Read Makhuwa-Shirima Ezekiyeli 40 Bible Online

Ezekiyeli 40 - Makhuwa-Shirima bible

Ezekiyeli 40

¹Ompacereroni wa eyaakha yanaamiloko miili niithanu ya wootthukiwani elapo ekina, epaceraka eyaakha, vanihukuni nanaamuloko na mweeri, vayaakhani yanaamuloko niixexe emonreene esidade, nihuku nenenenne, ntata na Yave naari mwa Miyo, ni Owo aakironghawo.

²Mmooneloni wa Muluku, Owo aakikunxe elapo ya oYixrayeli ni aakiikaathi vamwaakoni woorakamela osulu, mwa yoowo mpattaaya wa ohitto, saakhala impa saalikana ni esidade.

³Owo aakironghawo, ni kaamoonawo mulopwana aalikana ni ebronze*; owo eemenle vamulako avarenleene mukhoyi wa eliinyu* ni ekopo yooringelano.

⁴Owo aakeerela: “Mwaana a mutthu, ngwehexexe nnenesene ni mukhale oolikaneene wiiwa, ni ngwehexexe nnenesene sootheene kineeraaka kiwoonihereni, niwoko muruuheliwe yeeyo. Muthalihere muloko wa oYixrayeli sootheene muneeraanyu moone.”

⁵Kaahoona exiri yaarince woomalela nipuro na Empa ya Muluku. Orakama wa ekopo yooringelano aakunxaawe mulopwana waari imeetru* tthaaru. Owo aaringa exiri yaarino imeetru* tthaaru sa mwiittaaya, ni imeetru* tthaaru orakamelawaya osulu.

⁶Vahoolowaya aarowa vamulako waari mpatta ninkhuma nsuwa. Aawela ixikadasaya, anaringa mpatta wa vathi wa nsele ni orakamawaya waari imeetru* tthaaru.

⁷Isaala sa anamalipelela saarino imeetru* tthaaru mweerakameloni ni mweekhuveeloni, ni ixiri saasuka saari eriyaraaya saarino mwiitti wa imeetru* piili ni eriyari ya emeetru*. Mpatta wa vathi wa nsele, muxerexere wa mpithela* waawehana Empa ya Muluku, waarino imeetru* tthaaru sa othanuwawaya.

⁸Vahoolowaya owo aaringa nipithela* na mulako mutokweene;

⁹naarino imeetru* ixexe wunnuwawaya, ni mwiitti wa amarimbwaaya waarino emeetru* emoha. Mpithela* wa mulako mutokweene waawehana ni Empa ya Muluku.

¹⁰Saakhala isaala tthaaru sa anamalipelela wa mipatta soomiili sa mulako wa mpatta ninkhuma nsuwa. Sootthaaru saarino muringo mmohamoharu, ni mwiitti wa amarimbwaaya waarino muringo mmohamoharu.

¹¹Woottharelana, owo aaringa mweekhuveeloni wa nsele na mulako; waarino imeetru* ithanu, ni mweerakamelonimwaya waarino imeetru* ithannamosa ni eriyari ya emeetru*.

¹²Ohoolo wa khula esaala ya anamalipelela, yaakhala exiri, orakamelawaya osulu waari wa eriyari ya emeetru* emoha, ni isaalasene seiyo saamulikanela sikhalanaka imeetru* tthaaru wa khula mpatta.

¹³Vahoolowaya owo aaringa mulako okhuma vanipathoni na esaala emoha mpaka nipatho na esaala yaawehanaaya; orakamelanawaya waari imeetru* muloko ni piili ni eriyari ya emeetru* okhuma nlaka na esaala emoha mpaka nlaka naawehanaayano.

¹⁴Aaringa orakama wa osuka wa ixiri sa mpuwa wa mipatta sootheene sa mpuwa wa mulako; waari imeetru* miloko miraru ni piili. Orakamawaya waaphiya mpithela* woorowa vanipuwani.

¹⁵Orakamelana okhuma vamulako wa mpatta wa omokoni mpaka mpithela* wa mulako wa mpuwa, waarino imeetru* miloko miili niithanu.

¹⁶Isaala ni ixiri sa osukawaya wa mulako saalipeleliwa ni malaka oophureya erukureeriweene ni hiihotho mpithela*. Malaka awo ootheene yaaweha mpuwa. Amarimbwaaya yaacaambuliwa mavare.

