoni arongwaayamo. Kinimwaathukumanyihasa mmapuroni moothemwene yaarukureenre, kaahokoloxereke mulaponimwaya.

²²Miyo kinimwaapaka muloko mmoha paahi wa mulaponi, mmanyaakoni sa oYixrayeli. Wa yaawosa anaakhale mwene mmoharu paahi, ni khasirwa sikhalatho miloko miili, ni iyotho khasikawanyeya omwene miili.

²³Khayiivalihasatho ni milukusaya vamoha ni icaambulosaya sa mwiikho hata wakhalaru ovaanya, niwoko Miyo kinoowoopola moohapuwanimwaya wootthekeya wootheene, kaatteeliheke. Awosa anookhala mulokwaaka ni Miyo kinookhala Mulukwaaya.

²⁴Murumeiyaaka Davide, anaakhale mwenaaya, ni ootheene awo eniikhaleno mukukhuli mmoharu. Eniyeettele malamulowaaka, yiipasoopaka wiiwelela ikanosaka.

²⁵Eniikhalase mulaponi kimvanghaaka murumeiyaaka Yakobe, elapoweene yeeyo yaakhalaaya makholowaaya. Awosa vamoha ni anamwanaaya, mpakatho osuulwaaya eniikhalewo wa mahuku ootheene, ni murumeiyaaka Davide onookhala mwaana a emwenaaya wa mahuku ootheene.

²⁶Kinookhaliha wiiraana wa murettele ni yaawosa; onuukhale wiiraana woohimala. Miyo kinimwaalipiha, kiwaandyeerereke, ni kinimwiikaathi eriyaraayasa Nipuronaka Nootteela*.

²⁷Wookhalawaka onuukhale ni yaawosa; Miyo kinookhala Mulukwaayasa ni awosa anookhala mulokwaaka.

²⁸Vano, Nipuronaka Nootteela* naakhalaka eriyaraayasa mahuku ootheene, miloko nsisuwele weera ti Miyo Yave, kinaatteeliha aYixrayeli.”