Read Makhuwa-Shirima Ezekiyeli 41 Bible Online

Ezekiyeli 41 - Makhuwa-Shirima bible

Ezekiyeli 41

¹Vahoolowaya, mulopwana ole aakirongha mpatta wa vaNipuroni Nootteela* na omokoni, anaaringa amarimbu; khula mpatta wa mweekhuveeloni wa nrimbu waarino imeetru* tthaaru.

²Mweekhuveeloni wa mulako waari imeetru* ithanu, ni khula mpatta wa ixiri saasuka, waarino imeetru* piili ni eriyari ya emeetru*. Owo aaringatho Nipuro Nootteela* na omokoni; nno naarino imeetru* miloko miili mweerakameloni ni imeetru* muloko mweekhuveeloni.

³Vahoolowaya, aavolowa vaNipuroni Nootteela* na mpuwa, anaaringa amarimbu a mulako; mweekhuveeloni wa khula nrimbu, waarino emeetru* emoha. Mweekhuveeloni wa mulako waarino imeetru* tthaaru ni mweekhuveeloni wa khula exiri yaasuka waarino imeetru* tthaaru ni eriyari ya emeetru*.

⁴Owo aaringa mweerakameloni wa Nipuro Nootteela* na mpuwa; naarino imeetru* muloko, ni hiihotho mweekhuveelonimwaya mpaka okhwipi wa nipuwa nootteela na omokoni. Owo akeerela: “Nna ti Nipuro Nootteelaxa*.”

⁵Vahoolowaya aaringa exiri ya Empa ya Muluku; mwiittaaya waarino imeetru* tthaaru, ni khula ekwartu ya mukhwipi yaarukureenre Empa ya Muluku mweekhuveelonimwaya yaarino imeetru* piili.

⁶Ikwaartu sa mukhwipi saathataanyeranne impa tthaaru ni khula empa yaarino ikwartu miloko miraru. Mukerekhere exiri yootheene ya Empa ya Muluku yaakhalano soolipiherano ikwaartu sa omokoni, sihipitheeraka exiri ya Empa ya Muluku.

⁷Khula empa yoothataanyerana yaamuthanuwa opwaha ya vathi ni hiihotho ikwaartusaya sa omokoni sa Empa yootheene ya Muluku. Tivawo othanuwa wa Empa ya Yave yaapwahereraaya wunnuwawaya wa khula empa yoothataanyerana. Vano yoowelanowaaya yaakumanela epaceraka vathi mpaka impa soopiili sa osulu.

⁸Kaahoona weera mukhwipi wa Empa ya Muluku yootheene, aapakiwa cikhi, mwa yoowo aari mathipelo a ikwartu sa omokoni. Owo aalikana ni orakama wa ekopo yooringano; eyo tiiyo, araru.

⁹Mwiittaaya exiri ya omokoni ya ikwaartu sa omokoni waarino imeetru* piili ni eriyari ya emeetru*. Nlaka naari eriyari ya ikwaartu sa omokoni wa Empa ya Muluku,

¹⁰ni ikwaartu sa asaserdoti* mweekhuveelonimwaya saarino imeetru* muloko Empa ya Muluku yootheene.

¹¹Saakhala milako soovoleela ikwaartu sa omokoni wookhuma vanlakani, mmoha wa mpatta wa ottuttuwani ni mukina mpatta wa ohitto; okhuveela wa nlaka waarino imeetru* piili ni eriyari ya emeetru* Empa ya Muluku yootheene.

¹²Empa yoothataanyerana ohoolo wa nipuwa na Empa ya Muluku, mpatta ninkhuma nsuwa, mweekhuveelonimwaya yaarino imeetru* miloko miraru ni imeetru* ithannapiili. Exiri ya empeeneyo yoothataanyerana, mwiittaaya waari imeetru* piili ni eriyari ya emeetru*, ni mweerakamelonimwaya yaarino imeetru* miloko mixexe ni imeetru* ithannapiili.

¹³Vahoolowaya owo aaringa Empa ya Muluku; mweerakamelonimwaya yaarino imeetru* miloko mithanu ni imeetru* tthaaru. Vano nipuwa na Empa ya Muluku ni impa soothataanyerana vamoha ni ixirisayatho mweerakamelonimwaya, saarino imeetru* miloko mithanu ni imeetru* tthaaru.

¹⁴Mweekhuveeloni wa nipuwa na Empa ya Muluku, mpatta ninkhuma nsuwa, vamoha ni mpatta wa ohoolo wa Empa ya Muluku, yaarino imeetru* miloko mithanu ni imeetru* tthaaru.

¹⁵Woottharelana owo aaringa mweerakameloni wa impa soothataanyerana saari ohoolo wa nipuwa, mpatta wa opithela wa Empa ya Muluku, vamoha ni mapithelaaya* ootekeleliwa wa khula mpatta; saarino imeetru* miloko mithanu. Nipuro Nootteela* na omokoni mpaka na mpuwa ni nipithela* naawehanne ni nipuwa,

¹⁶vamoha ni isereemu sootheene, ixanela ikhaanene ni mapithelaaya* ootekeleliwa mukhwipi mwa sootthaaru, sootheene saari mpatta wa omokoni, vamoha ni isereemu, saahuruweliwe etthaabwa. Waahuruweliwatho moonyikalela, exiri mpaka omakoteloni wa ixanela ni muxanelanimwene.

¹⁷Vakhatoni wa osulu wa mpatta wa omokoni vamulako wa Nipuro Nootteela* ni muxirini, saakhala ikhato soottharana, muxerexere wa Nipuro Nootteela* na mpuwa ni na omokoni,

¹⁸yaakhala akerubini* ni mavare ookheriwa. Mavare yaavaxana ni akerubini* ettharanaka esaaleeneeyo. Khula kerubini* aarino ikhove piili —

¹⁹ekhove ya mutthu ewengheene mavare a mpatta mmoha, ni ekhove ya mwatto ewengheene mavare a mpatta mukina. Iyo saakheriwe ixiri sootheene sa Empa ya Muluku.

²⁰Okhuma vathi mpaka mpatta wa osulu wa mulako, yaakhala akerubini* ni mavare yaakheriwe muxirini wa omokoni wootheene wa Empa ya Muluku.

²¹Nipuro Nootteela* na omokoni naakhalano sinlipanaayano masele saari esikweya, ni iyo saari ohoolo wa Nipuro Nootteelaxa*, saamulikanano.

²²Yaakhala altaari* a etthaabwa, orakamelawaya osulu yaarino emeetru* emoha ni eriyari ya emeetru*, ni khula mpatta wa altaari*, waarino emeetru* emoha; mattuumbaaya, mwettowaaya ni mipattasaya saari sa etthaabwa. Mulopwana ole, aakeerela: “Ala ti meesa ankhala ohoolo wa Yave.”

²³Nipuro Nootteela* na omokoni mpaka Nipuro Nootteelaxa* naakhalano masele oophitaanyiwa.

²⁴Masele oomeeli yaaphitaanyiwa ni yaahuleya nikuruthu.

²⁵Mmaseleni a Nipuro Nootteela* na omokoni, yaakhala akerubini* ni mavare ookheriwa moothemwenemmo, ntoko yaale yaakheriwe muxirini; saakhalatho itthaabwa soosuka ohoolo wa nipithela*.

²⁶Muxirini sa omokoni wa nipithela*, saakhala ixanela sikhaani ni mavare exireeneeyo. Ikwaartu sa mukhwipi mwa Empa ya Muluku, saasukatho.