Read Makhuwa-Shirima Daniyeli 3 Bible Online

Daniyeli 3 - Makhuwa-Shirima bible

Daniyeli 3

¹Mwene Nebukadenezari aapaka ecaambulo ya eyuuma yoorikaxa, orakamelawaya osulu imeetru* miloko miili niithannapiili ni mweekhuveelonimwaya imeetru* tthaaru, aneemexa mweelaponi yoothatawala ya oDura, mweelaponi ya oBabiloniya.

²Vahoolowaya aawiitthana mapwattapwattha, asitokweene, maguvernadori, anamalaka, anamawehaweha musurukhu a mwene, aphuki, anamalamula ni asitokweene ootheene a ilapo sikina weera erwe yoone ohuleliwa wa ecaambulo eemenxaawe.

³Vano mapwattapwattha, asitokweene, maguvernadori, anamalaka, anamawehaweha musurukhu a mwene, aphuki, anamalamula ni asitokweene ootheene a ilapo sikina yaathukumanela ohuleliwa wa ecaambulo mwene Nebukadenezari eemenxaawe, eneemela ohoolowaya.

⁴Vanonto namutthenga aalaleiya ni nsu ntokotoko: “Ii! Atthu, miloko ni asilopwana a muulumo ootheene, yeeyo mulamuleliwaanyu opaka ti ela:

⁵Mwiiwaru oruma wa nipalapatta, ampetta, amakita oohiyanahiyana, mapalapatta makina ni ikaruma soohiyanahiyana, muurameleke vathi, mulapeke ecaambulo ya eyuuma yoorikaxa mwene Nebukadenezari eemenxaawe.

⁶Yoole aneera ahikokhorele ni ahilape, onoovonyeriwa woowaakuveya muniikhoni noovihaxa.”

⁷Tivawo, yiiwakaru oruma wa nipalapatta, ampetta, amakita oohiyanahiyana, mapalapatta makina ni ikaruma soohiyanahiyana, miloko sa ilapo sootheene ni atthu a muulumo ootheene yaakokhorela enalapa ecaambulo ya eyuuma yoorikaxa mwene Nebukadenezari eemenxaawe.

⁸Ehuhuweene yeele anamawehaweha ithenyeeri akina yaarowa, enaahimahima aYuda.

⁹Awosa yaamweerela mwene Nebukadenezari: “Ii! Amwene, mukhaleke wa mahuku ootheene!

¹⁰Moohela ekano, amwene, weera ootheene eniyiiwe oruma wa nipalapatta, ampetta, amakita oohiyanahiyana, mapalapatta makina ni ikaruma soohiyanahiyana, ekokhoreleke ni elapeke ecaambulo ya eyuuma yoorikaxa.

¹¹Moolamulelatho weera ootheene eneera ehikokhorele ni ehilape, anoovonyeriwa muniikhoni noovihaxa.

¹²Vano aakhala aYuda akina va nyuwo mwaakhalihenraanyu owehaweha milattu sa elapo ya oBabiloniya — Xadraki, Mixaki ni Abedneku — mwa yaawo ahoopwanttheni nyuwo, amwene. Awosa khaanlapa milukusanyu hata ecaambulo ya eyuuma yoorikaxa mweemenxaanyu.”

¹³Oonyoonyiweene Nebukadenezari aamwiitthana Xadraki, Mixaki ni Abedneku. Vano asilopwana ale yaaronghiwa ohoolo wa mwene

¹⁴ni Nebukadenezari aaweerela: “Xadraki, Mixaki ni Abedneku, etiitthu weera khamunkokhorela milukusaka naari khamunlapa ecaambulo ya eyuuma yoorikaxa keemenxaaka?

