Read Makhuwa-Shirima Daniyeli 10 Bible Online

Daniyeli 10 - Makhuwa-Shirima bible

Daniyeli 10

¹Vayaakhani yanaararu ya olamula wa Siru, mwene a oParesi, Daniyeli (iitthaniwatho Beltexazari) aahaakhela ethupululo. Mutthenga wa moonelo ole waari wa ekhaikhai ni waathoonyera ekhotto etokotoko. Aahaakhela wiiwexexa wa mutthenga ole mmooneloni.

²Ehuhuweene yeele miyo, Daniyeli, kaaviriha isimana tthaaru kiinlaka.

³Nkaaciiyeru yooca yooreeraxa; enama ni eviinyu nkaalawingheru ni nkaavarenleru muteko soowunkhela mpaka omala isimana tthaaru.

⁴Vanihukuni nanaamiloko miili ni maxexe na mweeri woopacera, miyo kaaheemela mukerekhere mooloko mutokotoko oniitthaniwa Tigere.

⁵Kaaweha osulu ni aakhala ohoolowaka mulopwana awanreene eliinyu*, iiphitelenleene laamba a eyuuma yoorikaxa.

⁶Erutthwaawe yaalikana krisolito*, ekhovaawe yaalikana overinya ni maithwaawe yaalikana mithuko sivarelaka, nyoonosawe ni nyettosawe saalikana waara wa ebronze* yoohaniwa nnenesene, ni nsunawe ntoko onyakula wa atthu ancipale.

⁷Ti miyo, Daniyeli, koonne moonelo owo; yaakihoolaawo khayoonne etthu, mene yaasareya woova, enatthawa ni eniipitha.

⁸Vano miyo kaahanle meekhaaka kiwehexexaka moonelo mutokotoko ole; nkaakhalannetho ikuru; ekhove yaakimoraxa ni kaahanle vakhaani okhwa.

⁹Vano kaamwiiwa yoowo uulumaka ni miyo kimwiiwakaru, kaamorela vathi kiipopheiyeene kaakomaka.

¹⁰Woottharelana ntata naakivarela nnakikokhoriha nikivarenleene kithukumelaka.

¹¹Owo aakeerela: “Daniyeli, nyuwo muri oosiveleyaxa. Ngwiriyane nnenesene masu kineeraaka kooleeleni, ni mweemele niwoko miyo kirumiheliwe nyuwo.” Owo akileelakaru yeeyo, miyo kaaheemela, kithukumelaka.

¹²Owo aapwaherera: “Muhoove, Daniyeli, okhuma nihuku noopacera mwaapacenraanyu waasaasa wiiwexexa, mwiiyevihaka vamaithoni wa Mulukwaanyu, maswaanyu ahiiwiwa ni miyo kirweenle waakhula yaawo.

¹³Vaheera mwaana a mwene a oParesi aakihiiha wa mahuku miloko miili ni nihuku nimoha. Vano Mikayeli, ndyelo mutokweene mmoha, aahoorwa okikhavihera, niwoko kaahiihiwa ni mwaana a mwene a oParesi.

¹⁴Vano kirweenle woothaliherani yeeyo eneera yeereeliwe mulokwaanyu mweehuhuni mwa muhoolo, niwoko moonelo onthoonyera ehuhu ya muhoolo.”

¹⁵Owo akileelakaru masu ala, kaahuuramela vathi, kihiweraka wuuluma.

¹⁶Vanonto mmoha aalikana mutthu aatava eyanowaaka ni kaahula eyanowaaka, kinapacera wuuluma. Kaamweerela yoole eemenle ohoolowaka: “Pwiiyaaka, koothananaxa niwoko na moonelo ni kihanle vakhaani okhwa.

¹⁷Miyo, murumeiyaanyu, nkingwera wuuluma ni nyuwo, pwiiyaaka. Ikurusaka sookimalela ni kihanle kimumulaka ttakhi ttakhi.”

¹⁸Emaara ekinatho yoole aalikana ni mutthu aakitava, anakivaha ikuru.

¹⁹Owo aakeerela: “Ii! Mulopwana oosiveleyaxa, muhoove. Murettele okhaleke ni nyuwo! Mukhaleke oolipa, aani oolipaxa.” Owo ahimakaru masu ale, kaalipihereya, kinamweerela: “Pwiiyaaka, muulume mweenre mukivaha ikuru.”

²⁰Vano Owo aakikoha: “Nyuwo moosuwela kirweenlaaka? Ontthuneya ohokolowa weera kangwaneno mwaana a mwene a oParesi, ni karowaru, mwaana a mwene a oGresiya onimoowa.

²¹Mene kinimoothaliherani toko yeeyo elempwale mulivuruni ya Ekhaikhai. Mukhottoni eyo khawowo onkikhavihera ahikhanle Mikayeli, namwaakiha a mulokwaanyu.