Read Makhuwa-Shirima Yoweli 1 Bible Online

Yoweli 1 - Makhuwa-Shirima bible

Yoweli 1

¹Masu a Yave yaamurweenle Yoweli, mwaana mulopwana a Petuweli ti ala:

²Mwiiwe nyuwosa asitokweene ni amaki ootheene a elapo ela. Kheenatoko weereya etthu ntoko ela mmahukunimwanyu hata mmahukuni a makholowaanyu.

³Mwaathalihere anamwaniinyu yeeyo ekhumelenle, ni awosa yaathalihere anamwanaaya, ni anamwane awo wa ekhapira enttharelana.

⁴Seiye nasope mmoha ohiyalaawe, misoope mitokotoko sikina saakhuura; seiye misoope mitokotoko sikina saahiyalaaya, misoope mikhaani saakhuura ni seiye mikhaani saahiyalaaya, misoope sikinatho saakhuura.

⁵Mvenye nyuwosa anamuhapaliwa ni mwiinleke! Mulalamike nyuwosa anamawura a eviinyu ootheene! Mulalamike niwoko na eviinyu enyowani yeenre evenxiwa owanoniwanyu.

⁶Muloko wooweraxa woohaalikeleya woovolowa elapwaaka. Mainowaaya anlikana ni mwatto; miroondyesaya sinlikana ni mwatto muthiyana.

⁷Muloko ole woophwata imattasaka sa iwuuva* ni nyirisaka sa efiigu*. Wohaattula makulaaya ohiyaka iphandisaya soowaattuliwasene ttwee.

⁸Mulalamike ntoko mwaamwali oowiikosoopa awanreene sa enaamukhweli onimulalamikela namatthomeraawe akhwiiyeene vaanaanoru.

⁹Khasiwowotho sooveleela sa etrigu naari soowura Mpaani mwa Yave. Asaserdoti*, anrumeelamo vamaithoni wa Yave ammwiinanela.

¹⁰Imatta soophwatiwa ni etthaya yohuumelela; etrigu yoohononiwa; eviinyu enyowani yoomala ni makhura aathowa.

¹¹Mutteenguwe nyuwosa anamalima; mwiinleke nyuwosa murino imatta sa iwuuva*. Mulalamikele etrigu ni esevada*, niwoko soohepha soophwatiwa.

¹²Ematta ya iwuuva* yohuuma ni mwiri wa efiigu* woonyaala. Nyiri sa eromazera*, nivare ni sa masa* — nyiri soowiima sootheene sa mmatta — sohuuma. Vekhaikhai, ohakalala wa omutthu woomala.

¹³Ngware isaakho, nyuwosa asaserdoti* ni mulalamike nyuwosa munrumeela ohoolo wa altaari*. Murwe, mvirihe ohiyu ngwanreene isaakho, nyuwosa munrumeela vamaithoni wa Mulukwaaka, niwoko sooveleela sa etrigu ni soowura soorakamelihiwa Mpaani mwa Mulukwaanyu.

¹⁴Mulamulele otthuka moota wootteela, mpake muthukumano wootteela. Ngwiitthane Mpaani mwa Yave Mulukwaanyu asitokweene ni ootheene ankhala mweelaponi weera mundyoontteleleke Yave.

¹⁵Ii! Nihuku nno! Vano nihuku na Yave nookhuveela ni nnimoowa ntoko ophwata wooweraxa wa Muluku a ikuru sootheene.

¹⁶Vekhaikhai soocasahu noohaakhiwa — hiihotho ohakalala ni otthapa Mpaani mwa Mulukwaahu.

¹⁷Mmiso wohuntta vathi wa makottomola. Matatha aaheleya nthala ni icikutti soophwatiwa niwoko soohepha sootheene sooyeleeleya.

¹⁸Mwiiwe onyakula wa mihuwo — imombe sineetteetta ni owali, niwoko khasinono yooca. Mpakatho ikhondoolo sinnahaawaxa.

¹⁹Ii Yave! Kinoovekelani Nyuwo, niwoko mooro woohisa waacihiwamo axinama ni malumi a mooro aalaliha nyiri sootheene sa mmatta.

²⁰Mpaka axinama a ntuphini annoodyoonttelelani, niwoko nyooloko sohuuma ni mooro woohisa muncaayamo inama.