Read Makhuwa-Shirima Ezekiyeli 46 Bible Online

Ezekiyeli 46 - Makhuwa-Shirima bible

Ezekiyeli 46

¹“ ‘Yave onlamula sootheene, oneera ha: Mulako wa nipuwa na mpuwa owenghe mpatta ninkhuma nsuwa, okhaleke ewaleliwo mmahukuni mathannamosa ootthuneyaxa, vaheera vanihukuni na eSaabadu ni nihuku na mweeri munyowani ohuliweke.

²Mwaana a mwene arweelaka onipuwani na omokoni, avoleeleke nipithela* nimvoleeliwa ni akhaleke vamulako. Eyo eri hiiho, asaserdoti* eveleeleke sooveleelasawe soohisa ni sa murettele. Owo amulapeke Yave vathi mulako, vahoolowaya akhumeke. Vaheera, mulako owo ohiwaliweke mpaka oxekuwa.

³muSaabaduni ni nyeeri sinyowani, muloko wa mulaponi omulapeke Yave vamulako owo, wuuramihelaka ekhove mpaka vathi.

⁴Yooveleela yoohisa mwaana a mwene aneeraawe amuruuhele Yave vanihukuni na eSaabadu ekhaleke ya iputtiputthi ithannamosa ni napunci mmoha a ikhondoolo, sootheene iyo sikhaleke soohirakala.

⁵Yooveleela ya irooro eveleeliweke vamoha ni napunci a ikhondoolo ekhaleke ikiilu* miloko miili ni piili, ni yooveleela ya irooro eveleeliweke vamoha ni iputtiputthi ekhaleke moota owo ontthunelaawe, vamoha ni iliitru* tthaaru ni nttikha sa makhura wa khula ikiilu* miloko miili ni piili sa irooro.

⁶Vanihukuni na mweeri munyowani owo amveleeleke mwaamombe mmoha, iputtiputthi ithannamosa ni napunci mmoha a ikhondoolo. Sootheene iyo sikhaleke soohirakala.

⁷Owo aveleeleke irooro ikiilu* miloko miili ni piili vamoha ni yooveleela ya mwaamombe, ni hiihotho ni yooveleela ya napunci a ikhondoolo, ni vamoha ni iputtiputthi owo avaheke yeeyo ontthunelaawe ovaha vamoha ni iliitru* tthaaru ni nttikha sa makhura wa khula ikiilu* miloko miili ni piili sa irooro.

⁸Aavolowaka mwaana a mwene, owo apakeleke nipithela* nimvoleeliwa ni akhumeleke ephiro ovoleenlaawe.

⁹Muloko wa mulaponi waarwaaka vamaithoni wa Yave, mfestani soothanliwa, khula mutthu anaavoleele mulako wa ottuttuwani weera amulape, akhumeleke mulako wa ohitto, ni khula mutthu anaavoleele mulako wa ohitto, akhumeleke mulako wa ottuttuwani. Ahikhaleru anaakhumele mulako mwa yoowo ovoleenlaawe, mene ootheene ekhumeleke mulako owehannaayano.

¹⁰Mwaana a mwene akhaleke eriyaraayasa, avolowaka awosa yaavolowaka, ni akhumaka awosa yaakhumaka.

¹¹Mufestani, vamoha ni ifesta soothanliwa, sooveleela sa irooro sikhaleke irooro ikiilu* miloko miili ni piili vamoha ni yooveleela ya mwaamombe, ni hiihotho ni yooveleela ya napunci a ikhondoolo, ni vamoha ni iputtiputthi owo avaheke yeeyo ontthunelaawe ovaha vamoha ni iliitru* tthaaru ni eriyari ya eliitru* emoha ya makhura wa khula ikiilu* miloko miili ni piili sa irooro.

¹²Mwaana a mwene aamvahaka Yave yooveleela ya otthunawawe — ekhalaka yooveleela yoohisa hoye hoye ya murettele, ahuleliweke mulako owenghe mpatta ninkhuma nsuwa. Owo apakeke yooveleelaawe yoohisa hoye hoye ya murettele ntoko ompakaawe vanihukuni na eSaabadu. Vano owo akhumeke, ni akhummeene, mulako owaliweke.

¹³Khula nihuku, nyuwosa mukhumiheke eputtiputthi ya eyaakha emoha yoohirakala ntoko yoomveleelela Yave yoohisa; nyuwosa muruuheke khula oxeexelo.

¹⁴Vamoha ni yoowo, nyuwo muruuheke khula oxeexelo yooveleela ya irooro ya ikiilu* tthaaru ni eriyari ya ekiilu* emoha vamoha ni eliitru* emoha ni vakhaani ya eliitru* ya makhura ookhuwalihera ephepa. Woopaka yooveleela ya irooro ela, ti ekano yoohimala.

¹⁵Hiiho, eputtiputthi, yooveleela ya irooro, ni makhura siruuhiweke khula oxeexelo ntoko yooveleela yoohisa wa mahuku ootheene.

¹⁶Yave onlamula sootheene, oneera ha: Mwaana a mwene amvaha mwaniye mmoha ettima ya yoohiyeriwaawe, eyo ekhaleketho ya ekhapiraawe; eyo ekhaleke ettimaaya ya yoohiyeriwa.

¹⁷Wa soothesene, amvaha mmoha a ipotthasawe ettima ya yoohiyeriwaawe, epottha eyo epwaherereke okhalano ettimeene yeeyo mpaka Eyaakha ya Otapuxiwa; vanonto ettima ehokoleeleke wa mwaana a mwene. Yoohiyeriwaawe ti ya anamwanaawe paahi; ekhaleke yawayasa.

¹⁸Mwaana a mwene ahikuxeru etthu ya yoohiyeriwa ya muloko, awoomolaka muttimanimwaya anamahiyeriwa. Aavaheke anamwanaawe yoohiyeriwa ya yeele eri ettimaawe, weera ahikhaleru a mulokwaaka aneera amwalanyihiwe ni ettimaawe.

¹⁹Vahoolowaya mulopwana ole aakiviriha omvoleeliwa ori muxerexere wa mulako onkela mpaka ikwaartu sootteelihiwa singweha mpatta wa ottuttuwani, mwa seiyo saari sa asaserdoti*. Owo aakoonihera nipuro naari mpatta okotenle wa ninkela nsuwa.’ ”

²⁰Vano, owo aakeerela: “Nna ti nipuro mwa nenno asaserdoti* eneeraaya yaapeyeke yooveleelela nthowa, yooveleelela yoottheka ni yooxeke yooveleela ya irooro, weera sihironghiwe onipuwani na omokoni ni otteelihiwaka hiiho muloko.

²¹Vahoolowaya owo aakirongha vanipuwani na omokoni, anakiviriha mmattuumbanimwaya oomaxexe, ni khula nttuumba kaahoona nipuwa nikina.

²²Yaari mapuwa oowaliwa, mweerakamelonimwaya yaarino imeetru* miloko miili niimoha, ni mweekhuveelonimwaya yaarino imeetru* muloko niithanu; miringo sa mapuwa a mattuumba maxexe saamulikana.”

²³Muxerexere wa khula nipuwa mpuwamwaya yaakhalano soosuka sa maluku, ni mapuro oopattiha mooro etekiweene vathiwaya mukwipimwaya moothemwene.

²⁴Mulopwana ole akeerela: “Ala ti mapuro ootterekha mwa mwemmo yaale anrumeela Mpaani mwa Muluku eneeraaya yaapeyeke sooveleela sa muloko.”