Read Makhuwa-Shirima Amosi 3 Bible Online

Amosi 3 - Makhuwa-Shirima bible

Amosi 3

¹Ii! aYixrayeli, mwiiwe masu ala Yave owuulumenlaaweni; kinuulumela emusi yootheene ela kikhumihalaaka wExipitu:

²“Wa imusi sootheene sa mulaponi koothanlaleni nyuwo paahi; tivawo Miyo kineeraaka koottaruxeleni sootakhala sootheene.”

³Atthu eeli ehiiwananaka, animweetta vamoha?

⁴Mwatto aahivara yoovaraawe, onimoopa murika moothakoni? Ankha mwaaxaana a mwatto onimoopa murika munikhukunimwawe ahilupanttheru?

⁵Mwaapalame onoopharihiwa munraakhoni ahireiwale? Weeraka muraakho onootaphuliwa ohipharihaleru etthu?

⁶Nipalapatta naarumaka musidade, muloko khoonthukumela? Enimweereya erisa musidade Yave ahilamulenle?

⁷Vekhaikhai Yave onlamula sootheene, khampakaru etthu ahiwoonihenre yoovaanelaawe arumeiyaawe maprofeeti.

⁸Mwatto ohoopa murika, taani aneera ahoove? Yave onlamula sootheene, ohuuluma, taani aneera ahithalihere otthuna wa Muluku?

⁹Mulaleerele moolipamo mwa wAxedode ni mwa wExipitu: “Muthukumane mmanyaakoni sa oSamariya, weera moone munyakunyaku mutokotoko ori musidadeni mmo, ni nihasu nri eriyari ya mulokwaaya.”

¹⁰“Awosa khaangwera okhalano mweettelo woowookoleleya,” onghima Yave, “awosa anthukumanya moolipamwaya seiyo yiiyalaaya ni ahuhunlaaya.”

¹¹Vanonto Yave onlamula sootheene, oneera ha: “Mwiittana mmoha onookuxa elapo. Owo onoophwata moolipamwanyu ni onoohuhula impasanyu soolipa.

¹²Vanonto Yave onlamula sootheene oneera ha: mooteene yoowo mukukhuli onoopolaawe ekhondoolo, akhumihaka mmwaano mwa mwatto makhuva meeli a mmettoni hoye hoye entthuri emoha ya naaru paahi, aYixrayeli anoovenxiwa oSamariya — yaawosa ankilaathi okhwipi wa ebeetti ni ehice sa nsawu.

¹³Mwiiwe yeeyo ni mukhalele onamoona ekhapira ya Yakobe,” onghima Yave onlamula sootheene, Muluku a ikuru sootheene.

¹⁴“Vanihukuni Miyo kineeraaka kaattaruxe aYixrayeli mwaha wa sootthekasaya, kinimwaaphwata altaari* a oBeteli; manyaka a altaari* anoothikiliwa, emoreleke vathi.

¹⁵Kinoophwata empa ya mulaala vamoha ni empa ya elimwe; impa siphwanelihiwe maino a etthepo sinoophwatiwa ni impa sitokotoko sinoolakaseya,” onghima Yave.