Read Makhuwa-Shirima Ezekiyeli 9 Bible Online

Ezekiyeli 9 - Makhuwa-Shirima bible

Ezekiyeli 9

¹Vano miyo kaamwiiwa iitthanaka ni okhuwelaxa: “Mwaaruuhe va anamalipelela a esidade, khula mutthu amvarenleene kapwitthi.”

²Kaawoona asilopwana athannamosa yaarweela vamulako mutokweene, owenghe mpatta wa ottuttuwani, khula mutthu amvarenleene kapwitthi oomwiivano. Aakhala mulopwana aari ni yaawosa awanreene sa eliinyu* yoopindeleliwa nihoottha na namalepa noopakiwa ni exapala muyuununi. Awosa yaavolowa, eneemela muxerexere altaari* a ebronze*.

³Vanonto ovuwa wa Muluku a oYixrayeli waakhumelela vasulu wa akerubini*, waakhalaayawo ni vaavaawo anasuseerela vamulako wa Empa ya Yave. Yave aamwiitthana mulopwana aawanre sa eliinyu* ni yoopindeleliwa nihoottha na namalepa muyuununi,

⁴anamweerela: “Mviravire musidade ya oYerusaleemu ni mwawiikaathere vayuuci eneneero yaale anlalamika, yiipulelaka niwoko na miteko soohiira simpakiwa mwemmo.”

⁵Miyo kiwiriyanaka, Owo aaweerela akina: “Muntthare musidadeni moothemwene ni mwawiive muhaamorelaka ikharari naari murima woowuurela.

⁶Mwaawiive asitokweene, amiravo, asimwali, asithiyana ni asinamwane. Vaheera, muhimutaveru yoowo anaakhaleno eneneero. Mpacereke vaNipuroniwaka Nootteela*.” Vano awosa yaapacenre asitokweene yaari ohoolo wa Empa ya Yave.

⁷Hiiho, Owo aaweerelasa: “Mvalihe Empa ya Yave ni musarihe mittembo mmapuwani. Murowaseke!” Awosa yaarowasa, enampacerasa noomala musidadeni moothemwene.

⁸Eyo eri hiiho, miyo kaahanle meekhaaka. Vano kaahuuramihela ekhove vathi, kiitthanaka: “Ii! Yave onlamula sootheene! Munimwaaphwata ahalahanle ootheene a oYixrayeli muyeeheraka isarasanyu oYerusaleemu?”

⁹Owo aakaakhula: “Sootakhala sa amaki a oYerusaleemu ni muloko wa oYuda, sohaattaxa; etthaya yoosareya ephome yooyeehiwa, ni esidade yoosareya soohiroromeleya. Awosa aneera: ‘Yave oothaama mulaponi; Yave khannoona.’

¹⁰Vano wa mpattaaka Miyo nkaawehasa ni ikharari hata nkiwuurelaru, vaheera kinimwaamoroxela mmurumwaya yeeyo apakansaaya.”

¹¹Vano mulopwana aawanre sa eliinyu* ni yoopindeleliwa nihoottha na namalepa muyuununi, aahokolowa ni mutthenga ola: “Koopaka yeele mwaakilamulenlaanyu.”