Read Makhuwa-Shirima Ezekiyeli 6 Bible Online

Ezekiyeli 6 - Makhuwa-Shirima bible

Ezekiyeli 6

¹Yave aahuuluma ni miyo eeraka:

²“Mwaana a mutthu, murukunuwe ni ngwehe nyaako sa oYixrayeli; muthalihere otthuna wa Muluku

³ni mweere: ‘Ii! Nyaako sa oYixrayeli, mwiiwe masu a Yave onlamula sootheene. Oneerela ha Yave onlamula sootheene, nyaako ni mattumuxa, maxaapwa ni mareyareya: Kihanle vakhaani wooruuhelasani ekatana; kinimwaaphwata altaaraanyu* mwa mwemmo munlapaanyu miluku soowootha.

⁴Altaaraanyu* anoophwatiwa ni altaaraanyu a erubani* anoonyaanyiwa, ni kinimwiiva mulokwaanyu ohoolo wa milukusanyu.

⁵Kinimwiikaathi mittembo sa aYixrayeli ohoolo wa milukusaya, ni kinoomwaraxela makhuvaanyu mukhwipi mwa altaaraanyu.

⁶Muneeraanyu mukhaleru, isidade iyo sinookurumuliwa ni miluku soowootha sa mmattumuxani sinoopuruliwa, siphwatiweke; milukusanyu sinoonyaanyiwe sitatuxiweke mathala. Altaaraanyu a erubani* anoopwexiwa ni sootheene mpankaanyu sinoomalamalihiwa.

⁷Mulokwaanyu onimookhwa eriyaraanyu ni nyuwosa mmwisuwele weera Miyo ti Yave.

⁸Vaheera akina kinoowuurela. Akina a nyuwo eniyoopowe ekatana mwaamwaraxeliwaka eriyari ya ilapo ni miloko.

⁹Vano, mmilokoni mmo muneeraanyu muronghiwe ootthukiweene, yaawo eneera yoopowe anookuupuwelela. Animuupuwelela moota kaathananihiwaaka ni mirimasaya sooraruwa sikihingye Miyo, ni maithwaaya yaahaawela milukusaya. Animwiixeettiha murima niwoko na yoonanara apankaaya ni na soopakasaya sootheene soohiira.

¹⁰Awo eniisuwele weera Miyo ti Yave, ni weera kaahuuluma ekhakhai keenraaka kinimwaaruuhela erisa ela.

¹¹Yave onlamula sootheene oneera ha: Muttikitthe matata, mmane inaawo ni mukhuwele: “Maayi miyo!” mwaha wa soopaka sootakhala soohiira sa muloko wa aYixrayeli, niwoko awosa eniyiiviwe ni ekatana, etala ni nihooxo.

¹²Yoowo orakamenle aniiviwe ni nihooxo; yoowo ori vakhiviru aniiviwe ni ekatana, ni yoowo anaahalahale anuureliwa, anaakhwe etala. Ti hiiho kineeraaka kaayeeherase isarasaka.

¹³Awosa anoosuwela weera Miyo ti Yave mulokwaaya waataleliwaka wookhweene eriyari ya milukusaya, muxerexere altaaraaya*, mmattumuxani ootheene oorakamela ni mutthomelani sootheene sa nyaako, vathi wa nyiri sootheene soopombaxa ni khula mwiri wa ekarivalyu* yoosareya makukhu — mmapuroni moothemwene mwa mwemmo yaahiseraayamo miluku erubani* yoowunkhelaxa.

¹⁴Kinimwaatheteela moonowaaka ni kinootatuxa elapo oheleyaxa nthala, okhuma munikareni mpaka oDibela, aani weiwo eneeraaya ekhaleru. Hiiho, anoosuwela weera Miyo ti Yave.’ ”