Read Makhuwa-Shirima Ezekiyeli 44 Bible Online

Ezekiyeli 44 - Makhuwa-Shirima bible

Ezekiyeli 44

¹Vahoolowaya, mulopwana ole aakihokoloxera vamulako wa omokoni wa Nipuro Nootteela* waawenghe mpatta ninkhuma nsuwa, ni owo waari ewaleliwo.

²Yave aakeerela: “Mulako ola okhaleke ewaleliwo. Ohihuliweru; ahikhaleru anaavoleele. Okhaleke ewaleliwo, niwoko Yave, Muluku a oYixrayeli, ovoleenle vaavaawo.

³Akhaleke mwaana a mwene paahi aneera avolowe ni akilaathiwo weera ace vamaithoni wa Yave. Owo avoleeleke nipithela* ni akhumeleketho nenno.”

⁴Vano mulopwana owo aakirongha ohoolo wa Empa ya Muluku, niviraka vamulako wa mpatta wa ottuttuwani. Kaaweha, kinoona ovuwa wa Yave osareyaka Mpaani mwa Muluku, ni kaahuuramihela ekhove vathi.

⁵Yave aakeerela: “Mwaana a mutthu, ngwiriyane, ngwehe ni mwiiwe nnenesene yeeyo Miyo kineeraaka kihime mwaha wa meerelo ootheene anghima sa Empa ya Yave. Ngwiriyane mavoleeliwo ni makhumeliwo ootheene a Mpaani mwa Muluku.

⁶Muleele ha muloko woovaanya wa oYixrayeli: ‘Yave onlamula sootheene, oneera ha: Ii! Muloko wa oYixrayeli, sookwana soopakasanyu soohiira!

⁷Ohiya soopakasanyu sikina sootheene soohiira, nyuwosa moohaaruuha vaNipuronivaka Nootteela* anamarwa oohiineliwa mmurimani ni mweerutthuni, muhiirihaka Empaaka wookipakela sooveleela sa yooca, makhura ni ephome. Vano, nyuwosa moonanariha wiiraanawaka.

⁸Ohiya okwanihera sootthuneyasanyu sa itthusaka sootteelihiwa, nyuwosa mwaavanghe akina weera evareke muteko vaNipuronivaka Nootteela*.

⁹Yave onlamula sootheene, oneera ha: Ahikhaleru namarwa oohiineliwa mmurimani ni mweerutthuni aneera avolowe vaNipuronivaka Nootteela*, aani, hata vakhaani wa namarwa onkhala eriyari ya aYixrayeli.

¹⁰aLeevi yiirakamelihanxe ni Miyo, aYixrayeli yaahapungwaaya exoraxorelaka ottaiwaka weera elape milukusaya, sinimwaahaawiha sootakhalasaya.

¹¹Awosa erumeeleke vaNipuronivaka Nootteela* ntoko anamawehaweha a milako sa Empa ya Muluku ni evareketho muteko mwemmo; ewiiveke axinama oowaapakela sooveleela soohisa ni sooveleela sikina wa muloko ni ekhaleke ohoolo wa muloko, erumeelaka.

¹²Vaheera, yeenre erumeela vamaithoni wa milukusaya, ni emoroxela mootthekani muloko wa oYixrayeli, koolipela kitheteiyeene ntata weera awosa sinimwaahaawiha sootakhalasaya, onghima Yave onlamula sootheene.

¹³Awosa kheekhuveela weera ekirumeele ntoko asaserdoti*, hata kheekhuveelaru yakhalaru etthu ya sootteeliheriwasaka hoye hoye seiyo siri sootteelaxa; animwiihaawiha ni soopakasaya soohiira.

¹⁴Wa soothesene, Miyo kohaavaha sootthuneya sa Mpaani mwa Muluku, ni miteko sootheene sintthuneya opakamo.