¹⁷Vahoolowaya, aakirongha vanipuwani na omokoni. Kahoonawo ikwaartu ni yoonyikalela yaapakiwe erukureerihiwaka nipuwa nootheene; wa yoonyikalela yootheene saakhalamo ikwaartu miloko miraru.

¹⁸Yoonyikalela ele yaari muxerexere milako ni mweekhuveelonimwaya waamulikanela ni mweerakamelonimwaya. Eyo yaari yoonyikalela ya vathi vathi.

¹⁹Woottharelana, owo aaringa orakama wa mpatta wa mpuwa wa mulako wa vathi vathi mpaka omokoni wa nipuwa na mpuwa. Waarino imeetru* miloko mithanu ni imeetru* tthaaru — mpatta ninkhuma nsuwa nitho mpatta wa ottuttuwani.

²⁰Vahoolowaya aaringa mweerakameloni ni mweekhuveeloni wa mulako ori mpatta wa ottuttuwani omvoleeliwa nipuwa na omokoni.

²¹Isaalasaya — tthaaru wa khula mpatta, amarimbwaaya ni mapithela* yaamulikanela mweerakameloni wa mulako woopacera. Waarino imeetru* miloko miili niithanu mweerakameloni, ni imeetru* muloko ni piili ni eriyari ya emeetru* mweekhuveeloni.

²²Malakaaya, mapithelaaya* ni moophwanelihiwamwaya ni mavare, waamulikanela ni mulako owenghe mpatta ninkhuma nsuwa. Saakhala ixikada ithannapiili woorowa weiwo, ni mpithelamwaya* waawehana ni seiyo.

²³Waakhala mulako waavoleeliwa vanipuwani na mpuwa waawenghe mulako wa mpatta wa ottuttuwani, mpakatho waari mpatta ninkhuma nsuwa. Owo aaringa mulako waawehanaayano; waarino imeetru* miloko mithanu ni imeetru* tthaaru.

²⁴Vahoolowaya aakirongha mpatta wa ohitto, ni kaahoonawo mulako waawehana mpatteene yoowo. Owo aahaaringa amarimbwaaya ni mapithelaaya*, ni awo yaamulikanela ni makinaawo.

²⁵Mulako ole ni nipithelanaya* saakhalano malaka oophureya mukhwipimwaya, ntoko malaka a milako sikina iye. Saarino imeetru* miloko miili niithanu mweerakameloni ni mweekhuveeloni saari imeetru* muloko ni piili ni eriyari ya emeetru*.

²⁶Saakhala ixikada ithannapiili woorowa weiwo, ni nipithelanaya* naawehana ni seiyo; amarimbwaaya yaaphwanelihiwa ni mavare wa khula mpatta.

²⁷Mpakatho nipuwa na mpuwa naakhalano mulako waaweha mpatta wa ohitto, ni owo aaringa okhuma mulako ole mpaka mulako wa omokoni wa mpatta wa ohitto; saari imeetru* miloko mithanu ni imeetru* tthaaru.

²⁸Woottharelana, owo aakirongha vanipuwani na mpuwa akivirihaka vamulako wa mpatta wa ohitto, anaringa mulako owo; miringosaya saamulikanela ni miringo sikina.

²⁹Isaalasaya, amarimbwaaya ni nipithelanaya*, miringosaya saamulikanela ni sikina iyo. Mulako owo ni nipithelanaya*, saakhalano malaka mukhwipimwaya. Mweerakamelonimwaya saari imeetru* miloko miili niithanu, ni mweekhuveeloni imeetru* muloko ni piili ni eriyari ya emeetru*.

³⁰Mapithela* yaavoleeliwa mukhwipi wa nipuwa na mpuwa, mweekhuveelonimwaya yaarinotho imeetru* muloko ni piili ni eriyari ya emeetru* ni othanuwawaya waari imeetru* piili ni eriyari ya emeetru*.

³¹Nipithelanaya* naaweha mpatta wa onipuwani na omokoni, amarimbwaaya yaaphwanelihiwa ni mavare, ni ixikada ithannatthaaru saaweliwa mpaka vaavaawo.

³²Vahoolowaya owo aakirongha vanipuwani na mpuwa mpatta ninkhuma nsuwa, anaringa mulako; miringosaya saamulikana ni sikina iye.

³³Isaalasaya, amarimbwaaya ni nipithelanaya*, miringosaya saamulikanela ni sikina iyo. Mulako owo ni nipithelanaya*, saakhalano malaka mukhwipimwaya. Mweerakamelonimwaya saari imeetru* miloko miili niithanu, ni mweekhuveeloni imeetru* muloko ni piili ni eriyari ya emeetru*.

