Read Makhuwa-Shirima Amosi 1 Bible Online

Amosi 1 - Makhuwa-Shirima bible

Amosi 1

¹Ala masu aakhenlaawe mmooneloni Amosi, mukukhuli mmoha a oTekowa, mwaha wa aYixrayeli, sivinreene iyaakha piili ehinaaye otetereya etthaya. Ehuhuweene yeele, Uziya aari mwene a oYuda ni Yerobowami, mwaana mulopwana a Yehowaxi, aari mwene a oYixrayeli.

²Owo aaheera: “Yave ontturuma oSiyoni ni onkukutteya oYerusaleemu; onuuma ancihaayamo akukhuli, ni ennyaala etthomela ya mwaako Karemeli.”

³Yave oneera ha: “Niwoko na sootakhala sincipale seereiye oDamasku, nkirwa kihiya ottaruxa. Awosa ahaamana aGiliyade ni iyuuma soosongowa,

⁴kinoohisa empa ya Hazayeli, ni malumi a mooro anoolaliha moolipamo mwa Ben-Hadade.

⁵Kinookurumula mulako wa oDamasku; kinoomphwata mwene ori mureyareyani na wAveni, vamoha ni yoole omvarelela ekopo ya emwene oBete-Edomi. Muloko wa wAsiriya onooronghiwa wootthukiwani elapo ekina ya oKiri,” onghima Yave.

⁶Yave oneera ha: “Niwoko na sootakhala sincipale seereiye oGaza, nkirwa kihiya ottaruxa. Waaronghasa muloko wootheene wootthukiwani elapo ekina enaathumihera awEdomi.

⁷Tivawo kineeraaka kirumihele mooro ixiri sa oGaza, ni malumi a mooro anoolaliha moolipamwaya.

⁸Kinoomphwata mwene a wAsdode ni yoole omvarelela ekopo ya emwene wAskaloni. Kinootheteela Ntatanaka wEkroni, mpaka aneeraawe akhwe ookisera a aFilisti,” onghima Yave onlamula sootheene.

⁹Yave oneera ha: “Niwoko na sootakhala sincipale seereiye oTiro, nkirwa kihiya ottaruxa. Vano aathumiha muloko wootheene, yaathumiheraka awEdomi, enyoosaka wiiraana wa axunna,

¹⁰Tivawo kineeraaka kihise ixiri sa oTiro ni malumi a mooro anoolaliha moolipamwaya.”

¹¹Yave oneera ha: “Niwoko na sootakhala sincipale seereiye wEdomi, nkirwa kihiya ottaruxa. Vano owo oomuttharatthara munneiye, ni ohooceeliha ikharari, amunyoonyeraxiwaka ni apwahererihaka isarasawe.

¹²Tivawo kineeraaka kirumihele mooro oTemani, olaliheke moolipamo mwa oBozera.”

¹³Yave oneera ha: “Niwoko na sootakhala sincipale seereiye wAmoni, nkirwa kihiya ottaruxa. Vano oophula irukulu sa asithiyana oorupala a oGiliyade, weera aandyeerere nyiinanosawe.

¹⁴Tivawo kineeraaka kirumihele mooro ixiri sa oRaba olaliheke moolipamwaya. Vano vanihukuni na owana onimwiiwanyeya okhuweliwa wa ekhotto, yoopaxaka epheyo yoowuupaxa vanihukuni na ettheku.

¹⁵Mwenaawe onooronghiwa wootthukiwani vamoha ni asitokweenaawe,” onghima Yave.