Read Makhuwa-Shirima Daniyeli 9 Bible Online

Daniyeli 9 - Makhuwa-Shirima bible

Daniyeli 9

¹Dariyexe, mwaana mulopwana a Xerxexi, mMedi, aakhalihiwa namalamula a oBabiloniya.

²Vano vayaakani yoopacera ya olamulawawe, miyo, Daniyeli, kaahiiwexexa kisomaka masu a Yave aamvahalaawe mprofeeti Yeremiya, weera oYerusaleemu onooheleya nthala wa iyaakha miloko mithannamiili.

³Vano kaamwaattamela Yave Muluku kimudyoonttelelaka ni mavekelo, soodyoonttelela ni kitthukaka, kiwanreene isaakho ni kiihenleene ettuura.

⁴Kaamvekela Yave Mulukwaaka, kilapaka: “Ii! Yave, Muluku Mutokweene ni Oowooveya, mwa Yoowo onthokorora wiiraanawawe wa osivela ni ootheene animusivela ni aniiwelela soolamulasawe,

⁵hiyo noottheka ni nookhalano nthowa. Naari atakhali ni anamavaanya; noohiya soolamulasanyu ni ikanosanyu.

⁶Khaniwiiwelenle arumeiyaanyu, maprofeeti yuulumme mwa Nsinananyu ni mamwenaahu, anamwanaaya ni asitithihu ni atthu ootheene a elapo.

⁷Yave, Nyuwo ti a ekhaikhai, mene olelo nohuulihiheyaxa muru niwoko na ohiroromeleyawahu ni Nyuwo — aani hiyo a oYuda, amaki a oYerusaleemu ni aYixrayeli ootheene ekhalaka vakhiviru naari ottaiwene, mweelaponi sootheene munimwaraxenlaanyu.

⁸Ii! Yave, hiyo, mamwenaahu, anamwanaaya ni asitithihu nohuulihiheyaxa muru niwoko na wootthekelani.

⁹Yave Mulukwaahu ti a ikharari ni oolikaneene olevelela, nrimoovaanyaniru.

¹⁰Hiyo khanimwiiwelenle Yave Mulukwaahu naari khaneettenle ikano aanivanghaawe mwa arumeiyaawe, maprofeeti.

¹¹aYixrayeli ootheene aahiya nlamulonanyu, enahapuwa, ekhoottaka owiiwelelani. Tivawo malapho ni mahooxo alempwale munlamuloni na Moisesi, murumeiyi a Muluku, animorenlaaya, niwoko nohootthekelani Nyuwo.

¹²Mookwanihera masu naalakeleliwaahu hiyo ni anamalamulaahu, muniruuhelaka erisa etokotoko. Mweelaponi moothemwene kheenapakiwe etthu ntoko epakingwe oYerusaleemu.

¹³Irisa sootheene iye saanikhumelela ntoko elempwalaaya munlamuloni na Moisesi. Hata hiiho khanaanse waakhuleliwa ni Yave Mulukwaahu, nihiyaka sootthekasahu ni nittharaka ekhaikhaiyaawe.

¹⁴Yave khaapinse oniruuhela erisa, niwoko Yave Mulukwaahu ti a ekhaikhai mwa sootheene ompakaawe; hata hiiho khanimwiiwelenle.

¹⁵Vano, Yave Mulukwaahu mukhumihale mulokwaanyu wExipitu ni Ntata Nooweraxa ni mwiipakenle Nsina nimpwaherera mpaka olelo, hiyo noottheka ni nookhalano nthowa.

¹⁶Ii! Yave, muhapuxe isarasanyu ni onyoonyeriwawanyu oYerusaleemu, esidadaanyu, mwaakwaanyu wootteela, muttharaka soopakasanyu sootheene sa ekhaikhai. Sootthekasahu ni miteko sootakhala sa makholowaahu sootannyera otthebwiwa wa oYerusaleemu ni mulokwaanyu wootheene ni ootheene anirukureenre.

¹⁷Ii! Muluku, mwiiwe mavekelo ni wiidyoonttelela wa murumeiyaanyu. Dyoontte! Moosivelanimwanyu ngwehe ni onnene nipuronanyu nootteela nithaamiwe!

¹⁸Ii! Muluku Dyoontte mwiiwe; muhuleke maithwaanyu ni ngwehe othaamiwa wa esidade enkuxa Nsinananyu. Hiyo khannoovekelani Nyuwo niwoko na ororomeleyawahu, mene niwoko na ikhararisanyu sitokotoko.

¹⁹Ii! Yave, mwiiwe! Ii! Yave, mulevelele! Ii! Yave, mwiiwe ni mpake. Ii! Mulukwaaka, moosivelanimwanyu muhipise, niwoko esidadaanyu ni mulokwaanyu onkuxa Nsinananyu.”

²⁰Miyo kilokololaka ni kivekelaka, kilapaka sootthekasaka ni seiyo sa mulokwaaka aYixrayeli, ni kimvekelaka Yave Mulukwaaka keerelaka mwaakwaawe wootteela,

²¹vano miyo nlelo kivekelaka hiihale, Gabriyeli, mulopwana ole kaamonnaaka mmooneloni wa khalayi, aakaattamela avavaka woowaakuveya, wookwanaka ehuhu ya yooveleela ya oxekuwa.

²²Owo aakixuttiha akeerelaka: “Daniyeli, miyo kirweenle woovahani wiiwexexa ni miruku.

²³Nyuwo mpacerakaru ovekela, yaahoorwa yoowaakhula yoolikana ni miyo kirweenle woothaliherani, niwoko moosiveleyaxa. Vano, moonele mutthenga ni mwiiwexexe moonelo:

²⁴Soothanliwa isimana miloko mithannamiili wa mulokwaanyu ni esidadaanyu yootteela weera sootakhala ni soottheka simalihiwe; weera eliviwe mathowa, eruuhiwe ekhaikhai wa mahuku ootheene, okwanihereye moonelo ni masu a muhoolo ni weera Ootteelaxa attikittheliwe.

²⁵Mwiiwexexe nnenesene etthu ela: Okhuma olamuleliwaaya orasela ni otekihiwa oYerusaleemu mpaka orwa wa Ootteelaxa, Namalamula, sinoovira isimana ithannapiili, ni isimana miloko mithannamosa ni piili. Esidade enooraseliwa ekhalanaka misewe ni yiikalaande, mene nsikhale ihuhu soorikaxa.

²⁶Siviraleene isimana miloko mithannamosa ni piili sa seiyo, Oottikittheliwa onimwiiviwa ni khakhalanatho etthu. Esidade ni Nipuro Nootteela* nnoophwatiwa ni muloko wa namalamula anaarwe. Ommaleloni onoophiya ntoko mirupi: owana onoopwaherera mpaka ommaleloni ni woolaleiwa oheleya mathala.

²⁷Owo onoopaka wiiraana ni ancipale wa esimana emoha. Vano eriyari ya esimaneene yeeyo sinoomala sooveleela ni soovaha. Mpatta mmoha wa Empa ya Muluku onootekiwa muluku oohiira aneeraawe akhalewo mpaka ophiya ommaleloni olakeleliwaawe.”