Read Makhuwa-Shirima Hoxeya 14 Bible Online

Hoxeya 14 - Makhuwa-Shirima bible

Hoxeya 14

¹Ii! oYixrayeli, ohokoleele wa Yave, Mulukwaawo. Sootthekasawo sohoomoroxa!

²Oreherere yoohima ni ohokoleele wa Yave. Mumvekele ha: “Mulevelele sootthekasahu sootheene ni mukhararinimwanyu munaakhulele weera noovaheeni sootthapela sa iyanosahu ntoko imombe simveleeliwa.

³awAsiriya khaangwera onivuluxa; khaniwelatho ikavalu* sa ekhotto. Seiye sipakiwe ni matataahu khaneerelatho ‘milukusahu,’ niwoko mwa Nyuwo mukwaasuni omphwanya ikharari.”

⁴“Miyo kinoolamiha ohiroromeleyawaya ni kinimwaasivela ni murimaaka wootheene, niwoko isarasaka sohaahuluwa.

⁵Miyo kinookhalela oYixrayeli ntoko nikame; iwo onoottuva ntoko ethutu. Aani, ntoko esidari* ya oLebanoni, sinoorakamelaxa mikwankhwaarisaya;

⁶soophuwasaya sinimunnuwa. Waarawaya onuulikane ni wa sooliveira*, wunkhelawaya ntoko esidari* ya oLebanoni.

⁷Yaale yaakhovelenle okhala vamunttuusinivawe, anoohokoleelawotho. Anoophuwela ntoko etrigu. Anoottuva ntoko evideira*, ni epilaaya eniikhale ntoko eviinyu ya oLebanoni.

⁸Ii! wEfrayimi, nkipwatthele heenitho miluku sikina? Ti Miyo kinimwaakhula, kinamukosoopa. Kiri ntoko mwiri wa epinyeiru* ekithi; soowiimasanyu sootheene sinrweela wa Miyo.”

⁹Musuweli taani? Ti yoowo anoonelemo itthu iya. Taani orino akhili? Ti yoowo aniiwexexe. Iphiro sa Yave ti soororomeleya; oororomeleya amvira mwemmo, vaheera attiyamaaru anookwattuliwamo.