Read Makhuwa-Shirima Amosi 2 Bible Online

Amosi 2 - Makhuwa-Shirima bible

Amosi 2

¹Yave oneera ha: “Niwoko na sootakhala sincipale seereiye oMowabe, nkirwa kihiya omuttaruxa. Vano owo oohisa mpaka olaliha makhuva a mwene a awEdomi.

²Tivawo kineeraaka kirumihele mooro oMowabe olaliheke moolipamo mwa oKeriyote. Mowabe onoolakaseya mmunyakunyakuni mutokotoko, okhuwelaxiwaka mukhottoni ni moorumani mwa nipalapatta.

³Kinoomphwata mulamulaawe kiwiiveke asitokweenaawe vamoha ni yoowo,” onghima Yave.

⁴Yave oneera ha: “Niwoko na sootakhala sincipale seereiye oYuda, nkirwa kihiya ottaruxa. Vano aYuda aakhootta Nlamulo na Yave ni khayiiwelenle ikanosawe, niwoko aalokottheya ni miluku soowootha, mwa seiyo yaattharaaya makholowaaya.

⁵Tivawo kineeraaka kirumihele mooro oYuda, olaliheke moolipamo mwa oYerusaleemu.”

⁶Yave oneera ha: “Niwoko na sootakhala sincipale seereiye oYixrayeli, nkirwa kihiya ottaruxa. Awosa animuthumiha ni eparatha* oororomeleya, nitho ikwakwaatta piili oohaawa .

⁷Annyikala muru wa oothoiwa, mooteene yoowo annyikalaaya ntthupi, ni animukhoottela ompakela ekhaikhai oohasuliwa. Tiithi ni mwaana animukonano muthiyana mmoharu, ehiirihaka hiiho Nsinanaka Nootteela.

⁸Anuuramela ohoolo wa yakhalaru altaari* ewanreene ikuwo sooweemexeriwa. Ereene mpaani mwa mulukwaaya, angwura eviinyu yoothummwa ni musurukhu wooliviwa mmulattuni.

⁹Yaaroorakamaxaru ntoko mwiri wa esidari*, ni yaaroolipaxaru ntoko ikaravaliyu, ti Miyo kaaphwante awAmori ohoolo wa aYixrayeli. Koovurula soowiimasaya, kinaruttumula mikwankhwaarisaya.

¹⁰Ti yoomeene kookhumihaleni wExipitu, kinaweettihani iyaakha miloko mixexe munikareni, weera koovaheeni elapo ya awAmori.

¹¹Kohaathanlatho anamwaniinyu akina akina asilopwana weera ekhale maprofeeti, ni akina akina a amiravowaanyu weera ekhale aNaziri*. Muloko wa oYixrayeli, kheehiyono ettiitthu?” onghima Yave.

¹²“Vaheera nyuwosa moopakiha weera aNaziri* ewure eviinyu, munaalamulela maprofeeti weera ehithalihere otthuna wa Muluku.

¹³Vanonto, Miyo kinooweetheyasani ntoko ekaaro eneetheyaaya etthaya elemelaxiweene etrigu.

¹⁴Oowaaluweya khoopowa, oolipa khalipa, ni nakhotto khoopola okumaawe.

¹⁵Namalatha muura khapwaherera okhala vanipuroniwawe, ontthimaka khatthawa, ni namweettiha a ekavalu* khoopola okumaawe.

¹⁶Nihuku nno mpaka anakhotto oolipihaxa murima anootthawa tiriya,” onghima Yave.