Read Makhuwa-Shirima Ezekiyeli 45 Bible Online

Ezekiyeli 45 - Makhuwa-Shirima bible

Ezekiyeli 45

¹“ ‘Nyuwosa mwaakawasaka elapo ntoko yoohiyeriwa, mumvaheke Yave ettima emoha ya elapo ntoko yootteelihiwa; mweerakamelonimwaya, ekhalaneke ikilomeetru* muloko ni tthaaru, ni mweekhuveelonimwaya, ekhalaneke ikilomeetru* muloko ni eriyari ya ekilomeetru* emoha; ettima yootheene eyo enookhala yootteelihiwa.

²Mpatta wa ettimeene yeeyo eringingwe ekhalihiweke ntoko Nipuro Nootteela*; wunnuwawaya okhaleke imeetru* macira meeli ni imeetru* miloko mithannamosa ni imeetru* piili yoolikanela khula mpatta. Mukhwipimwaya moothemwene ehikhaleke etthu wookwanaka imeetru* miloko miili niithannamosa.

³Mpuwa mwa elapo yootteelihiwa yeeyo, muringe mpatta mmoha wa ikilomeetru* muloko ni tthaaru mweerakamelonimwaya, ni mweekhuveelonimwaya ekhalaneke ikilomeetru* ithanu. Mmo nikhaleke Nipuro Nootteela*, aani, Nipuro Nootteelaxa*.

⁴Ela eniikhale ettima yootteelihiwa ya elapo wa asaserdoti*, mwa yaawo eniirumeele vaNipuroni Nootteela* ni eniikhuveele weera erumeele ohoolo wa Yave. Nno, nnikhale nipuro nooteka impasanyu, mpakatho Nipuro Nootteela* na Empa ya Yave.

⁵Ettima ya ikilomeetru* muloko ni tthaaru ya mweerakamelonimwaya, ni ikilomeetru* ithanu mweekhuveelonimwaya, ekhaleke ya aLeevi, mwa yaawo eniirumeele Mpaani mwa Muluku; eyo eniikhale ettimaaya wa mittetthesaya.

⁶Nyuwosa mwaavahaseke ettima ya ikilomeetru* piili ni eriyari ya ekilomeetru* emoha ya mweekhuveelonimwaya ni ikilomeetru* muloko ni tthaaru ya mweerakamelonimwaya, ntoko ettima ya musidade, ekhuveelanne ettima yootteelihiwa; eyo ekhaleke ya muloko wootheene wa oYixrayeli.

⁷Mwaana a mwene akuxeke elapo eri mmipattani soomiili sa ettima eri mulaponi yootteelihiwa ni mwa ettima ya musidade. Vano ettima emoha ekhaleke mpatta ninkela nsuwa erowaka weiwo weiwo, ni ettima ekineeyo mpatta ninkhumwa nsuwa erowakatho weiwo weiwo, wookhuma omwiinanoni wa mpatta ninkela nsuwa, mpaka omwiinanoni wa mpatta ninkhuma nsuwa silikanaka ni ittima sa mpuumbani.

⁸Elapo eyo enookhala yawinyuweene oYixrayeli. Vano anamwane a mamwenaaka kheehasulatho mulokwaaka, mene eniitthunihere weera muloko wa oYixrayeli okuxe elapo, ottharihaka ipuumbasaya.

⁹Yave onlamula sootheene, oneera ha: Ii! Anamwane a mamwene a oYixrayeli, nyuwosa mootepihaxa paahi! Muhiye nipuheronanyu, nihasunanyu ni mpake yeeyo eri yoororomeleya ni yoowookoleleya. Muhiyerere okuxa yeeyo eri ya mulokwaaka,’ onghima Yave onlamula sootheene.

¹⁰Mvarele muteko miringo soororomeleya, miphimo soororomeleya ni mwaapu woororomeleya.