³⁴Nipithelanaya* naaweha mpatta wa onipuwani na omokoni; mipatta sootheene sa amarimbwaaya saaphwanelihiwa ni mavare, ni ixikada ithannatthaaru saaweliwa mpaka vaavaawo.

³⁵Vahoolowaya, owo aakirongha vamulako wa mpatta wa ottuttuwani, anaringa; miringosaya, saamulikana ni sikina iye,

³⁶mpakatho miringo sa isaalasaya, amarimbwaaya ni nipithelanaya*, ni saakhalano malaka mukhwipimwaya. Mweerakamelonimwaya waarino imeetru* miloko miili niithanu, ni mweekhuveelonimwaya imeetru* muloko ni piili ni eriyari ya emeetru*.

³⁷Nipithelanaya* naaweha mpatta wa onipuwani na omokoni; mipatta sootheene sa amarimbwaaya saaphwanelihiwa ni mavare, ni ixikada ithannatthaaru saaweliwa mpaka vaavaawo.

³⁸Ekwaartu ni mulakwaaya yaari mpithela* mwa khula mulako wa mpuwa, saarapiheliwaayawo sooveleela soohisa.

³⁹Mpithela* mwa mulako, yaakhala meesa meeli wa khula mpatta, mwa weiwo siiveliwaayawo sooveleela soohisa, sooveleelela yoottheka ni sooveleelela nthowa.

⁴⁰Vaxirini ya omokoni wa nipithela* naavoleeliwa muxerexere ixikada sa mulako wa mpatta wa ottuttuwani, yaakhala meesa meeli, ni mpatta mukina wa ixikada, yaakhalatho meesa meeli.

⁴¹Vano, mpatta mmoha wa mulako yaakhala meesa maxexe ni maxexetho mpatta mukina siiveliwaayawo sooveleela. Otakansa yaari meesa mathannamararu.

⁴²Yaakhalatho meesa maxexe a maluku ookheriwa wa sooveleela soohisa. Khula meesa, yaarino isentimeetru* miloko mithannamiili niithanu mweerakameloni nitho mweekhuveeloni, ni isentimeetru* miloko mithanu orakamelawaya osulu. Mmo, siikaathiwa ikaruma soowiivela sooveleela soohisa ni sooveleela sikina iyo.

⁴³Saakhalatho soongweyano sa mipatta miili, khula mpatta waakhalano ikatha ixexe sa mweerakamelonimwaya, saakhomeliwe vaxirini yootheene. Muteko wa meesa waari wa wiikaathi enama ya yooveleelela.

⁴⁴Mpatta wa omokoni mwa nipuwa na mpuwa, ohinaaye ophwanya mulako wa mpuwa saakhala ikwaartu piili; mmoha waari okhwipi wa mulako wa mpatta wa ottuttuwani waaweha mpatta wa ohitto, ni mukina okhwipi wa mulako wa mpatta wa ohitto waaweha mpatta wa ottuttuwani.

⁴⁵Owo aakeerela: “Mulako owenghe mpatta wa ohitto, ti wa asaserdoti* angwehaweha Empa ya Muluku,

⁴⁶ni mulako owenghe mpatta wa ottuttuwani, ti wa asaserdoti* anaawehaweha altaari*. Awosa ti anamwane asilopwana a Zadoki. Ti yaawo paahi ari aLeevi eneera emwaattameleke Yave weera emurumeele ohoolowawe.”

⁴⁷Vahoolowaya owo aaringa nipuwa; mipattasaya sootheene saamulikanela — mweerakameloniwaya saari imeetru* miloko mithanu ni imeetru* tthaaru ni hiihotho mweekhuveelonimwaya. Vano altaari* yaari ohoolo wa Empa ya Muluku.

⁴⁸Woottharelana aakirongha mpithela* mwa Empa ya Muluku, anaaringa amarimbwaaya; awo yaarino imeetru* piili ni eriyari ya emeetru* mweekhuveeloni wa mipatta soomiili. Mweekhuveeloni wa mulako, waarino imeetru* ithannapiili, ni ixirisaya saasuka, saarino emeetru* emoha ni eriyari ya emeetru* mweekhuveeloni wa khula mpatta.

⁴⁹Nipithela* naarino imeetru* muloko mweerakamelonimwaya, ni imeetru* ithannapiili mweekhuveeloni. Saakhala ixikada saaweleliwa woorowa weiwo, ni amarimbu araru muxerexere wa khula nrimbu na nipithela*.