Read Makhuwa-Shirima Ezekiyeli 43 Bible Online

Ezekiyeli 43 - Makhuwa-Shirima bible

Ezekiyeli 43

¹Vano mulopwana ole aakirongha vamulako waawenghe mpatta ninkhuma nsuwa,

²kinoonawo ovuwa wa Muluku a oYixrayeli waarweela mpatta ninkhuma nsuwa. Nsunawe naalikana ni oruma wa maahi mancipale, ni elapo yaatutha ni ovuwawawe.

³Moonelo koonnaaka waalikana ni yoole koonnaaka Owo aarwiiyaawe ophwata esidade, ni ntokotho nyoonelo seiye koonnaaka omoolokoni Kebari; vano kaahuuramihela ekhove vathi.

⁴Ovuwa wa Yave waavolowa Mpaani mwa Muluku, oviraka vamulako waari mpatta ninkhuma nsuwa.

⁵Vano Munepa waakeemexa, onakirongha munipuwani na mpuwa, ni ovuwa wa Yave waasareya Mpaani mwa Muluku.

⁶Mulopwana ole areene mukhwipimwaka, kaamwiiwa mukina uulumaka ni miyo areene Mpaani mwa Muluku.

⁷Owo aakeerela: “Mwaana a mutthu, nna ti nipuro na ehicaaka ya emwene ni noonyikalihera inaawosaka. Va kinookhala mahuku ootheene eriyari ya aYixrayeli. Muloko wa aYixrayeli khoovalihatho Nsinanaka Nootteela, hata aYixrayeli, naari mamwenaaya kheevaliha ni opuutaaya ni miluku soohikhalano okumi sa mamwenaaya mmattumuxanimwaya ootteeliheriwa miluku sikina.

⁸Awosa yiikaathiyaaya yoonyikalelaaya vakhiviru wa yoonyikalelaaka ni isereemusaya vakhiviru wa isereemusaka, ereene exiri emoha paahi yaakawanyiha eriyari ya Miyo ni yaawosa, yaavaliha Nsinanaka Nootteela ni soopakasaya soohiira. Tivawo kaaphwantaaka musaranimwaka.

⁹Vano, esusihase wa Miyo opuutaaya ni miluku soohikhalano okumi sa mamwenaaya, ni Miyo kinookhala ni yaawosa mahuku ootheene.

¹⁰Mwaana a mutthu, mulepelelele muloko wa oYixrayeli Empa ya Muluku, weera yuulihiheye muru mwa sootthekasaya. Awosa esomele mukhalelowaaya,

¹¹ni yuulihiheya muru mwa sootheene apankaaya, mwaaleelase moota eraaya Empa ya Muluku — mukhalelowaaya, mookhumela ni moovoleelamwaya: Matekeliwaaya ootheene ni soolamulasaya ni ikanosaya sootheene. Mulepe itthu sootheene iyo ohoolowaya weera ettharihe ekhalelowaaya yootheene nitho ikanosaya sootheene moota woororomeleya.

¹²Vano, nlamulo na Empa ya Muluku ti nna: ettima yootheene erukureenre vasulu mwaako enookhala yootteela. Nna ti nlamulo na Empa ya Muluku.

¹³Miringo sa altaari* ti iya: Wiixera wa nlittinaya, okhaleke eriyari ya emeetru* emoha, ni mweekhuveelonimwaya, okhaleketho eriyari ya emeetru*, exoriweke mukhwipimwaya moothemwene oringiwakamo nikuphi nimoha. Orakamela osulu wa altaari*, ti wu:

¹⁴Okhuma nlitti nri vathi mpaka yoosuka ekhaani, orakamelawaya osulu orino emeetru* emoha ni mweekhuveelonimwaya eriyari ya emeetru* emoha; ni okhuma yoosuka ekhaani mpaka etokweene, mweerakamelonimwaya, orino imeetru* piili ni mweekhuveelonimwaya, emeetru* emoha.

¹⁵Ttukuttha a altaari*, orakamelawawe osulu, orino imeetru* piili, ni mattuumba maxexe onlipanaaweno manyaka maxexe woorowa osulu.

¹⁶Owo onoolikanela mipatta soomixexe, mweerakamelonimwawe orino imeetru* ithannamosa mpakatho mweekhuveelonimwawe.

¹⁷Yoosuka etokweene, mmipattanimwayatho moothemwene onoolikanela — mweerakamelonimwaya orino imeetru* ithannapiili, mpakatho mweekhuveelonimwaya, ni exoriweke mukhwipimwaya moothemwene oringiwakamo nikuphi nimoha, wiixeera wa nlittinaya orino eriyari ya emeetru* mukhwipimwaya. Ixikada sa altaari* siwenghe mpatta ninkhuma nsuwa.”

¹⁸Vano owo aakeerela: “Mwaana a mutthu, Yave onlamula sootheene, oneera ha: Meerelo eneera ettharihiweke saapakiwaka sooveleela soohisa ni yaamiseriwaka ephome altaari* awo eteekiweene, ti ala:

¹⁹Nyuwo mwaavaheke mwaamombe asaserdoti* ari aLeevi, a emusi ya Zadoki, mwa yaawo ankhuveela weera erumeele ohoolowaka, onghima Yave onlamula sootheene.

²⁰Nyuwo muhingeke ephomaaya ekina mmanyakani maxexe a altaari*, mmattuumbani maxexe a soosuka itokweene ni murukureeriheke mukhwipimwaya moothemwene. Hiiho, munimwaatteeliha altaari* ni munoowera waarehererela wiiwanana ni Muluku.

²¹Nyuwo munghisereke mwaamombe oomveleelela nthowa vanipuroni nithanliwe na Empa ya Muluku, mpatta wa omokoni wa Nipuro Noottela.

²²Waaxiiye, nyuwo mumveleeleke napunci oohirakala ntoko yooveleelela yoottheka, ni altaari* etteelihiweke ntoko yaatteelihiwaaya ni mwaamombe.

²³Mmalihaleene waatteeliha, mumveleeleke mwaamombe ni napunci a ikhondoolo a muhuwo. Soopiili iyo sikhaleke soohirakala.

²⁴Nyuwo mwaaveleeleke ohoolo wa Yave, ni asaserdoti* eweeleeleke ni yaaveleeleke ntoko sooveleela soohisa wa Yave.

²⁵Mmahukuni mathannameeli nyuwo munkhumiheke khula nihuku napunci ntoko yooveleelela yoottheka; munkhumiheketho mwaamombe ni napunci a ikhondoolo. Soopiili iyo sikhaleke soohirakala.

²⁶Mmahukuni mathannameeli asaserdoti* ereherereke wiiwanana ni Yave wa altaari* ni yaatteeliheke; hiiho awosa animwaatteeliha.

²⁷Emanleene mahuku awo, wookhuma nihuku nanaathannamararu, asaserdoti* epakeke sooveleelasanyu soohisa ni sa murettele valtaarini*. Vano Miyo kinoowaakhulelani, onghima Yave onlamula sootheene.”