Read Makhuwa-Shirima Hoxeya 8 Bible Online

Hoxeya 8 - Makhuwa-Shirima bible

Hoxeya 8

¹“Muhele nipalapatta owanoniwanyu! Nrepo nnaaraara osulu wa Empa ya Yave, niwoko muloko woonanariha wiiraanawaka ovaanyaka Nlamulonaka.

²aYixrayeli ankikhuwelela Miyo yeeraka: ‘Ii! Mulukwaahu, hiyo ningwaakhulelani Nyuwo!

³Vaheera aYixrayeli aakhootta yeeyo eri yooreera; mwiittana onimwaattharelela.

⁴Awosa ahaavara mamwene kihaatthunihenre; ahaathanla anamwane a mamwene kihaakhulenle. Ahiipakela miluku sa eparatha* ni eyuuma yoorikaxa sinaaroiha woophwatiwani.

⁵Ii! oSamariya, mvonyere okerekhere milukusanyu sipakiwe ntoko mwaamombe! Isarasaka soopattelasa seiyo. Mpaka yaakhani muhiwereyaka okhala ootteela?

⁶Mwaamombe ola opakiwe ni aYixrayeli! Opakiwe ni namapattha. Owo khahiyono Muluku. Mwaamombe a oSamariya onoopwexakasiwa.

⁷Awosa anaala epheyo, enahepha eyuupuru. Etrigu ehinthapuruwa kheenkhumiha ephepa. Naari yaathapuruwa, anamarwa yaamunyaanyaxa.

⁸oYixrayeli woomiriwa; vano ori eriyari ya miloko ntoko etthu yoohooneleyamo;

⁹Vano woorowa wAsiriya ntoko buuru a ntuphini ompwaherera ootaphuweene. wEfrayimi wohiithumiha wa yaawo anaakonanaaya.

¹⁰Arimwiithumiharu eriyari ya miloko, vano kinimwaathukumanyiha, ni woowaakuveya anoopacera woonda moohasulani wa mwene ooweraxa.

¹¹wEfrayimi orimwaatekaru altaari* ancipale oowaaveleelela yoottheka, awo aathatuwa altaari* wa yoottheka xaxaxa.

¹²Miyo kohaalepelasa mahusiho ootheene a Nlamulonaka, vaheera awosa anoona ntoko etthu yoohisuweleyaaya.

¹³Awosa ampaka sooveleela enakhuura enama, vaheera Yave khanghakalalela. Okhuma vaanaano va woorowa ohoolo, Owo onimuupuwelela sootakhalasaya ni onoottaruxa sootthekasaya. Awosa anoohokoleela wExipitu.

¹⁴oYixrayeli woomuttiwala Mvuluxaaya, onateka impa sa emwene; oYuda woolipiha isidade sincipale. Vaheera Miyo kinoorumihela mooro musidadenimwaya oneera olalihe moolipamwaya.”