Read Makhuwa-Shirima Daniyeli 12 Bible Online

Daniyeli 12 - Makhuwa-Shirima bible

Daniyeli 12

¹“Mweehuhuni yeeyo Mikayeli, Namwaakiha a mulokwaanyu onoovenya. Enookhala ehuhu ya othanana moota ohitonke wooniwa okhuma epacerero ya miloko mpaka ehuhuweene yeeyo. Vaheera ehuhu eyo mulokwaanyu — ootheene masinaaya alempwale mulivuruni — onoovuluxiwa.

²Ancipale ankona vatthayani anoovenyerera: akina wa okumi woohimala ni akinaawo wa wuulihiheya muru ni munyemu woohimala.

³Yaawosa ari a miruku animwaara ntoko waaraxa wa wiirimu ni yaawo angweettiha ancipale weera yaakhuleliwe ni Muluku, anooceremela ntoko ithenyeeri wa mahuku ootheene.

⁴Mene nyuwo, Daniyeli, ngwale ni mutthuke masu a elivuru mpaka ommaleloni wa ehuhu. Ancipale anooviravira moothemwene yaasaka miruku.”

⁵Vano miyo Daniyeli kaaweha ni ohoolowaka yaakhala atthu eeli akina — mmoha ekhopela ela wenno ni mukina ekhopela ele.

⁶Mmoha a yaawosa aamukoha mulopwana aawanre ikuwo sa eliinyu* aari vasulu maahi: “Mpaka yaakhani sineeraaya sikwanihereye itthu iyo sootikinsa?”

⁷Mulopwana aawanre ikuwo sa eliinyu* aari vasulu maahi aatheteelela moonowaawe mulopwana ni muthiyana wiirimu ni kaamwiiwa amulipelaka Yoowo onkhala ni okumi woohimala: “Enoovira ehuhu, ihuhu ni eriyari ya ehuhu. Ikuru sa muloko wootteela saamalakaru, itthu sootheene iyo sinookwaniheriwa.”

⁸Kaahiiwa, mene nkiiwenxenxe, tivawo kaamukonghaaka: “Pwiiyaaka, sootheene iyo emalihero heeni?”

⁹Owo aakaakhula: “Mukuxere mphironimwanyu Daniyeli, niwoko masu aawaleliwa ni aatthukiwa mpaka ehuhu ya ommaleloni.

¹⁰Ancipale anootteelihiwa, anoopakiwa moota wookwanela ni anoototoxiwa, vaheera atakhali anoopwaherera okhala oonanara. Khawoworu mutakhali aneera iiwexexe yeeyo, mene yaawo ari a miruku animwiiwexexa.

¹¹Okhuma ehuhu sooveleela sa khula nihuku sineeraaya simalihiwe mpaka otekiwa wa muluku oohiira, anoovira mahuku 1 290.

¹²Ooreelihiwa yoole aneera aweherere ni aphiyere ommaleloni wa mahuku 1 335!

¹³Wa nyuwo, mukuxere mphironimwanyu mpaka ommaleloni. Munimwiitthuuwa ni vano ommaleloni wa mahuku munoovenyerera weera mwaakhele yoohiyeriwaanyu mphwanenlaanyu.”