¹⁵Vano mwiiwaka oruma wa nipalapatta, ampetta, amakita oohiyanahiyana, mapalapatta makina ni ikaruma soohiyanahiyana, mwakokhorela ni mwalapa ecaambulo — onimooreerelani. Vaheera mwaahilapa ecaambulo, munoovonyeriwa woowaakuveya muniikhoni noovihaxa. Vano muluku heeni aneera awoopoleni mmatatanimwaka?”

¹⁶Xadraki, Mixaki ni Abedneku yaamwaakhula mwene: “Ii! Nebukadenezari, khoontthuneya weera hiyo niixaakihe ohoolowanyu.

¹⁷Hiyo navonyeriwa muniikhoni noovihaxa, Muluku mwa Yoowo nnimulapaahu onoowera onitapuxa ni Owo onoonoopola mmatatanimwanyu, nyuwo amwene.

¹⁸Ni waaheereya hiiho, vano musuwele nnenesene amwene weera hiyo khaninlapa milukusanyu naari ecaambulo ya eyuuma yoorikaxa mweemenxaanyu.”

¹⁹Vano Nebukadenezari aamunyoonyeriwa Xadraki, Mixaki ni Abedneku ni ekhovaawe yaaceendyeya. Aalamula weera oviha wa niikho waandyeereriwe imaara ithannapiili.

²⁰Aalamulelatho weera akina a anakhottwaawe ooweraxa emutthuke Xadraki, Mixaki ni Abedneku, ni yaavonyere muniikhoni.

²¹Hiiho asilopwana araru ale, ewanreene mikaandyosaya, ikuwo, akaputtula, ixuuli ni ikuwo sikina, yaatthukiwa, enavonyeriwa muniikhoni noovihaxa.

²²Olamula wa mwene waari woowaakuveya ni niikho naavihaxa moota wooweera malumaaya yaawiiva anakhotto yaamuronghale Xadraki, Mixaki ni Abedneku.

²³Vano amiravo araru ale yaamorela muniikhoni etthukiweene nnenesene.

²⁴Vanonto mwene Nebukadenezari aaheemela ootikhinihiweene, anaakoha anamalakaawe: “Hiyo naatthunke asilopwana araru, nnaavonyera mmooroni, keera?” Awosa yaamwaakhula: “Ii! Amwene, etiitthu.”

²⁵Owo aaweerela: “Moone! Kingwoona asilopwana axexe ootaphuliweene ni ooreereleene, yeetteettaka mmooroni, ni anaaxexe ole onlikana mwaana a miluku.”

²⁶Nebukadenezari aahaattamela mulako wa niikho noovihaxa, anakhuwela: “Xadraki, Mixaki ni Abedneku, arumeiyi a Muluku a Osulusulu, mukhumeke, ngweeke wenno!” Vano Xadraki, Mixaki ni Abedneku yaakhuma mmooroni.

²⁷Mapwattapwattha, asitokweene, maguvernadori, ni anamalaka a mwene yaathukumanasa yaarukureenreene. Yaahoona weera mooro khawaahinse irutthusaya naari mayihi a nyurusaya khayaaziiye hata mikaandyosaya khasaaziiye ni khayuunkharu murule.

²⁸Vano Nebukadenezari aaheera: “Muluku a Xadraki, Mixaki ni Abedneku attottopeliwe, mwa Yoowo omurumihale ndyelowaawe, anaavuluxa arumeiyaawe! Awosa aamuroromela Yoowo ehipwatthaka nlamulo na mwene ni yaalikana oleva okumaaya ohiya okokhorela naari olapa miluku sikina ahikhanle Mulukwaaya.

²⁹Vano kinlamula weera atthu a sakhalaru miloko hoye hoye nuulumo eneera emuulumele etthu yoovirikana Muluku a Xadraki, Mixaki ni Abedneku ekakatthanyiwe ni impasaya sitatuxiwe ettuxo, niwoko khoowowo muluku mukina ongwera ovuluxa moota ola.”

³⁰Vanonto mwene aangweliha Xadraki, Mixaki ni Abedneku mweelaponi mwa oBabiloniya.