Read Makhuwa-Shirima Hoxeya 7 Bible Online

Hoxeya 7 - Makhuwa-Shirima bible

Hoxeya 7

¹Miyo keereraka olamiha oYixrayeli, soottheka sa Efrayimi sinkhala vanlakalakani ni sootakhala sa Samariya sinoothupululiwa. Vano awosa ampaka soonanara; anamwiiya amvolowa mmampaani, alavilavi aniiya mmiseweni;

²vaheera awosa khaansuwela weera Miyo kinuupuwelela mitekosaya soonanara sootheene. Sootthekasaya sinaamira; Miyo kinnoonoona.

³Awosa animuhakalaliha mwene ni sootakhalasaya, anamwane a mwene ni soowoothasaya.

⁴Ootheene awo ti anamararuwa ehisaka ntoko ttukuttha, moorweene yoowo namooxa ipaawu ohintthuneyaaya otetheera okhuma oneetheiwaaya mpaka onnyaruwaaya.

⁵Vanihukuni na efesta ya mwenaahu, anamwanaawe anghapaliwa eviinyu, ni mwene onaavara matata anamatthebwa.

⁶Yaakhuveelasaka ni minyakunyakusaya, mirimasaya simpatta ntoko ttukuttha. Onyoonyasiwawaya ompatta vakhaani vakhaani ohiyuweene owo; mooxeexeloni onghisa ntoko malumi a mooro.

⁷Ootheene awo ampatta ntoko ttukuttha; awosa anaanyaanya ahoolelaaya. Mamwenaaya ootheene ammora, ni khaawo ankikhuwelelaru.

⁸Efrayimi oniitakansa ni miloko; Efrayimi ori ntoko eboolu yoohipittikuxiwa

⁹Anamarwa sohaamalela ikuru, mene awosa khaansuwela. Mayihaaya anthatuwa ipwi, mene owo khanoona.

¹⁰Wiixoona wa Yixrayeli onkhalela onamoona, mene sirookhalaru sootheene iyo, owo khanghokoleela wa Yave, Mulukwaawe, ni khammwaasa.

¹¹Efrayimi ori ntoko ekhunda yoolokottheya ni yoohiiwexexa. Ondyoonttelela ekhavihero wExipitu; onkhuwelela waakiha wa wAsiriya.

¹²Vaheera yaattimulakaru, kinaavonyerasa ntthavinaka; kinimwaakuruxela vathi ampharihiwa ntoko ipalame sa wiirimu. Koonaka weera aathukumana, kinimwaattaruxa.

¹³Ii! Wa yaawosa, niwoko aakirakamela! Waarweelase ophwatiwa, niwoko aakivaanya! Miyo kinghaawela owoopola, vaheera awosa ankuulumela soowootha.

¹⁴Awosa khaankiitthana ni murima wootheene, vaheera yiinlaxa oothananeene vabeettiniwaya. Aniipophakasa mwaha wa etrigu ni eviinyu enyowani, mene ankirakamela Miyo.

¹⁵Miyo kohaaxuttiha, kinaalipihera, vaheera awosa ankivaanelela soonanara.

¹⁶Awosa khaanghokoleela wa Muluku Musulusulu; ari ntoko muura woohilokaloka. Ahoolelaaya animwiiviwa ni ekatana niwoko na maswaaya ooveiha. Tivawo atthu a wExipitu anaatthebwaaya.”