Read Makhuwa-Shirima Hoxeya 1 Bible Online

Hoxeya 1 - Makhuwa-Shirima bible

Hoxeya 1

¹Yave aahuuluma ni Hoxeya, mwaana mulopwana a Beeri, moolamulani mwa Uziya, Yotami, Ahazi ni Hezekiya, mamwene a oYuda ni Yerobowami, mwaana mulopwana a Yehowaxi, mwene a oYixrayeli.

²Yave apaceraka wuuluma mwa Hoxeya, Owo aamweerela: “Murowe, mwamukuxe muthiyana puuta ni anamwane asilopwana a moohiroromeleyani, niwoko muloko wookhalano nthowa na oraruwa moota woowuulihiheya muru, omuhiyaka Yave.”

³Tivawo owo aamuthenlaawe Gomeri, mwaana muthiyana a Diblayimi ni owo aarupala, anamuyarano mwaana mulopwana.

⁴Vano Yave aamweerela Hoxeya: “Munttehe nsina na Yizereyeli, niwoko kinoottaruxa woowaakuveya ekhapira ya Yehu mwaha wa noomala eereiye oYizereyeli ni kinoomalamaliha omwene wa oYixrayeli.

⁵Nihuku nno kinimwintaka muura wa Yixrayeli mureyareyani na oYizereyeli.”

⁶Gomeri aarupalatho, anamuyarano mwaana muthiyana. Vano Yave aamweerela Hoxeya: “Munttehe nsina na Lo-Ruhama, niwoko nkooniheratho osivela muloko wa oYixrayeli naari nkilevelelatho nthowanaya.

⁷Wa soothesene, kinoopwattha ni osivela muloko wa oYuda; ni Miyo kinoovuluxa, ohikhanle mwa muura, ekatana hoye hoye mukhottoni, hata mwa ikavalu* ni anamweettihaaya, mene mwa Yave, Mulukwaaya.”

⁸Ahiyaleene waamwa Lo-Ruhama, Gomeri aamuyaratho mwaana mulopwana.

⁹Vano Yave aaheera: “Munttehe nsina na Lo-Ami, niwoko nyuwosa khamuhiyono mulokwaaka ni Miyo nkihiyono Mulukwaanyu.

¹⁰Wa soothesene, aYixrayeli animwaatta ntoko ehaava ya mphareiya ehimphimeyaru, hata ehinaalikeleyaru. Vanipuroni yeerelasiwaaya: ‘Nyuwosa khamuhiyono mulokwaaka,’ awosa animwiitthaniwa ‘anamwane a Muluku Mukumi.’

¹¹Muloko wa oYuda ni wa oYixrayeli onoothukumanyihiwa, ni awosa anoomukhaliha muhooleli mmoha ni sinooweettela nnene mulaponi, niwoko nihuku nno, nnookhala ntokotoko oYizereyeli.