Read Makhuwa-Shirima Daniyeli 5 Bible Online

Daniyeli 5 - Makhuwa-Shirima bible

Daniyeli 5

¹Mwene Belixazari ahaapakela efesta etokotoko maneethaawe macira muloko, anawuraxa vamoha ni yaawosa.

²Awuraka hiihaale eviinyuwaawe, aalamula weera ikoomixi sa eyuuma yoorikaxa ni eparatha* atithawe Nebukadenezari yaakhumihalaaya Mpaani mwa Muluku oYerusaleemu siruuhiwe. Aatthuna weera maneethaawe, axaarawe ni ikuxosawe ewurere.

³Vano yaaruuha ikoomixi sa eyuuma yoorikaxa saakhumihiwe Mpaani mwa Muluku oYerusaleemu ni mwene, maneethaawe, axaarawe ni ikuxosawe yaawurera.

⁴Ewuraka eviinyu, yaattottopela miluku sa eyuuma yoorikaxa, eparatha*, ebronze*, eyuuma, nyiri ni maluku.

⁵Wootutuxereya ntata na mutthu naahooneya nilepaka vaxirini mpatta woowooneyaxa mpaani mwa emwene. Mwene aahoona ntata nlepaka.

⁶Aahookhwa maririmela ni aahoovaxa moota wooweera makuthaawe yaamanana ni khaawera weemela.

⁷Mwene aawiitthana anamacitta, anamawehaweha ithenyeeri ni anahako, anaweerela anamiruku ale a oBabiloniya: “Yoole aneera asome masu ala ni akithalihere etaphulelowaaya onoowarihiwa ekuwo yoorikaxa ni onyooro wa eyuuma yoorikaxa muxikomwawe ni onookhala oottittimiheya anaararu mweelaponi yootheene.”

⁸Vano anamiruku ootheene a mwene yaahoorwa, mene khayaawenre osoma masu hata omuthalihera mwene etaphulelowaaya.

⁹Hiiho mwene Beltexazari aahoopopiheyaxatho ni ekhovaawe yaamoraxa. Vanonto maneethaawe yaatikhinihiwa.

¹⁰Pwiyamwene, iiwakaru okhuwela wa mwene ni maneethaawe, aavolowa mukwartuni mwa efesta, anamweerela: “Ii! Amwene, mukhaleke wa mahuku ootheene! Muhoove ni muhitteenguwe!

¹¹Ookhala mulopwana moomwenenimwanyu orino munepa wa miluku mwa yoowo. Mweehuhuni mwa atithinyu waahooneya weera aakhalano wiiwexexa ni miruku ntoko sa miluku. Mwene Nebukadenezari, atithinyu mwaarandenlaanyu, aamukhaliha mutokweene a anamacitta, akhwiri, anamawehaweha ithenyeeri ni anahako.

¹²Mulopwana owo, Daniyeli, mwene aamuttenghaawe Beltexazari, aakhalano iseru ni oweratho otaphulela sooloha, othalihera ethale ni othupulula mitikhinelo soorikaxa. Mmwiitthane Daniyeli ni owo onimoothaliherani etaphulelo ya masu ala.”

¹³Vano Daniyeli aaroihiwa ohoolo wa mwene ni owo aamukoha: “Nyuwo Daniyeli, mmoha a anamatthukiwa atithaka, amwene, yaakhumihalaaya oYuda?

¹⁴Kohiiwa weera munepa wa miluku ori mwa nyuwo ni weera mookhalano wiiwexexa, soosuwela ni miruku sitokotoko.

¹⁵Anamiruku ni akhwiri kaaruuheliwa ohoolowaka weera esome masu ala ni ekithalihere etaphulelowaaya, mene khaawenre othalihera.

¹⁶Vano miyo kohoona weera nyuwo munoowera otaphulela ni othupulula mitikhinelo. Mwawera osoma masu ala mukithaliheraka etaphulelowaaya, munoowarihiwa ikuwo soorikaxa, onyooro wa eyuuma yoorikaxa muxikomwanyu ni munookhalihiwa oottittimiheya anaararu moomwenenimwaka.”

¹⁷Vano Daniyeli aamwaakhula mwene: “Muhiyeke soovahasanyu ni mwaavahe akina. Wa soothesene, kinimoosomelani yoolempwa ni kinimoothaliherani etaphulelowaaya.

¹⁸Ii! Amwene, Muluku a Musulusulu aahaavaha atithinyu, Nebukadenezari, olamulaxa, otokweenexa, ovuwa ni waara.

¹⁹Niwoko na otokweene Muluku aavanghaawe, miloko sootheene sa elapo ya vathi ni atthu a muulumo ootheene yaamoovaxa. Yaale mwene aatthunnaawe owiiva, aangwiiva ni yaale aatthunaawe owuurela, aangwuurela; yaale aatthunaawe waakhaliha mapuro oottittimiheya, aamwaakhaliha ni yaale aatthunaawe waayeviha aamwaayeviha.

²⁰Wa soothesene, murimaawe waathatungwaaya woowiixoona ni woowuuma niwoko na wiikuxa, aavenxiwa vahiceniwawe ya emwene ni aahaakhiwa ovuwawawe.

²¹Aahoomoleliwa ottai wa atthu ni muupuwelowaawe waari ntoko mwaamunama. Aakhala vamoha ni abuuru a ntuphini, anaca malaxi ntoko imombe ni erutthwaawe yaahiimeliwa nikame na wiirimu mpaka aakhulenlaawe weera Muluku a Musulusulu onlamulaxa omwene wa atthu ni onimukhaliha mulamuli yoowo onimutthunaawe.

²²Vaheera nyuwo, Beltexazari, namarandelaawe, khamwiiyevinghe muroosuwelaru sootheene iye.

²³Ohiyanawaya mohiivuwiha ompwaha Yave a wiirimu. Moolamula weera ikoomixi sa Mpaani mwa Yave muruuheliwe nyuwo, maneethaanyu, axaarinyu ni ikuxosanyu weera ngwurere. Moottottopela miluku sa eparatha*, eyuuma yoorikaxa, ebronze*, eyuuma, nyiri ni maluku mwa seiyo sihingwera woona, wiiwa naari wiiwexexa. Vaheera khamunttittiminghe Muluku mwa Yooworu onlakela okumaanyu ni iphirosanyu sootheene.

²⁴Tivawo aaruminghaawe ntata nilempe masu ala.

²⁵Masu alempwe ti ala: MENE, MENE, TEKEL, PARSINI.

²⁶Vano etaphulelo ya masu ala ti ela: MENE: Muluku ohaalikela mahuku a olamulawanyu, anahela ommaleloniwaya.

²⁷TEKEL: moophimiwa vamuringoni ni mooveruwa.

²⁸PARSINI: Omwenaanyu wookawanyeya, enavahiwa aMedesi ni aParesi.”

²⁹Vano Beltexazari aalamula weera Daniyeli awarihiwe ikuwo soorikaxa, onyooro wa eyuuma yoorikaxa muxikomwawe ni owo aamukhaliha oottittimiheya anaararu moomwenenimwawe.

³⁰Ohiyuweene yoole Beltexazari, mwene a oBabiloniya, aahiiviwa

³¹ni Dareyexi, mMedesi, aakuxa omwene areeneno iyaakha miloko mithannamosa ni piili.