Read Makhuwa-Shirima Hoxeya 4 Bible Online

Hoxeya 4 - Makhuwa-Shirima bible

Hoxeya 4

¹aYixrayeli nyuwo, mwiiwe masu a Yave, niwoko Owo onoohimahimani nyuwo munkhala elapo ela: “Ororomeleya ni osivela, mpakatho esuwelo ya Muluku soolakaseya mulaponimu.

²Anooneya paahi malapho, wootha ni wiivaniwa, wiiyeraniwa, oraruwelaniwa; iyo soopwaha nyiinano sootheene! Oyeehiwa wa ephome wootepaxa.

³Tivawo elapo enlalamikaaya, ni amakaaya ootheene anoondaaya; axinama a ntuphini, ipalame sa wiirimu ni ihopa sa mphareiya sinnikhwa.

⁴Vaheera, ahikhaleru anaamoothere mukina, niwoko Miyo kinoohimahimasani nyuwosa, asaserdoti*!

⁵Nyuwosa munnikwattuliwa khula nihuku, ni maprofeeti ankwattulasiwa ni nyeenyu. Tivawo kineeraaka kaaphwate amayinyu.

⁶Mulokwaaka woophwatiwa niwoko na ohikisuwela Miyo. Mweenre mukhoottaka esuwelo, Miyotho kinimookhoottani okhala asaserdotaaka; mweenre mukhoottaka Nlamulo na Mulukwaanyu, Miyotho nkaapwattha anamwaniinyu.

⁷Yaandyeerereiyaaya asaserdoti*, awosa aatepaxa okitthekela; ovuwawaya ahaakakanyiha ni etthu yoowuuliha muru.

⁸Awosa anca sooveleela sa soottheka sa mulokwaaka ni anghakalalela ottheka wa mulokwaaka.

⁹Tivawo kineeraaka kittaruxe hata okhalaka muloko naari asaserdoti*, niwoko na iphirosaya, ni kinimwaatthuvelela mitekosaya.

¹⁰Awosa eniice, mene kheevona; eniiraruwe, mene khayaandyeerera waattawaya, niwoko aamuhiya Yave weera yiixinnyerere

¹¹mooraruwani, mviinyuni ya khalayi ni yiiyeraka iseru sa mulokwaaka.

¹²Awosa animwaasa miruku wa miluku sa nyiri, ni anaakhuliwaaya ni mwaatthaabwa. Munepa wa oraruwa ti onaahapuxa; awosa khaanroromeleya wa Mulukwaaya.

¹³Ampakela sooveleela vasulu nyaako, enahisera erubani* mmattumuxani vathi wa ikarivalyu* ni ixopu* oraayawo munttuusi wooreerela. Tivawo anamwaniinyu asithiyana amvolowaaya opuuta ni asipwiyamwaaniinyu anraruwaaya.

¹⁴Nkaattaruxa anamwaniinyu asithiyana niwoko na opuuta, hata asipwiyamwaaniinyu mwaha wa oraruwa, niwoko asilopwanaanyu aniitakansano mapuuta ni ampakano sooveleela simpakiwa ni mapuuta mpaani mwa miluku sikina. Muloko ohinono wiiwexexa, onoophwatiwa.

¹⁵Ii! Yixrayeli, naari nyuwo muraruwaka, Yuda ahikhaleno nthowa. Muhirowetho oGiligali; muhiwele oBet-Aveni, ni muheere: ‘Kinlipela mwa okumi wa Yave.’

¹⁶aYixrayeli ti oottiyamaaru, ari oohihuweya ntoko mwaaxaana a emombe oohihuweya. Moota heeni Yave aneeraawe aakukhule ntoko iputtiputthi sireene munghawalawani?

¹⁷Efrayimi ohiiraanano miluku soowootha; munghiyeke meekhaawe!

¹⁸Naari yaamalaka yoowura, awosa ampwaherera mooraruwanimwaya; alamulaaya ansivelaxa iphiro soowuuliha muru.

¹⁹Eyuupuru enimwaavavihera ottaiwene, ni altaaraaya* animwaaruuhela wuulihiheya muru.”