Read Makhuwa-Shirima Ezekiyeli 47 Bible Online

Ezekiyeli 47 - Makhuwa-Shirima bible

Ezekiyeli 47

¹Mulopwana ole aakihokoloxera vamulako wa Empa ya Muluku, kinoona maahi epiluwelaka waathi nsele, erowaka mpatta ninkhuma nsuwa, niwoko Empa ya Muluku yaawenghe mpatta ninkela nsuwa. Maahi yaakhuma vathi wa mpatta wa ohitto wa Empa ya Muluku, mpatta wa ohitto wa altaari*.

²Vano, owo aakikhumihera vaate akivirihaka vamulako wa mpatta wa ottuttuwani, anakirongha mpatta wa vaate mpaka mulako wa omokoni owenghe mpatta ninkhuma nsuwa. Maahi yaapiluwa mpatta wa ohitto.

³Mulopwana ole aarowa mpatta ninkhuma nsuwa avarenleene nliinya nooringano; arowaka hiihaale, aaringa imeetru* macira mathanu ni imeetru* miloko miraru, anakiviriha mmaahini yaakikotela mukosomwani.

⁴Aaringatho imeetru* macira mathanu ni imeetru* miloko miraru, anakiviriha mmaahini yaakikotela mmakuthani. Aaringatho imeetru* macira mathanu ni imeetru* miloko miraru, anakiviriha mmaahini yaakikotela muyuununi.

⁵Aaringatho imeetru* macira mathanu ni imeetru* miloko miraru, mene emaara ela waari mooloko kahaaweraaka olapuwa, niwoko maahi yaahaandyeerereya oniixaxa owereyaka paahi olapuwa oyavelaka. Waari mooloko wahaawereya olapuwa weettaka.

⁶Mulopwana ole, aakikoha: “Mwaana a mutthu, Nyuwo munnoona yeela?” Vano aakihokoloxera okhopela mooloko.

⁷Kiphiyakaruwo, kaahoona nyiri sincipale wa khula mpatta wa mooloko.

⁸Owo aakeerela: “Maahi ala ampiluwa mpatta wa elapo eri mpatta ninkhuma nsuwa, enarowa mpaka wAraba, mwa weiwo ahenlaaya mphareiya. Yaahelanaka mphareiya mmo, maahi anootatuxa ephareiya maahi oowureya.

⁹Wakhalaru omviraayawo mooloko ole, onookhala moota wootheene wa axinama ni wa ihopa, niwoko maahi ale ampiluwela weiwo, enaceendya maahi a maakha okhala oowureya; tivawo weiwo ompiluwaayawo mooloko, sootheene sinookhala ni okumi.

¹⁰Anamamesera anookhala muxerexere wa ephareiya yootheene; okhuma wEni-Gedi mpaka wEni-Eglayimi, onookhalano mapuro ooreerela waaneya itthavi. Ihopa sinookhala sa nyoota sincipale, ntoko ihopa sa ephareiya etokweene.

¹¹Vaheera maratta ni mattapo kheeceendyeya; anoohiiwa weera ekhale maakha.

¹²Nyiri siniima sa nyoota sootheene sinimunnuwa mmipattani soomiili sa mooloko. Makukhwaaya kheenyaala ni soowiimasaya khasimora. Sinimwiima khula mweeri, niwoko maahi anrweela vaNipuroni Nootteela*, amphiya mwa seiyo. Soowiimasaya sinoociwa, ni makukhwaaya anoovareliwa muteko wa murette.”

¹³Yave onlamula sootheene, oneera ha: “Iya nyiinano muneeraanyu mukawanekeno elapo, ntoko yoohiyeriwa wa khula epuumba ya aYixrayeli ni Yoseefe onimwaakhela ittima piili.

¹⁴Nyuwosa mukaweke nnenesene eriyaraaya. Keenre Miyo kilipela kitheteiyeene ntata weera kaamwaavaha makholowaanyu, elapo ela enoothatuwa yoohiyeriwaanyu.

¹⁵Mwiinano wa elapo ti ola: Mpatta wa ottuttuwani okhumeke ephareiya etokweene, oroweke munseweni wa oHetelomi, oviraka oLebo-Hamati mpaka oZedadi,

¹⁶oBerota ni oSibrayimi, ori mmwiinanoni wa eriyari ya oDamasku ni oHamati ni onrowa mpaka oHazeri-Hatikoni, ori muxerexere wa oHawurani.

¹⁷Mwiinano ovireke wookhuma ophareiya mpaka oHazari-Enani, ottharaka mwiinano wootheene wa mpatta wa ottuttuwani wa oDamasku, ni mwiinano wa oHamate woorowa mpatta wa ottuttuwani. Ti yoola oneera okhale mwiinano wa mpatta wa ottuttuwani.

¹⁸Mpatta ninkhuma nsuwa, mwiinano ovireke eriyari ya oHawurani ni oDamasku, ottharaka muYordanu, eriyari ya oGileyade ni elapo ya oYixrayeli mpaka ephareiya ya mpatta ninkela nsuwa, opwahereraka mpaka oTamari. Ola ti mwiinano wa mpatta ninkhuma nsuwa.

¹⁹Mpatta wa ohitto, owo okhumeke oTamari mpaka maahi a oMeriba-Kadexi, opwahereraka woorowa onxaapwani na wExipitu mpaka ephareiya etokweene. Ola ti mwiinano wa mpatta wa ohitto.

²⁰Mpatta ninkela nsuwa ephareiya etokweene ti mwiinano mpaka wiithela wa oLebo-Hamati. Ola ti mwiinano wa mpatta ninkela nsuwa.

²¹Mukawaneke elapo ela muttharihaka ipuumba sa oYixrayeli.

²²Nyuwosa mukawaneke ntoko yoohiyeriwaanyu ni wa anamarwa ankhala eriyaraanyu arino anamwane. Nyuwosa ngwooneleke okhala ntoko aYixrayeli xaxaxa; nyuwosa vamoha ni yaawosa evahiweke yoohiyeriwa eriyari ya ipuumba sa aYixrayeli.

²³Yakhalaru epuumba aneeraawe akhale namarwa, mumvahekewo yoohiyeriwa eniimukwanelele,” onghima Yave onlamula sootheene.