Read Makhuwa-Shirima Yoweli 3 Bible Online

Yoweli 3 - Makhuwa-Shirima bible

Yoweli 3

¹“Mmahukuni awo ni mweehuhuweene yeeyo, Miyo kaareereliwaka oYuda ni oYerusaleemu,

²kinoothukumanyiha miloko sootheene, kikuruxelaka mureyareyani na Yehoxafati. Nkathorihelewo miloko mwaha wa yoohiyeraaka, eyo tiiyo mulokwaaka aYixrayeli, niwoko iyo soomwaraxa mulokwaaka siikawelaka elapwaaka.

³Miloko iyo saapakela macitta mulokwaaka siwaakakhanyiheraka amiravo mapuuta. Saahaathumiha asimwali ni eviinyu weera sihapaliwe.

⁴Ii! oTiro, oSidoni ni ilapo sootheene sa oFilistiya — mulattu heeni muraanyuno ni Miyo? Muneerera okiinlela ikukuttula niwoko na etthu kipankaaka? Mwatthuna, mwiipasoope! Kinimoohokoloxerani woowaakuveya wa yeeyo muntthunaanyu okipaka.

⁵Mookiiyera iyuumasaka soorikaxa ni iparathasaka, munarongha mpaani mwa milukusanyu mihakhusaka sootthuneyaxa.

⁶Mwaahaathumihera aGrego muloko wa oYuda ni oYerusaleemu mwaarakamelihaka mulaponi ayareliwaayamo.

⁷Moone, kinimwaakhumihamo mmapuroni mwaathumihenraanyumo ni kinimoohokoloxerani yeeyo mpankaanyu.

⁸Kinimwaathumihera anamwaniinyu asilopwana ni asithiyana amaki a oYuda ni awosa eniyaathumihere aSabeyani ankhala ottaiwene.” Ti Yave eenre.

⁹Mwalaleiye yeeyo eriyari ya miloko: Mwiirehererele okhottoni! Ngweemexe anakhotto. Anakhotto ootheene yaattameleke weera ewane!

¹⁰Ikarumasanyu soolimela mutatuxe ikatana ni mavaka! Yoole ori oohilipa eereke: “Koolipa!”

¹¹Ngweeke miloko sinaattamenle ni muthukumanewo. Ii! Yave Mwaakuruxelewo anakhottwaanyu!

¹²“Miloko seette sirwaaka munreyareyani na Yehoxafati, niwoko weiwo kineeraka kakilaathi weera kathorihe miloko sootheene sa mukhwipi.

¹³Muvarele muteko ecikwaakhwa, niwoko yoohepha yoolikana. Ngweeke mvotteke ni ikuru iwuuva* niwoko nipuro sinaameliwa iwuuva* ni simvuuvelaayamo soosareya. Vekhaikhai, soonanarasaya ti sootepaxa!

¹⁴Atthu oohaalikeleya angweherera muNreyareyani na Olakela. Moone, nihuku na Yave nookhuveela muNreyareyani na Olakela.

¹⁵Nsuwa ni mweeri sinooriipihana ni ithenyeeri khasaara.

¹⁶Yave anaatturume oSiyoni; nsunawe nniiwiwe oYerusaleemu. Erimu ni vathi eniitetereye, mene Yave anaakhale Wootthawelawo mulokwaawe; aani Nipuro Noolipaxa na aYixrayeli.”

¹⁷“Vano nihuku nno mmwisuwele weera Miyo, Yave Mulukwaanyu, kinkhala oSiyoni, mwaakowaaka wootteela. OYerusaleemu onuutteele ni anamarwa kheewinatho.

¹⁸Nihuku nno nyaako nsittonye eviinyu enyowani; mmattumuxani onuuvuuve mukaka. Maxaapwa ootheene a oYuda eniitthimake maahi. Mpaani mwa Yave anaakhume naattuuttu ahelelaka nreyareya na oXitimi.

¹⁹Wa soothesene, wExipitu onuuheleye nthala ni wEdomi nnipakeye nikare noowuumelela, niwoko na mapuhero yaapakenlaaya atthu a oYuda, mwa weiwo yaawiivalaayawo atthu oohinthowa.

²⁰oYuda onuumakiwe mahuku ootheene nitho oYerusaleemu wa ikhapira sootheene.

²¹Soonanara seiye Miyo kihilevelenlaaka, kinoolevelela.” Yave onkhala oSiyoni!