¹⁵Vaheera asaserdoti* ari aLeevi, a ekhapira ya Zadoki, ni akwanihenre moororomeleyani sootthuneyasaka sa Nipuronaka Nootteela*, aYixrayeli yaakihingyaaya, ekhuveeleke weera erumeele ohoolowaka; awosa anookhala ohoolowaka weera epake sooveleela sa makhura ni sa ephome, onghima Yave onlamula sootheene.

¹⁶Ti yaawo paahi eniivolowe vaNipuroniwaka Nootteela*, ni eniikhuveele vameesaniwaka weera erumeele ohoolowaka ni evare mutekwaaka.

¹⁷Yaavolowasaka mmilakoni sa nipuwa na mpuwa, ewareke ikuwo sa eliinyu*; ehiwareru ekuwo yoopakiwa ni mapururu a ikhondoolo yaarumeelaka mmilakoni sa nipuwa na mpuwa hoye hoye Mpaani mwa Muluku.

¹⁸Ewareke mmuru iturbante* sa eliinyu*, nitho campuwa a eliinyu*. Ehiwareru etthu eneera yaatannyere orettheela.

¹⁹Yaakhumelaka vanipuwani na omokoni, weiwo onkhalaayawo muloko, eruleke ikuwo seiyo yaarumeelaayano ni ehiyeke mukwaartuni sootteelihiwa, ni ewareke ikuwo ikina weera ehitteeliheno muloko ikuwosaya sa esaserdoti.

²⁰Ehimettheru mayihi hata mayihaaya ehihiye erakamaka, mene yeere ohama paahi.

²¹Ahikhaleru musaserdoti* anaawure eviinyu aavolowaka vanipuwani na mpuwa.

²²Awosa ehimutheleru naamukhweli hoye hoye muthiyana omwalanne ni iyawe; emutheleke paahi mwaamwali oowiikosoopa muYixrayeli, hoye hoye naamukhweli a musaserdoti*.

²³Awosa exuttihaseke mulokwaaka ohiyana wa yootteeliheriwa ni piswa, ni yoonihereke moota wookawanyiha eriyari ya yootteela ni yoohitteela.

²⁴Yakhalaru yoovaanela, asaserdoti* ekhaleke ntoko aphuki, ni olakela ottharihiweke moota wa soolakelasaka. Awosa yiiweleleke malamulowaaka ni ikanosaka ettittimiherelaka ifestasaka soothanliwa, ni epwaherereke otteeliha iSaabadusaka.

²⁵Musaserdoti* ahiivaliheru niwoko na waattamela muttembo wa mukina; wa soothesene, owo iivaliheke yakhwa atithawe, amayawe, mwanawe mulopwana hoye hoye muthiyana, munneiye hoye hoye murokoriye owo aahitheliwaru.

²⁶Iitteelihaleene, aweherereke mahuku mathannameeli.

²⁷Vanihukuni aneeraawe avolowe vanipuwani na mpuwa wa Nipuro Nootteela* weera arumeelemo, musaserdoti* iiveleeleleke yooveleelela yoottheka, onghima Yave onlamula sootheene.

²⁸Miyo kinookhala yoohiyeriwa emoharu avahiwe asaserdoti*. Nyuwosa muhaavaheru aYixrayeli yakhalaru ettima; Miyo kinookhala yoohiyeriwaaya.

²⁹Awosa eceeke sooveleela sa irooro, sa yoottheka ni sa nthowa. Vano sootheene sa oYixrayeli sineera sitteeliheriwe Yave, ti sawaya.

³⁰Sooreerela sootheene sa soowiima soopacera, ni micaango sootheene muneeraanyu mpake, ti sa asaserdoti*. Nyuwosa mwaavahaseke mpatta woopacera wa yooca ya irooro sooxiliwa weera ekhale mareeliho mmampaanimwanyu.

³¹Asaserdoti* ehikhuureru enama ya ipalame hoye hoye ya axinama oovettuliwa, naari oonyaanyiwa ni axinama a ntuphini.’”