¹¹Mphimo ni mwaapu, silikaneleke. Waatta wa mphimo ni mwaapu okhalaneke mpatta wanaamuloko wa waatta wa ekhali ya iliitru* macira meeli ni miloko miili.

¹²Exekeli* elemeleke igrama* muloko ni piili. Ixekeli* miloko mithannamosa, sinookwana igrama* macira mathannameeli ni miloko miili.’”

¹³“ ‘Yooveleela yootteelihiwa muneeraanyu mutteelihase ti ela: Ikiilu* tthaaru ni eriyari ya ekiilu* emoha sa khula ikiilu* macira meeli ni miloko miili sa etrigu ni hiihotho wa esevada*;

¹⁴mpatta woolamuleliwa wa makhura ti wanaancira sa sootheene;

¹⁵nitho wa khula ikhondoolo macira meeli, ekuxiweke ekhondoolo emoha mwa seiyo sincihiwa munnyepuni woopombaxa wa oYixrayeli. Sootheene iyo sivareliweke muteko wa sooveleela sa irooro, sooveleela soohisa ni sa murettele weera oreherereliwe wiiwanana ni Yave,’ onghima Yave onlamula sootheene.

¹⁶Muloko wootheene wa mulaponi oveleelekeno sooveleela iyo weera sivareliwe muteko ni mwaana a mwene a oYixrayeli.

¹⁷Ekhaleke yootthuneya ya mwaana a mwene ovaha sooveleela soohisa, sooveleela sa irooro ni sooveleela soowura mufestani, nyeeri sinyowani ni muSaabaduni, aani mufestani soothanliwa sootheene sa muloko wa oYixrayeli. Owo avaheke sooveleelela yoottheka, sa irooro, soohisa ni sa murettele weera oreherereliwe wiiwanana ni Muluku weereliwaka muloko wa oYixrayeli.’”

¹⁸“ ‘Yave onlamula sootheene oneera ha: Vanihukuni noopacera na mweeri woopacera nyuwo munkuxeke mwaamombe oohirakala ni mutteeliheke Nipuro Nootteela*.

¹⁹Musaserdoti* akuxeke ephome vakhaani ya yooveleelela yoottheka ni ahingeke musereemuni mwa Empa ya Muluku, mmattuumbani maxexe a soosuka itokweene sa altaari* ni musereemuni mwa mulako wa nipuwa na mpuwa.

²⁰Nyuwo mpakeketho hiiho vanihukuni nanaathannameeli na mweeri, mmweerelaka akhalaru mutthu anaattheke mweerisani hoye hoye moohisuwelani; hiiho nyuwo munooreherera wiiwanana ni Muluku mweerelaka Empa ya Muluku.

²¹Vanihukuni nanaamuloko ni maxexe na mweeri woopacera nyuwosa mpakeke efesta ya mPaska*, efesta ya mahuku mathannameeli muceeke ipaawuru soohikhalano eferementu mweehuhuweene eyo.

²²Nihuku nno na mPaska*, mwaana a mwene amukhumiheke mwaamombe ntoko yooveleelela yoottheka iixeerelaka muneenaawe vamoha ni muloko wootheene wa mulaponi.

²³Khula nihuku na mahuku mathannameeli awo a efesta, owo aakhumiheke aximombe athanneeli ni anapunci a ikhondoolo athanneelitho oohirakala, ntoko yoomveleelela yoohisa Yave, ni napunci ntoko yooveleelela yoottheka.

²⁴Owo akhumiheke ntoko yooveleela ya irooro, ikiilu* miloko miili ni ikiilu* piili sa etrigu vamoha ni iliitru* tthaaru ni nttikha sa makhura sa khula mwaamombe ni wa khula napunci a ikhondoolo.

²⁵Mweehuhuni ya mahuku mathannameeli awo a efesta empacera vanihukuni nanaamuloko ni mathanu na mweeri wanaathannamiili, owo aruuheke soovahasene seiyo wa sooveleelela yoottheka, soohisa ni sa irooro vamoha ni makhura.’”