Read Makhuwa-Shirima Ezekiyeli 5 Bible Online

Ezekiyeli 5 - Makhuwa-Shirima bible

Ezekiyeli 5

¹“Vano mwaana a mutthu, mukuxe ekatana yoowiitha ni mvarele muteko ntoko ncemo na namamettha weera mmetthe mayihi ni ireru. Vahoolowaya, mukuxe muringo ni mukawanyihe mayihi awo.

²Emanleene mahuku a oriciwa wa esidade, muhisere mmooroni mpatta wanaararu wa mayihi musidadeni mmo. Mukuxe mpatta wanaararu ni muthikile ni ekatana muxerexere wa esidade yootheene. Mpatta wanaararu mukinoowo, mmwaraxele mpheyoni. Vano Miyo kinimwaattharelela ni ekatana yoohululiwa munluwoni.

³Mene mukuxe aximenxa ni musunge mmaleembeni mwa soowarasanyu.

⁴Mwa imenxa iyo, mukuxe sikina sikina ni mvonyere mmooroni weera size. Vano, mooro onuumwareele mmulokoni moothemwene mwa oYixrayeli.

⁵Yave onlamula sootheene oneera ha: Esidade ela ti Yerusaleemu, kiikaathiyaaka eriyari ya miloko, erukureeriweene ni miloko sikina.

⁶Wa soothesene, mwa soonanarasaya, eyo yoovaanyera malamulowaaka ni ikanosaka opwaha miloko sikina sootheene sirukureenrewo. Eyo yookhootta malamulowaaka ni kheettharinghe ikanosaka.

⁷Tivawo Yave onlamula sootheene oneeraawe ha: Nyuwo mookhalaxa namavaanya opwaha miloko soorukureenreni ni khamuttharinghe ikanosaka, hata khamwiiwelenle malamulowaaka. Nyuwo mpaka khamutthanre mweettelo wa miloko soorukureenreni.

⁸Tivawo Yave onlamula sootheene oneeraawe ha: Miyo kinoowananani nyuwo Yerusaleemu ni kinimoottaruxani miloko soonaka.

⁹Vano niwoko na milukusanyu sa mwiikho, kinimoopakelani etthu kihitonkwaaka opaka hata kineeraaka kihipaketho.

¹⁰Tivawo, eriyaraanyu, eniyeereye weera asitiithi eniyaakhuure anamwanaaya ni anamwane eniyaakhuure asitithaya. Kinimoottaruxani kaamwaraxeleke mipatta sootheene sa mpheyoni yaawo eniyaahalele.

¹¹Vanonto, kinlipela mwa okumaaka, onghima Yave onlamula sootheene, mweenre mvaliha Nipuronaka Nootteela* ni icaambulosanyu soothanyeya ni soopakasanyu soohiira, Miyo kinoovenxa mareelihowaaka. Nkoomorelani ikharari hata nkiwuurelani.

¹²Mpatta wanaararu wa mulokwaanyu oniwiiviwe ni nihooxo hoye hoye onuuriheye mutalani mpuwa mwa ixirisanyu; mpatta wanaararu mukina oniwiiveliwe ekatana mukerekhere wa esidade; ni mpatta mukinoowo kinoomwaraxela mipatta sootheene sa mpheyoni kitthareleleke kivarenleene ekatana.

¹³Hiiho isarasaka sinoomala ni waanyoonyeriwawaka onookhurunuwa, ni kinimwiinleliwa ikukuttula. Saamalenleene isarasaka, anoosuwela weera ti Miyo, Yave, kuulumme munthitinimwaka.

¹⁴Kinimookhalihani nthala kootatuxekeni ootthebwiwa eriyari ya miloko soorukureenreni, yoonaka ootheene yoovinreni.

¹⁵Miyo koottaruxakani nyuwo musarani, moonyoonyiwani ni moohiihani, nyuwo munookhala mutheelelo ni yootthebwano, moopererelo ni yootannyera otteenguwa wa miloko soorukureenreni. Ti Miyo, Yave, kuulumme.

¹⁶Koolathelakani nyuupasaka soowiiva ni soophwata, nyuupasaka sa etala, nkilathele owiivani. Kinimwaandyeera ovoliwawanyu ni kinoovenxa yoocaanyu.

¹⁷Kinimoorumihelani etala ni axinama a ntuphini ni awo eniyoohiyeeni woohikhalano anamwane. Nihooxo ni oyeeheya wa ephome sinimoophwanyani, ni kinimooruuhelani ekatana. Ti Miyo, Yave, kuulumme.”